ទីក្រុងវ៉ាស៊ីនតោន៖ លោកដូណាល់ត្រាំប្រកាសមិនទទួលយកជាដាច់ខាតនូវអ្វីដែលអ៊ីរ៉ង់ឆ្លើយតបចំពោះផែនការសន្តិភាព១៤ចំណុចរបស់លោក។ បញ្ហានេះធ្វើឱ្យប្រេងឆៅតាមហាងឆេងអន្តរជាតិធំៗហក់ឡើងខ្ពស់បន្ថែមទៀត។ ជាច្រើនថ្ងៃបន្ទាប់ពីអាមេរិកបញ្ជូនសំណើទៅឱ្យអ៊ីរ៉ង់ពិនិត្យមើលដោយសង្ឃឹមថានឹងបើកការចរចាគ្នាសាជាថ្មី អ៊ីរ៉ង់កាលពីយប់មិញបានចេញសេចក្ដីប្រកាសជាលក្ខណៈឆ្លើយតបដោយផ្ដោតសំខាន់ទៅលើការបិទបញ្ចប់សង្គ្រាមនៅគ្រប់ទីកន្លែងទាំងអស់ទើបខ្លួនសុខចិត្ត។ អ៊ីរ៉ង់ក៏ទាមទារឱ្យអ៊ីស្រាអែលបញ្ចប់សង្គ្រាមនៅប្រទេសលីបង់ផងដែរ។
អ៊ីរ៉ង់ទាមទារឱ្យអាមេរិកផ្ដល់ប្រាក់សំណងចំពោះការខូចខាតដោយសារសង្គ្រាម។ អ៊ីរ៉ង់សង្កត់ធ្ងន់ថាខ្លួនត្រូវតែមានសិទ្ធិអធិបតេយ្យដើម្បីគ្រប់គ្រងច្រកសមុទ្រហ័រម៉ូស។ នេះបើយោងតាមការផ្សាយរបស់ទូរទស្សន៍រដ្ឋអ៊ីរ៉ង់។ អ៊ីរ៉ង់បានទាមទារលក្ខខណ្ឌជាច្រើនទៀតដូចជា៖ អាមេរិកត្រូវលុបចោលការបិទខ្ទប់ដែនសមុទ្ររបស់ខ្លួន ត្រូវធានាថាគ្មានការវាយប្រហារជាថ្មីនាពេលអនាគត ត្រូវលុបចោលការដាក់ទណ្ឌកម្មសេដ្ឋកិច្ច ហើយត្រូវអនុញ្ញាតឱ្យអ៊ីរ៉ង់លក់ប្រេងទៅកាន់ទីផ្សារអន្តរជាតិដូចធម្មតាឡើងវិញ។ នេះបើយោងតាមការផ្សាយរបស់ទីភ្នាក់ព័ត៌មានអ៊ីរ៉ង់ថាស់នីម (Tasnim)។
ក្រោយសេចក្ដីប្រកាសរបស់អ៊ីរ៉ង់ត្រឹមតែប៉ុន្មានម៉ោងប៉ុណ្ណោះ លោកដូណាល់ត្រាំក៏បង្ហោះសារនៅលើបណ្ដាញសង្គមច្រានចោលការទាមទាររបស់អ៊ីរ៉ង់។ លោកសរសេរថាលោកមិនចូលចិត្តលក្ខខណ្ឌទាំងនេះទាល់តែសោះព្រោះជាលក្ខខណ្ឌដែលមិនអាចទទួលយកបានជាដាច់ខាត។ លោកសរសេរដោយខ្លីតែត្រឹមនេះដោយមិនផ្ដល់សេចក្ដីពន្យល់លម្អិតទេ។ អាមេរិកបានស្នើសុំបិទបញ្ចប់ការប្រយុទ្ធគ្នាជាមុនសិន មុននឹងឈានដល់ការជជែកគ្នាអំពីបញ្ហាសំខាន់ៗរួមទាំងកម្មវិធីនុយក្លេអ៊ែររបស់អ៊ីរ៉ង់ផងដែរ។
ថ្ងៃនេះ ប្រេងឆៅឡើងថ្លៃ៣ដុល្លារក្នុងមួយបារ៉ែលបន្ទាប់ពីទទួលដំណឹងដូចខាងលើ។ លទ្ធផលស្ទង់មតិបង្ហាញថាសង្គ្រាមនេះមិនទទួលការគាំទ្រពីក្នុងចំណោមប្រជាជនអាមេរិកដែលជាម្ចាស់ឆ្នោតទេ។ ពួកគេត្រូវបង់ថ្លៃសាំងកាន់តែច្រើន។ ដូច្នេះ ការបោះឆ្នោតពាក់កណ្ដាលអាណត្តិនារយៈពេល៦ខែខាងមុខនេះមិនដឹងថាយ៉ាងណាទេ។ ស្រួលមិនស្រួលគណបក្សសាធារណរដ្ឋរបស់លោកដូណាល់ត្រាំអាចនឹងបាត់បង់សំឡេងភាគច្រើនដាច់ខាតនៅក្នុងសភាក៏អាចថាបាន៕ ប្រភព៖ រ៉យទ័រ និងប្រភពដទៃទៀត
ចែករំលែកព័តមាននេះ