ជើងឯក៤សម័យកាល «អ៊ីតាលី» ខកខានប្រជែងពានរង្វាន់ World Cup ៣លើកជាប់គ្នា
អន្តរជាតិ ៖ ក្រុមបាល់ទាត់ជម្រើសជាតិអ៊ីតាលី ដែលនៅសល់គ្នាត្រឹម ១០ នាក់ ក្រោយទទួលបានកាតក្រហម អស់ឱកាសឡើងទៅកាន់ការប្រកួតជុំចុងក្រោយពានរង្វាន់ FIFA World…
អន្តរជាតិ ៖ ក្រុមបាល់ទាត់ជម្រើសជាតិអ៊ីតាលី ដែលនៅសល់គ្នាត្រឹម ១០ នាក់ ក្រោយទទួលបានកាតក្រហម អស់ឱកាសឡើងទៅកាន់ការប្រកួតជុំចុងក្រោយពានរង្វាន់ FIFA World Cup ឆ្នាំ២០២៦ នៅសហរដ្ឋអាមេរិក កាណាដា និងម៉ិកស៊ិក បន្ទាប់ពីចាញ់ការប្រកួតវគ្គ Play-off ជម្រុះតំបន់អឺរ៉ុប ដោយការទាត់បាល់ប៉េណាល់ទីកាត់សេចក្តីលទ្ធផល ៤-១ ក្រោយថ្វីជើងក្រុមម្ចាស់ផ្ទះបូស្នៀ និងហឺហ្សេហ្គោវីណា ក្រោយបញ្ចប់ ១២០ នាទី (ម៉ោងបន្ថែម ១៥នាទី ២ដង) ស្មើគ្នា ១-១ នៅឯកីឡដ្ឋាន Bilino Polje កាលពីថ្ងៃទី៣១ ខែមីនា ឆ្នាំ២០២៦។
តាមរយៈលទ្ធផលខាងលើនេះ ក្រុមអសុរីអ៊ីតាលី ម្ចាស់ជើងឯកពានរង្វាន់ World Cup ៤ សម័យកាល (១៩៣៤, ១៩៣៨, ១៩៨២, ២០០៦) ខកខានការប្រកួតជុំចុងក្រោយពានរង្វាន់បាល់ទាត់ធំបំផុតមួយនេះ ៣ លើកជាប់គ្នា ពោលគឺព្រឹត្តិការណ៍ឆ្នាំ ២០១៨ នៅរុស្ស៊ី ព្រឹត្តិការណ៍ឆ្នាំ ២០២២ នៅកាតា និងឆ្នាំ ២០២៦ ដែលនឹងចាប់ផ្តើមនៅថ្ងៃទី១១ ខែមិថុនា ដល់ថ្ងៃទី១៩ ខែកក្កដា ខាងមុខនេះ។ មិនតែប៉ុណ្ណោះ អ៊ីតាលីក៏បង្កើតបានកំណត់ត្រាអាក្រក់មួយ ជាក្រុមជើងឯកដំបូងគេ ដែលខកខានការប្រកួត World Cup ៣ លើកជាប់គ្នាផងដែរ។
សមាសភាពក្រុមទាំង ៤៨ បន្តដំណើរទៅកាន់ការប្រកួតប្រជែងដណ្តើមពានរង្វាន់ FIFA World Cup ឆ្នាំ២០២៦ រកឃើញជាផ្លូវការហើយ ខណៈដែលអ៊ីរ៉ាក់គឺជាក្រុមចុងក្រោយគេបង្អស់ឈ្នះសំបុត្រយន្តហោះទៅកាន់ព្រឹត្តិការណ៍នៅសហរដ្ឋអាមេរិក កាណាដា និងម៉ិកស៊ិក បន្ទាប់ពីយកឈ្នះក្រុមបូលូវីដោយលទ្ធផល ២-១ ការប្រកួតជម្រុះ Play-off អន្តរទ្វីប កាលពីព្រឹកថ្ងៃទី១ ខែមេសា ឆ្នាំ២០២៦ (ម៉ោងនៅកម្ពុជា)។
-អឺរ៉ុប ១៦ ក្រុម ៖ អូទ្រីស, បែលហ្ស៊ិក, បូស្នៀ និងហឺហ្សេហ្គោវីណា, ក្រូអាស៊ី, សាធារណរដ្ឋឆែក, អង់គ្លេស, បារាំង, អាល្លឺម៉ង់, ហូឡង់, ន័រវែស, ព័រទុយហ្គាល់, ស្កុតឡែន, អេស្ប៉ាញ, ស៊ុយអែត, ស្វីស និង តួកគីយ៉េ
-អាស៊ី ៩ ក្រុម ៖ អូស្ត្រាលី, អ៊ីរ៉ង់, អ៊ីរ៉ាក់, ជប៉ុន, ហ្ស៊កដានី, កាតា, អារ៉ាប៊ីសាអូឌីត, កូរ៉េខាងត្បូង និង អ៊ូសបេគីស្ថាន
-អាមេរិកខាងត្បូង ៦ ក្រុម ៖ អាហ្សង់ទីន (ក្រុមការពារជើងឯក) ប្រេស៊ីល, អេក្វាឌ័រ, អ៊ុយរូហ្គាយ, កូឡុំប៊ី និងប៉ារ៉ាហ្គាយ
-អាហ្វ្រិក ១០ ក្រុម ៖ អាល់ហ្សេរី, ទុយនេស៊ី, អេហ្ស៊ីប, ហ្គាណា, ម៉ារ៉ុក, កាប់វែរ, កូតឌីវ័រ, សេណេហ្គាល់, អាហ្វ្រិកខាងត្បូង និងសាធារណរដ្ឋប្រជាធិបតេយ្យកុងហ្គោ
-Concacaf (អាមេរិកខាងជើង កណ្តាល និងការ៉ាប៊ីន) ៦ ក្រុម ៖ សហម្ចាស់ផ្ទះសហរដ្ឋអាមេរិក កាណាដា និង ម៉ិកស៊ិក ព្រមទាំង គូរ៉ាសៅ, ហៃទី និងប៉ាណាម៉ា
-អូសេអានី ១ ក្រុម ៖ នូវែលហ្សេឡង់។
គួរបញ្ជាក់ថា នៅក្នុងចំណោមនោះ ហ្ស៊កដានី អ៊ូសបេគីស្ថាន កាប់វែរ និង គូរ៉ាសៅ គឺជាការបង្ហាញវត្តមានលើកដំបូងបំផុត សម្រាប់ការប្រកួតជុំចុងក្រោយពានរង្វាន់ FIFA World Cup៕ ប្រភព ៖ Sky Sports
ចែករំលែកព័តមាននេះ