បេកាំង ៖ យោងតាមភ្នាក់ងារសារព័ត៌មាន Channel News Asia កាលពីថ្ងៃអាទិត្យកន្លងមកបានឲ្យដឹងថា ប្រធានធនាគារជាតិប្រទេសចិនបាននិយាយថាប្រទេសចិនបានខិតខំប្រឹងប្រែងយ៉ាងខ្លាំងក្នុងការគាំទ្រដល់រូបិយវត្ថុរបស់ខ្លួន ហើយពួកគេនឹងមិនទម្លាក់តម្លៃរូបិយវត្ថុនេះដើម្បីបង្កើនការនាំចេញឬដោះស្រាយបញ្ហាជម្លោះពាណិជ្ជកម្មឡើយ ។…
បេកាំង ៖ យោងតាមភ្នាក់ងារសារព័ត៌មាន Channel News Asia កាលពីថ្ងៃអាទិត្យកន្លងមកបានឲ្យដឹងថា ប្រធានធនាគារជាតិប្រទេសចិនបាននិយាយថាប្រទេសចិនបានខិតខំប្រឹងប្រែងយ៉ាងខ្លាំងក្នុងការគាំទ្រដល់រូបិយវត្ថុរបស់ខ្លួន ហើយពួកគេនឹងមិនទម្លាក់តម្លៃរូបិយវត្ថុនេះដើម្បីបង្កើនការនាំចេញឬដោះស្រាយបញ្ហាជម្លោះពាណិជ្ជកម្មឡើយ ។
លោក Yi Gang បាននិយាយថា សហរដ្ឋអាមេរិក និងប្រទេសចិនបានពិភាក្សាពីអត្រាប្តូរប្រាក់ក្នុងកិច្ចប្រជុំលើការធ្វើពាណិជ្ជកម្មក្នុងពេលថ្មីៗនេះ ហើយបានព្រមព្រៀងគ្នាលើបញ្ហាសំខាន់ៗជាដើម ។
ជាយូរមកហើយ លោកប្រធានាធិបតី ដូណាល់ ត្រាំ (Donald Trump) បានចោទប្រកាន់ថាប្រទេសចិនទម្លាក់តម្លៃរូបិយវត្ថុរបស់ខ្លួនដើម្បីទទួលបានអត្ថប្រយោជន៍ពាណិជ្ជកម្ម ហើយសហរដ្ឋអាមេរិកបានទាមទារការធានាពីប្រទេសចិនលើអត្រាប្តូរប្រាក់ផងដែរក្នុងកិច្ចចរចាពាណិជ្ជកម្មរវាងប្រទេសទាំងពីរ ។
លោក Yi បាននិយាយថា «ឲ្យខ្ញុំបញ្ជាក់ឥលូវនេះថាពួកយើងនឹងមិនប្រើអត្រាប្តូរប្រាក់ដើម្បីការប្រកួតប្រជែងទេ ហើយពួកយើងនឹងមិនប្រើអត្រាប្តូរប្រាក់ដើម្បីបង្កើនការនាំចេញរបស់ប្រទេសចិន ឬជាឧបករណ៍ក្នុងការដោះស្រាយជម្លោះពាណិជ្ជកម្មឡើយ»។
លោកបានបន្តថា «ការខិតខំប្រឹងប្រែង និងការសម្រេចរបស់ប្រទេសចិនក្នុងការរក្សាលំនឹងភាពនៃអត្រាប្តូរប្រាក់រូបិយវត្ថុខ្លួនក្នុងកម្រិតសមរម្យត្រូវបានទទួលស្គាល់ដោយប្រទេសទូទាំងពិភពលោក»។
លោកបានបន្ថែមទៀតថា ក្នុងកំឡុងពេល៣ទៅ៤ឆ្នាំមកនេះ អត្រាប្តូរប្រាក់បានធ្លាក់ក្រោមសម្ពាធទីផ្សារដែលបង្កឲ្យតម្លៃធ្លាក់ចុះ ហើយប្រទេសចិនបានប្រើថវិកាប្រមាណ១ទ្រីលានដុល្លារផងដែរដើម្បីធ្វើឲ្យតម្លៃរូបិយវត្ថុខ្លួនមានលំនឹងវិញ។
ជាមួយគ្នានេះផងដែរ លោក Wang Shouwen ដែលជាអនុរដ្ឋមន្ត្រីពាណិជ្ជកម្មរបស់ប្រទេសចិនបាននិយាយកាលពីថ្ងៃសៅរ៍មកថា ប្រទេសចិនសង្ឃឹមខ្ពស់លើការចរចាពាណិជ្ជកម្មដំណាក់កាលបន្ទាប់ជាមួយនឹងសហរដ្ឋអាមេរិក ៕
ចែករំលែកព័តមាននេះ