ទីក្រុងតេអេរ៉ង់៖ ថ្មីៗនេះប្រទេសអ៊ីរ៉ង់ចេញសេចក្ដីព្រមានទៅបារាំង និងអង់គ្លេសដែលចង់បញ្ជូននាវាចម្បាំងទៅក្បែរច្រកហ័រម៉ូស។ ឧបនាយករដ្ឋមន្ត្រីអ៊ីរ៉ង់ លោកកាសឹម ការីបាបាឌី (Kazem Gharibabadi) ថ្លែងថាប្រទេសទាំងនោះបើហ៊ានធ្វើដូច្នេះមែននឹងត្រូវទទួលរងការឆ្លើយតបជាបន្ទាន់ និងយ៉ាងម៉ឺងម៉ាត់បំផុត។…
ទីក្រុងតេអេរ៉ង់៖ ថ្មីៗនេះប្រទេសអ៊ីរ៉ង់ចេញសេចក្ដីព្រមានទៅបារាំង និងអង់គ្លេសដែលចង់បញ្ជូននាវាចម្បាំងទៅក្បែរច្រកហ័រម៉ូស។ ឧបនាយករដ្ឋមន្ត្រីអ៊ីរ៉ង់ លោកកាសឹម ការីបាបាឌី (Kazem Gharibabadi) ថ្លែងថាប្រទេសទាំងនោះបើហ៊ានធ្វើដូច្នេះមែននឹងត្រូវទទួលរងការឆ្លើយតបជាបន្ទាន់ និងយ៉ាងម៉ឺងម៉ាត់បំផុត។ លោកបានបង្ហោះសារនៅលើបណ្ដាញអ៊ិចថាច្រកសមុទ្រហ័រម៉ូសមិនមែនជារបស់ប្រទេសដទៃក្រៅពីតំបន់មជ្ឈិមបូព៌ានោះទេ។ នេះជាច្រកផ្លូវទឹកដ៏សំខាន់ភ្ជាប់ទៅរដ្ឋជាច្រើននៅតាមដែនសមុទ្រ។ អ៊ីរ៉ង់មានសិទ្ធិអធិបតេយ្យលើច្រកសមុទ្រនេះ ហើយនិងមានសិទ្ធិចាត់ចែងច្រកនេះក្នុងនាមជារដ្ឋជាប់មាត់សមុទ្រ។
លោកសរសេររៀបរាប់បន្តទៀតថាយើងសូមក្រើនរំលឹកពួកគេមិនថានៅក្នុងពេលមានសង្គ្រាម ឬពេលមានសន្តិភាពទេ មានតែអ៊ីរ៉ង់មួយគត់ដែលអាចបង្កើតប្រព័ន្ធសន្តិសុខនៅក្នុងច្រកសមុទ្រនេះ ហើយអ៊ីរ៉ង់នឹងមិនអនុញ្ញាតឱ្យប្រទេសណាមួយជ្រៀតជ្រែកនៅក្នុងកិច្ចការនេះជាដាច់ខាត។ អ៊ីរ៉ង់សូមសង្កត់ធ្ងន់ថាវត្តមាននៃនាវាចម្បាំងរបស់បារាំង និងអង់គ្លេស ឬនាវារបស់ប្រទេសដទៃទៀតដែលចូលរួមប្រព្រឹត្តអំពើខុសច្បាប់ជាមួយអាមេរិកនៅច្រកហ័រម៉ូសនឹងត្រូវទទួលរងការឆ្លើយតបយ៉ាងម៉ឺងម៉ាត់ពីសំណាក់យោធាអ៊ីរ៉ង់។
លោកការីបាបាឌីប្រកាសថាការដាក់ពង្រាយនាវាពិឃាតរបស់ប្រទេសដទៃក្រៅពីតំបន់មជ្ឈិមបូព៌ានៅច្រកសមុទ្រហ័រម៉ូសក្រោមលេសថាដើម្បីការពារនាវាដឹកទំនិញនោះគ្មានអ្វីក្រៅពីការចង់បង្កបញ្ហា, ចង់ធ្វើយុទ្ធោបនីយកម្មនៅលើច្រកផ្លូវទឹកដ៏សំខាន់មួយនេះ និងចង់ប៉ុនប៉ងបិទបាំងឫសគល់ពិតប្រាកដនៃបញ្ហាអសន្តិសុខនៅក្នុងតំបន់នោះឡើយ។ លោកថាបញ្ហាសន្តិសុខលំហសមុទ្រមិនអាចធានាបានតាមរយៈការដាក់ពង្រាយកម្លាំងយោធានោះទេ។
ការថ្លែងដូចខាងលើនេះបន្ទាប់ពីអង់គ្លេស និងបារាំងប្រកាសអំពីផែនការបញ្ជូននាវាចម្បាំងរបស់ខ្លួនទៅក្បែរច្រកហ័រម៉ូសដោយចាត់ទុកជាផ្នែកមួយនៃកិច្ចខិតិខំប្រឹងប្រែងជាពហុជាតិដើម្បីអមដំណើរកប៉ាល់ដឹកទំនិញឆ្លងកាត់ច្រកនេះ។ ប៉ុន្តែច្រកនេះនៅតែបិទជិតឈឹងដដែល។ មានតែកប៉ាល់តិចតួចជាទីបំផុតដែលអាចបើកកាត់ទីនេះដោយសុវត្ថិភាព។ ឧទាហរណ៍ កប៉ាល់ដឹកហ្គាសមួយគ្រឿងរបស់ប្រទេសកាតាទើបតែបើកកាត់ច្រកនេះសំដៅទៅប្រទេសប៉ាគីស្ថានដោយមានការយល់ព្រមពីអ៊ីរ៉ង់៕ ប្រភព៖ ញូស្វីក (Newsweek) និងប្រភពដទៃទៀត
ចែករំលែកព័តមាននេះ