ប្រទេសវៀតណាម ះ ប្រទេសវៀតណាមកាលពីថ្ងៃទី១២មីនា បានស្នើដល់ម៉ាឡេសីុ ឲ្យដោះលែងនារីជនជាតិខ្លួនដែលទទួលការចោទប្រកាន់ពីបទធ្វើឃាត លោកគីមជុងណាមបងប្រុសម្ដាយទីទៃ របស់មេដឹកនាំកូរ៉េខាងជើង លោកគីមជុងអ៊ុន នៅទីក្រុងគូឡាឡាំពួរ។ សំណើនេះធ្វើឡើងក្រោយការដោះលែងពុំមានការគ្រោងទុក នារីជាប់ចោទជាមួយគ្នាជាជនជាតិឥណ្ឌូណេសីុ។
នាងDOAN THI HUONG នៅជាជនជាប់ចោទតែម្នាក់គត់ពីបទចូលរួមក្នុងការធ្វើឃាតលោកគីមជុងណាម នៅព្រលានយន្តហោះក្រុងគូឡាឡាំពួរ កាលពីខែកុម្ភៈឆ្នាំ២០១៧ដោយជះសារធាតុពុលខ្លាំងមួយប្រភេទដាក់មុខលោក។ កាលពីថ្ងៃទី១១មីនា នារីឥណ្ឌូណេសីុដែលទទួលការចោទប្រកាន់ថា ចូលរួមក្នុងការធ្វើឃាតនេះដែរ នាងSATI AISYAH ត្រូវបានតុលាការម៉ាឡេសីុដោះលែង។ អយ្យការបានបោះបង់ចោលការកាត់់ទោសនាងពីបទធ្វើឃាតលោកគីមជុងណាម ក្រោយចាប់ផ្ដើមសវនាការកាត់ទោស។
បើតាមសារព័ត៌មានផ្លូវការវៀតណាមថា កាលពីថ្ងៃទី១២មីនារដ្ឋមន្ត្រីការបរទេសវៀតណាម លោកPHAM BINH MINH បានអំពាវនាវ ដល់សមភាគីម៉ាឡេសីុដើម្បីឲ្យនារីជនជាតិលោកទទួលបានការដោះលែងដែរ។ នាងDOAN THI HUONGកាលពីថ្ងៃទី៧មីនា ត្រូវបានគេនាំមកកាន់តុលាការក្រុងគូឡាឡាំពួរ ក្រោយពីបណ្ដាមេធាវីនាង បានស្នើដល់រដ្ឋអាជ្ញាឲ្យលុបចោលការចោទប្រកាន់នាងពីបទសម្លាប់មនុស្ស។
សវនាការកាត់ទោសនារីជាប់ចោទទាំង២នាក់នោះ ដែលមានអាយុជាង២០ឆ្នាំដូចគ្នា ត្រូវបានបើកធ្វើពីខែតុលាឆ្នាំ២០១៧មក ហើយបានដំណើរការបន្តទៀត នាថ្ងៃទី១១មីនាក្រោយការផ្អាកជាច្រើនខែតាមរយៈការសាកសួរសាក្សីរបស់នារីវៀតណាមដែលជាប់ចោទ។ ទាំងនារីវៀតណាមទាំងនារីឥណ្ឌូណេសីុ សុទ្ធតែបដិសេធ ការចោទប្រកាន់ប្រឆាំងពួកនាង ដោយអះអាងថាពួកនាងត្រូវចាញ់បោកពួកភ្នាក់ងារកូរ៉េខាងជើង ដែលស្នើ់ពួកនាងចូលរួមក្នុងល្បែងវីដេអូមួយ។ កូរ៉េខាងត្បូងបានចោទប្រកាន់កូរ៉េខាងជើងថា ជាអ្នករៀបចំការធ្វើឃាតនោះ តែក្រុងព្យុងយ៉ាងបានបដិសេធជានិច្ច។ លោកគីមជុងណាមជាអ្នកប្រឆាំងមួយរូបចំពោះរបបក្រុងព្យុងយ៉ាងហើយរស់នៅនិរទេសឯក្រៅប្រទេស៕
ចែករំលែកព័តមាននេះ