ទីក្រុងកៀវ៖ ប្រជាជនអ៊ុយក្រែនរស់នៅទីក្រុងកៀវប្រញាប់ស្វែងរកកន្លែងលាក់ខ្លួនជាបន្ទាន់នៅពេលដ្រូនរបស់រុស្ស៊ីហោះប្រសាចពេញមេឃទៅវាយប្រហារទីក្រុងនេះជាថ្មីបន្ទាប់ពីបទឈប់បាញ់រយៈពេលបីថ្ងៃបានផុតសុពលភាព។ ភាពស្ងប់ស្ងាត់បានតែមួយរយៈពេលខ្លីបានផុតរលត់ទៅវិញកាលពីយប់ឆ្លងចូលព្រឹកថ្ងៃអង្គារនេះនៅពេលរុស្ស៊ីបញ្ជូនដ្រូនទាំងហ្វូងៗទៅវាយប្រហារ។ ដូច្នេះ អរិភាពរវាងប្រទេសទាំង២ក៏ចាប់ផ្ដើមកើតឡើងជាថ្មី។
គណៈបញ្ជាការកងទ័ពប្រចាំតំបន់បានរាយការណ៍ថាគេស្ដាប់ឮសំឡេងផ្ទុះលាន់ឮនៅទីតាំងជាច្រើនទូទាំងរដ្ឋធានីកៀវ និងតំបន់ជាយក្រុង។ ប្រព័ន្ធការពារដែនអាកាសរបស់អ៊ុយក្រែនក៏ខិតខំតាមស្ទាក់ចាប់គោលដៅដែលហោះទៅវាយប្រហារផងដែរ។ មេបញ្ជាការយោធាប្រចាំទីក្រុងកៀវបង្ហោះសារនៅលើតេឡេក្រាមថា «ដ្រូនរបស់ពួកសត្រូវកំពុងហោះហើរឆ្វែលឆ្វាត់ពាសពេញផ្ទៃអាកាសទីក្រុងកៀវ។ ដូច្នេះសូមបងប្អូនប្រជាពលរដ្ឋស្នាក់នៅទីកន្លែងសុវត្ថិភាពរហូតដល់ស៊ីរ៉ែនប្រកាសអាសន្នត្រូវបានបញ្ឈប់»។
របាយការណ៍បឋមបង្ហាញថាការវាយប្រហារនោះចូលរួមដោយដ្រូនអត្តឃាតម៉ាកសាហ៊ីត។ អាជ្ញាធរកំពុងវាយតម្លៃទំហំនៃការខូចខាតដោយសារការវាយប្រហារលើកនេះ។ ទីភ្នាក់ងារជួយសង្គ្រោះក៏កំពុងចុះទៅកន្លែងកើតហេតុផងដែរ។ ប៉ុន្តែគ្មានសេចក្ដីរាយការណ៍អំពីការស្លាប់ ឬរបួសមនុស្សនៅឡើយទេ។ បទឈប់បាញ់រយៈពេលបីថ្ងៃដែលទុកពេលឱ្យមានការដឹកជំនួយមនុស្សធម៌ និងការដូរឈ្លើយសឹកគ្នានោះបានផុតសុពលភាពត្រឹមពាក់កណ្ដាលអធ្រាត្រថ្ងៃចន្ទ។
ការវាយប្រហារលើកនេះបង្ហាញថារុស្ស៊ីបានរៀបចំយុទ្ធនាការជើងអាកាសទុកជាស្រេច។ បន់ឱ្យតែផុតសុពលភាពបទឈប់បាញ់កាលណានឹងអាលចាត់វិធានការភ្លាម។ ក្រុមអ្នកវិភាគយោធាយល់ថាការវាយប្រហារនេះជាការធ្វើតេស្តសមត្ថភាពរបស់អ៊ុយក្រែនដើម្បីចង់ដឹងថាតើប្រព័ន្ធការពារដែនអាកាសអ៊ុយក្រែនត្រៀមលក្ខណៈសម្បត្តិកម្រិតណាបន្ទាប់ពីមានបទឈប់បាញ់។ ជនជាតិអ៊ុយក្រែនម្នាក់រស់នៅទីក្រុងកៀវប្រាប់ថាការបន្លឺសំឡេងស៊ីរ៉ែនប្រកាសអាសន្ន និងសំឡេងផ្ទុះគ្រាប់កាំភ្លើងយ៉ាងកងរំពងនោះជាការរំលឹកថាសង្គ្រាមពោរពេញភាពឃោរឃៅដែលយើងជួបប្រទះនាពេលបច្ចុប្បន្ន៕ ប្រភព៖ អារ៉ាប់ញូស៍ (Arab News) និងប្រភពដទៃទៀត
ចែករំលែកព័តមាននេះ