ប្រមុខ FIFA ៖ អ៊ីរ៉ង់នឹងចូលរួមព្រឹត្តិការណ៍ World Cup ហើយប្រកួតតាមកាលវិភាគកំណត់
អន្តរជាតិ ៖ លោក Gianni Infantino ប្រធានសហព័ន្ធបាល់ទាត់ពិភពលោក (FIFA) បានប្រាប់ទីភ្នាក់ងារសារព័ត៌មាន AFP កាលពីថ្ងៃទៅ៣១…
អន្តរជាតិ ៖ លោក Gianni Infantino ប្រធានសហព័ន្ធបាល់ទាត់ពិភពលោក (FIFA) បានប្រាប់ទីភ្នាក់ងារសារព័ត៌មាន AFP កាលពីថ្ងៃទៅ៣១ ខែមីនា ឆ្នាំ២០២៦ ថា អ៊ីរ៉ង់ នឹងចូលរួមក្នុងព្រឹត្តិការណ៍ World Cup ឆ្នាំ២០២៦ ហើយនឹងលេងការប្រកួតជម្រុះក្នុងពូលរបស់ពួកគេនៅលើទឹកដីសហរដ្ឋអាមេរិក តាមកាលវិភាគ បើទោះបីជាមានសង្គ្រាមនៅមជ្ឈិមបូព៌ាយ៉ាងណាក៏ដោយ។
បុរសជនជាតិស្វីសវ័យ៥៦ឆ្នាំរូបនេះ បានទៅជួបផ្ទាល់ជាមួយក្រុមជម្រើសជាតិអ៊ីរ៉ង់ នៅទីក្រុង Antalya ប្រទេសតួកគីយ៉េ ជាកន្លែងដែលពួកគេកំពុងប្រកួតមិត្តភាព ហើយនេះក៏ជាការទំនាក់ទំនងលើកដំបូងរបស់លោកជាមួយនឹងក្រុមអ៊ីរ៉ង់ ចាប់តាំងពីការវាយប្រហារតាមអាកាសរបស់សហរដ្ឋអាមេរិក និងអ៊ីស្រាអែលប្រឆាំងនឹងអ៊ីរ៉ង់ កាលពីចុងខែកុម្ភៈកន្លងទៅ។
ថ្លែងនៅម៉ោងសម្រាកតង់ទី១ ការប្រកួតមិត្តភាពរវាងអ៊ីរ៉ង់ និងកូស្តារីកា លោក Infantino បានឱ្យដឹងដូច្នេះថា «អ៊ីរ៉ង់នឹងចូលរួមព្រឹត្តិការណ៍ World Cup ហើយនោះជាមូលហេតុដែលយើងនៅទីនេះ។ យើងរីករាយណាស់ ព្រោះពួកគេជាក្រុមដ៏រឹងមាំមួយ»។
លោក Infantino បានបន្ថែមទៀតថា «ខ្ញុំបានឃើញក្រុមអ៊ីរ៉ង់ ខ្ញុំបាននិយាយជាមួយកីឡាករ និងគ្រូបង្វឹក ដូច្នេះអ្វីៗគឺល្អ»។ ហើយលោកក៏បានបន្តសង្កត់ធ្ងន់ថា «ការប្រកួតរបស់អ៊ីរ៉ង់នឹងត្រូវលេងនៅកីឡដ្ឋានដែលពួកគេគួរលេង ទៅតាមលទ្ធផលនៃការចាប់ឆ្នោត»។
សហព័ន្ធបាល់ទាត់អ៊ីរ៉ង់កាលពីដើមខែមីនា បានអះអាងថា ខ្លួនកំពុងចរចាជាមួយ FIFA ដើម្បីសុំផ្លាស់ប្តូរទីតាំងការប្រកួត World Cup របស់ខ្លួនចេញពីទឹកដីសហរដ្ឋអាមេរិកទៅកាន់ប្រទេសម៉ិកស៊ិក បន្ទាប់ពីប្រធានាធិបតីអាមេរិក លោក ដូណាល់ ត្រាំ (Donald Trump) បានសម្តែងការបារម្ភអំពីសន្តិសុខរបស់ពួកគេ។ ស្របពេលដែលប្រធានាធិបតីម៉ិកស៊ិក លោកស្រី Claudia Sheinbaum បានប្រកាសថា ម៉ិកស៊ិកបានត្រៀមខ្លួនរួចជាស្រេចដើម្បីធ្វើជាម្ចាស់ផ្ទះការប្រកួតរបស់អ៊ីរ៉ង់ ប្រសិនបើចាំបាច់។
ទោះបីជាមានភាពចម្រូងចម្រាសក៏ដោយ ក៏ FIFA កំពុងប្រកាន់ខ្ជាប់ផែនការដែលបានព្រមព្រៀងគ្នា បន្ទាប់ពីការចាប់ឆ្នោតកាលពីខែធ្នូ។ ហើយលោក Infantino ជឿជាក់ថាបាល់ទាត់ត្រូវដើរតួនាទីផ្សះផ្សារយ៉ាងសំខាន់នៅក្នុងពិភពលោកដែលបែកបាក់។ នៅលើគេហទំព័រផ្ទាល់ខ្លួន លោក Infantino បានសង្កត់ធ្ងន់ថា FIFA នឹងបន្តគាំទ្រអ៊ីរ៉ង់ក្នុងការរៀបចំសម្រាប់ការប្រកួត។ លោកក៏បានបញ្ជាក់ជាថ្មីនូវជំហរដ៏រឹងមាំរបស់លោកលើការចូលរួមរបស់ក្រុមអាស៊ីខាងលិចក្នុងការប្រកួត។ នៅក្នុងបទសម្ភាសន៍មួយនៅម៉ិកស៊ិក លោកបានបញ្ជាក់ថា FIFA ចង់ឱ្យអ៊ីរ៉ង់លេង ហើយពួកគេនឹងលេង ដោយគ្មានផែនការ B, C ឬ D នោះទេ គឺមានតែផែនការ A តែប៉ុណ្ណោះ។ ដូច្នេះអ្វីៗត្រូវធ្វើតាមការគ្រោងទុក គ្មានការផ្លាស់ប្តូរ។
គួរបញ្ជាក់ថា ព្រឹត្តិការណ៍ FIFA World Cup 2026 នឹងចាប់ផ្តើមនៅថ្ងៃទី១១ ខែមិថុនា រហូតដល់ថ្ងៃទី១៩ ខែកក្កដា ដោយសហរដ្ឋអាមេរិក ម៉ិកស៊ិក និងកាណាដា ធ្វើជាសហម្ចាស់ផ្ទះ។ តាមកាលវិភាគពូល G អ៊ីរ៉ង់នឹងប្រកួតជាមួយនូវែលសេឡង់ និងបែលហ្ស៊ិក នៅទីក្រុងឡូសអាន់ជឺឡេស (Los Angeles) មុនពេលជួបអេហ្ស៊ីប នៅទីក្រុងស៊ីថល (Seattle) នៃទឹកដីសហរដ្ឋអាមេរិក៕ ប្រភព ៖ The Guardian
ចែករំលែកព័តមាននេះ