អន្តរជាតិ ៖ ការបដិសេធយ៉ាងលឿនរបស់លោកប្រធានាធិបតី ដូណាល់ ត្រាំ (Donald Trump) ចំពោះការឆ្លើយតបរបស់អ៊ីរ៉ង់ ជុំវិញផែនការសន្តិភាពរបស់អាមេរិក បានធ្វើឱ្យតម្លៃប្រេងឆៅអន្តរជាតិហក់ឡើង…
អន្តរជាតិ ៖ ការបដិសេធយ៉ាងលឿនរបស់លោកប្រធានាធិបតី ដូណាល់ ត្រាំ (Donald Trump) ចំពោះការឆ្លើយតបរបស់អ៊ីរ៉ង់ ជុំវិញផែនការសន្តិភាពរបស់អាមេរិក បានធ្វើឱ្យតម្លៃប្រេងឆៅអន្តរជាតិហក់ឡើង នៅថ្ងៃទី១១ ខែឧសភា ឆ្នាំ២០២៦ ចំពេលមានការបារម្ភថា ជម្លោះ១០សប្តាហ៍នឹងអូសបន្លាយ ដែលធ្វើឱ្យការដឹកជញ្ជូនឆ្លងកាត់ច្រកសមុទ្រហ័រមូស (Hormuz) ជាប់គាំងបន្តទៀត។ នេះបើតាមប្រភពពី Reuters បានចេញផ្សាយ។
ប៉ុន្មានថ្ងៃបន្ទាប់ពីអាមេរិកដាក់សំណើមួយដោយសង្ឃឹមថា នឹងបើកការចរចាឡើងវិញនោះ អ៊ីរ៉ង់កាលពីអាទិត្យបានចេញផ្សាយការឆ្លើយតបដែលផ្តោតលើការបញ្ចប់សង្គ្រាមនៅគ្រប់ទិសទី ជាពិសេសប្រទេសលីបង់ ដែលសម្ព័ន្ធមិត្តអាមេរិក គឺអ៊ីស្រាអែល កំពុងប្រយុទ្ធជាមួយពួកសកម្មប្រយុទ្ធហេសបូឡា (Hezbollah) ដែលគាំទ្រដោយអ៊ីរ៉ង់។
ទូរទស្សន៍រដ្ឋអ៊ីរ៉ង់ផ្សាយថា ទីក្រុងតេអេរ៉ង់ក៏បានរួមបញ្ចូលការទាមទារសំណងសម្រាប់ការខូចខាតដោយសារសង្គ្រាម និងបានសង្កត់ធ្ងន់លើអធិបតេយ្យភាពរបស់អ៊ីរ៉ង់លើច្រក ហ័រមូស ក៏ជាអំពាវនាវឱ្យអាមេរិកបញ្ចប់ការបិទផ្លូវកងទ័ពជើងទឹករបស់ខ្លួន ធានាថា មិនមានការវាយប្រហារបន្ថែមទៀត ក៏ដូចជាទណ្ឌកម្ម និងបញ្ចប់ការហាមឃាត់របស់លើការលក់ប្រេងរបស់អ៊ីរ៉ង់។
ក្នុងរយៈពេលប៉ុន្មានម៉ោងក្រោយមក លោក ត្រាំ បានច្រានចោលសំណើអ៊ីរ៉ង់ ជាមួយនឹងការបង្ហោះលើបណ្តាញសង្គម Truth Social ដោយមិនបានផ្តល់ព័ត៌មានលម្អិតបន្ថែមដូច្នេះថា «ខ្ញុំមិនចូលចិត្តវាទេ មិនអាចទទួលយកបានទាំងស្រុង»។ ដ្បិតសហរដ្ឋអាមេរិកបានស្នើឱ្យបញ្ចប់ការប្រយុទ្ធគ្នា មុនពេលចាប់ផ្តើមការចរចាលើបញ្ហាចម្រូងចម្រាសជាច្រើន រួមទាំងកម្មវិធីនុយក្លេអ៊ែររបស់អ៊ីរ៉ង់ផងដែរ។
ក្រឡេកទៅមើលតម្លៃប្រេងឆៅ Brent ដែលជាស្តង់ដាពិភពលោកបានកើនឡើង ៤,០៤ ដុល្លារអាមេរិក ឬ ៣,៩៩% ដល់តម្លៃ ១០៥,៣៣ ដុល្លារក្នុង១បារ៉ែល គិតត្រឹមម៉ោង ១:១៤ នាទីរសៀល (ម៉ោងនៅកម្ពុជា)។ រីឯប្រេងឆៅស្តង់សហរដ្ឋដាអាមេរិក (WTI) មានតម្លៃ ៩៩,៨៥ ដុល្លារក្នុង១បារ៉ែល កើនឡើង ៤,៤៣ ដុល្លារ ឬ ៤,៦៤%។
លោកស្រី Priyanka Sachdeva អ្នកវិភាគទីផ្សារជាន់ខ្ពស់នៅក្រុមហ៊ុន Phillip Nova បាននិយាយថា តម្លៃប្រេងឆៅមិនសូវផ្អែកលើតម្រូវការ ឬការផ្គត់ផ្គង់ជាក់ស្តែងប៉ុន្មាននោះទេ ប៉ុន្តែបែរជាហក់ឡើង ឬចុះយ៉ាងគំហុក ទៅតាមពាក្យសម្តី ការបដិសេធ ឬការព្រមានដែលចេញមកពីសហរដ្ឋអាមេរិក និងអ៊ីរ៉ង់៕
ចែករំលែកព័តមាននេះ