ទីក្រុងដាវ៉ូស៖ លោកដូណាល់ត្រាំថ្លែងថាទ្វីបអឺរ៉ុបមិនមែនកំពុងដើរនៅលើផ្លូវត្រឹមត្រូវទេ។ លោកកោតសរសើរការសម្រេចបានកំណើនសេដ្ឋកិច្ចដ៏ខ្ពស់របស់អាមេរិកដែលប្រទេសដទៃមិនអាចធ្វើបាន។ លោកថ្លែងថាបណ្ដាថ្នាក់ដឹកនាំប្រទេសជាមិត្តបានអញ្ជើញមកចូលរួមវេទិកាសេដ្ឋកិច្ចពិភពលោកនៅទីក្រុងដាវ៉ូសច្រើនណាស់ ដូច្នេះលោកមិនចង់និយាយរិះគន់នរណាម្នាក់ទេ។
ត្រាំថាលោកស្រឡាញ់ចូលចិត្តទ្វីបអឺរ៉ុប ហើយលោកចង់ឃើញអឺរ៉ុបរីកចម្រើន។ ប៉ុន្តែលោកសម្លឹងឃើញថាអឺរ៉ុបឥឡូវនេះកំពុងដើរខុសទិសដៅ។ ការថ្លែងសុន្ទរកថារបស់លោកត្រាំនៅថ្ងៃនេះបន្ទាប់ពីមេដឹកនាំប្រទេសមួយចំនួនប្រកាសថ្កោលទោសលោកត្រាំដែលចង់គ្រប់គ្រងកោះហ្គ្រីនលែន។ លោកថាកំពុងស្វះស្វែងរកការចរចាគ្នាជាបន្ទាន់។
តាំពីយូរមកហើយ លោកត្រាំតែងតែប្រាថ្នាចង់បានតំបន់អាកទិចធ្វើជាទឹកដីអាមេរិក។ កាលពីមុននេះ លោកប្រកាសថាផែនការគ្រប់គ្រងកោះហ្គ្រីនលែនមិនអាចប្រែក្រឡាស់វិញជាដាច់ខាត។ ឥឡូវនេះ បណ្ដាប្រទេសនៅអឺរ៉ុបមិនទាន់គិតយ៉ាងណាទេ។ ប៉ុន្តែគេដឹងថាប្រទេសយ៉ាងតិច៨ចេញមុខប្រឆាំងនឹងផែនការរបស់លោកត្រាំ និងរួបរួមគ្នាជាមួយហ្គ្រីនលែន និងដាណឺម៉ាក។ ប៉ុន្តែពួកគេក៏ប្រឈមនឹងការដំឡើងពន្ធគយដ៏ខ្ពស់ផងដែរ។
ដោយសារតែលោកត្រាំចង់បានកោះហ្គ្រីនលែនខ្លាំងពេកប្រកបដោយអត្តចរិតបែបបង្គាប់បង្ខំថែមទៀតនោះធ្វើឱ្យកើតមានទំនាស់រវាងប្រទេសជាប់មហាសមុទ្រអាត្លង់ទិចអឺរ៉ុប និងអាមេរិក។ ប្រធានាធិបតីបារាំង លោកម៉ាក្រុងប្រមើលឃើញថាពិភពលោកនេះយូរៗទៅលែងមានច្បាប់ទម្លាប់អ្វីទាំងអស់។ លោកក៏រិះគន់ទង្វើរបស់មេដឹកនាំខ្លះដែលលោកមិនបញ្ចេញឈ្មោះទេចូលចិត្តដើរសម្លុតគេ។
នាយករដ្ឋមន្ត្រីកាណាដា លោកម៉ាកខានី (Mark Carney) ដែលចូលរួមវេទិកាសេដ្ឋកិច្ចនោះដែរថ្លែងថាសណ្ដាប់ធ្នាប់ពិភពលោកដែលធ្លាប់មានកាលពីមុននោះនឹងមិនវិលត្រឡប់មកវិញទេ។ ដូច្នេះបើយើងនៅតែស្ដាយស្រណោះវាទៀតមិនមែនជាយុទ្ធសាស្ត្រទេ។ លោកថ្លែងថាសណ្ដាប់ពិភពលោកថ្មីជាការពង្រីកសមរភូមិប្រកួតប្រជែងគ្នានៅក្នុងចំណោមប្រទេសជាគូបដិបក្សនឹងគ្នា។ ក្រុមប្រទេសដែលមានអំណាចខ្លាំងជាងគេស្វែងរកផលប្រយោជន៍សម្រាប់ជាតិរបស់ខ្លួនដោយប្រើយុទ្ធសាស្ត្របង្ខិតបង្ខំផ្នែកសេដ្ឋកិច្ច៕ ប្រភព៖ ស៊ីអឹនប៊ីស៊ី (CNBC)
ចែករំលែកព័តមាននេះ