ចក្រភពអង់គ្លេស ៖ បន្ទាប់ពីជួបវិបត្តិហិរញ្ញវត្ថុដ៏ធ្ងន់ធ្ងរ ព្រមទាំងលទ្ធផលមិនសមប្រកបផងនោះ គ្រួសារមហាសេដ្ឋីថៃត្រកូល Srivaddhanaprabha បានសម្រេចដាក់លក់ក្លិបបាល់ទាត់ Leicester City និងប្រព័ន្ធអេកូឡូស៊ីកីឡាទាំងមូលរបស់ក្លិប ដែលជាកម្មសិទ្ធិរបស់ខ្លួន។
យោងតាមសារព័ត៌មាន The Athletic កាលពីពេលថ្មីៗនេះ បានរាយការណ៍ថា គ្រួសារត្រកូល Srivaddhanaprabha បានដាក់លក់ក្លិបបាល់ទាត់ Leicester City នៅចក្រភពអង់គ្លេស និងទ្រព្យសម្បត្តិពាក់ព័ន្ធទាំងអស់របស់ក្លិបនេះ ក្រោមឈ្មោះគម្រោង «Project Lineup» ដែលរៀបចំដោយធនាគារវិនិយោគ Citigroup របស់សហរដ្ឋអាមេរិក។ កញ្ចប់លក់នេះមានតម្លៃរំពឹងទុក ២២២ លានផោន ឬជិត ៣០០ លានដុល្លារសហរដ្ឋអាមេរិក ដោយរួមបញ្ចូលទាំងក្លិប OH Leuven នៅប្រទេសបែលហ្ស៊ិក ដែលបច្ចុប្បន្នក៏ស្ថិតក្រោមការគ្រប់គ្រង និងកម្មសិទ្ធិរបស់ក្រុមហ៊ុនគ្រួសារមហាសេដ្ឋីថៃនេះផងដែរ។
ទោះយ៉ាងណាក៏ដោយ អ្នកជំនាញផ្នែកហិរញ្ញវត្ថុជឿថា តម្លៃជាក់ស្តែងអាចបានត្រឹមតែ ១៤៨ លានផោន ឬជិត ២០០ លានដុល្លារតែប៉ុណ្ណោះ។ តួលេខនេះគឺទាបជាងការរំពឹងទុក ដោយសារតែក្រុមរហស្សនាមកញ្ជ្រោង ដែលធ្លាប់ឈ្នះជើងឯកលីគកំពូលអង់គ្លេស (Premier League) កាលពីរដូវកាល ២០១៥-១៦ មួយនេះ ទើបតែធ្លាក់ទៅលេងលីគលំដាប់ទី ៣ (League One) និងខាតបង់ប្រាក់យ៉ាងគំហុកប្រមាណ ៩៦ លានដុល្លារ ដែលត្រូវបានរាយការណ៍ក្នុងរបាយការណ៍ហិរញ្ញវត្ថុចុងក្រោយបង្អស់របស់ក្លិប។
ចំណុចដែលទាក់ទាញបំផុតនៃកិច្ចព្រមព្រៀងនេះ ស្ថិតនៅលើទ្រព្យសម្បត្តិអចលនទ្រព្យដែលមានតម្លៃរហូតដល់ ២៧៥ លានដល្លាររបស់ក្លិប រួមមាន កីឡដ្ឋាន King Power, មជ្ឈមណ្ឌលហ្វឹកហាត់ Seagrave ដ៏ទំនើប និងទីលាន Belvoir Drive ផងដែរ។ នៅក្នុងផ្សព្វផ្សាយរបស់ខ្លួន ធនាគារ Citigroup បានគូសបញ្ជាក់ពីក្លិប Leicester City ថា ក្លិបដែលជោគជ័យបំផុតនៅក្នុងប្រវត្តិសាស្ត្រនៃលីគអង់គ្លេស EFL ដែលមកជាមួយប្រព័ន្ធសាលាបណ្តុះបណ្តាលយុវជន ដែលបំពេញតាមស្តង់ដារកម្រិតទី១។
ការសម្រេចចិត្តដាក់លក់ក្លិបនេះ បានបង្កើតជារឿងភ្ញាក់ផ្អើលយ៉ាងខ្លាំងដល់អ្នកគាំទ្របាល់ទាត់។ ដ្បិតកាលពីដើមខែមករាកន្លងទៅ លោក Aiyawatt Srivaddhanaprabha ដែលជាប្រធានក្លិប បានថ្លែងថា ការលក់ក្លឹបមិនមែនជាជម្រើស ឬជាមធ្យោបាយសម្រាប់គ្រួសារលោកក្នុងការបោះបង់ចោលទីផ្សារបាល់ទាត់នោះទេ ដោយលោកនៅតែមានក្ដីស្រឡាញ់ និងការប្តេជ្ញាចិត្តខ្ពស់ចំពោះវិស័យមួយនេះ។
យ៉ាងណាមិញ គេជឿថា ការលេចឡើងនៃគម្រោង «Project Lineup» នេះ បានបង្ហាញយ៉ាងច្បាស់ពីសម្ពាធហិរញ្ញវត្ថុដែលកំពុងធ្លាក់លើម្ចាស់ក្លិបមហាសេដ្ឋីជនជាតិថៃ ដែលបង្ខំឱ្យពួកគេស្វែងរកប្រភពទុនថ្មី បន្ទាប់ពីវិបត្តិដ៏រ៉ាំរ៉ៃមួយរយៈធំរបស់ក្រុម Leicester City៕ ប្រភព ៖ Znews
ចែករំលែកព័តមាននេះ