ខេត្តមណ្ឌលគិរី ៖ ខណៈដែលតម្រូវការកសិផលធម្មជាតិនៅក្នុងស្រុកកំពុងមានការកើនឡើងខ្លាំង ចំការល្ហុងពួជហូលេនដ៏ធំមួយស្ថិតក្នុងស្រុកពេជ្រាដា បានបំពេញតម្រូវការទីផ្សាររាជធានីភ្នំពេញ និងផ្សារទំនើបធំៗមួយចំនួន ។ លោក ម៉ុយ រ៉ាដូ…
ខេត្តមណ្ឌលគិរី ៖ ខណៈដែលតម្រូវការកសិផលធម្មជាតិនៅក្នុងស្រុកកំពុងមានការកើនឡើងខ្លាំង ចំការល្ហុងពួជហូលេនដ៏ធំមួយស្ថិតក្នុងស្រុកពេជ្រាដា បានបំពេញតម្រូវការទីផ្សាររាជធានីភ្នំពេញ និងផ្សារទំនើបធំៗមួយចំនួន ។ លោក ម៉ុយ រ៉ាដូ ម្ចាស់ចំការ ដែលបានយកចិត្តទុកដាក់លើគុណភាពជាចម្បង បានបង្ហាញឱ្យឃើញថា កសិផលខ្មែរពិតជាមានសមត្ថភាពខ្ពស់ក្នុងការប្រកួតប្រជែង បើទោះបីជាត្រូវឆ្លងកាត់ឧបសគ្គផ្នែកបច្ចេកទេស និងថ្លៃដើមយ៉ាងណាក៏ដោយ។»
លោក ម៉ុយ រ៉ាដូ បានរៀបរាប់ថា ចំការរបស់លោកបច្ចុប្បន្នមានដើមល្ហុងហូលេនសរុបប្រមាណ ៦,០០០ដើម។ លក្ខណៈពិសេសនៃល្ហុងប្រភេទនេះ គឺប្រើរយៈពេលត្រឹមតែ ៨ខែប៉ុណ្ណោះ គិតចាប់ពីថ្ងៃដាំដុះ រហូតដល់អាចប្រមូលផលបាន។ ដោយសារគុណភាព និងរសជាតិផ្អែមឆ្ងាញ់ប្លែកពីល្ហុងតំបន់ផ្សេង ល្ហុងហូលេនក្នុងចំការរបស់លោក ត្រូវបានទទួលស្គាល់ ជាផលិតផលក្នុងយុទ្ធនាការ «ភូមិមួយ ផលិតផលមួយ» ដែលជាមោទនភាពសម្រាប់ស្រុកពេជ្រាដាទាំងមូល។
ទាក់ទងនឹងទិន្នផល លោកបានបញ្ជាក់ថា បើទោះបីជាបច្ចុប្បន្នការផ្ដល់ផលទើបតែសម្រេចបានប្រមាណ ៣០ភាគរយនៃផ្ទៃដីសរុបក៏ដោយ ប៉ុន្តែលោកអាចបេះល្ហុងលក់បានក្នុងចន្លោះពី ១តោន ទៅ១តោនកន្លះ ក្នុងមួយថ្ងៃ (បេះមួយថ្ងៃខានមួយថ្ងៃ) ។
បញ្ហាទីផ្សារដែលកសិករភាគច្រើនធ្លាប់ព្រួយបារម្ភ ហាក់មិនមែនជាឧបសគ្គសម្រាប់លោក ម៉ុយ រ៉ាដូ ឡើយ។ លោកមានយុទ្ធសាស្ត្រទីផ្សារល្អ តាមរយៈការផ្គត់ផ្គង់ដោយផ្ទាល់ទៅកាន់រាជធានីភ្នំពេញ ។ លោកមានប្អូនស្រីឈ្មោះ ម៉ុយ វលក្ខណ៍ ដែលជាម្ចាស់ហាង «ពិភពបន្លែផ្លែឈើ» ចំនួន ៥សាខានៅភ្នំពេញ ចាំទទួលទិញបោះដុំ និងចែកចាយបន្ត ដោយទទួលបានថ្លៃចាប់ពីប្រាំពាន់រៀល ទៅប្រាំមួយពាន់រៀល ក្នុងមួយគីឡូក្រាម ។ ហើយមានការបញ្ជាទិញយ៉ាងច្រើនពីសំណាក់អាជីវករក្នុងក្រុងសែនមនោរម្យ អាជីវករមកពីខេត្តក្រចេះ និងផ្សារទំនើបមួយចំនួន ។លោកបានអះអាងថា តម្រូវការបច្ចុប្បន្នគឺលើសពីសមត្ថភាពផ្គត់ផ្គង់ ដែលនេះជាកម្លាំងចិត្តឱ្យលោក មានផែនការពង្រីកការដាំដុះបន្ថែមចំនួន ៣,០០០ដើម (ប្រមាណ ៣ហិកតា) ក្នុងមួយឆ្នាំ។
នៅពីក្រោយជោគជ័យនេះ លោក ម៉ុយ រ៉ាដូ ក៏បានបង្ហើបពីការលំបាកលើបញ្ហាថ្លៃដើម និងបច្ចេកទេសផងដែរ។ ការដាំល្ហុងហូឡង់ទាមទារការវិនិយោគខ្ពស់លើប្រព័ន្ធទឹក ដែលក្នុងមួយហិកតាត្រូវចំណាយប្រមាណ ៦,០០០ដុល្លារ។ លោកបានបញ្ជាក់ថា កសិដ្ឋាននៅខ្វះខាតមធ្យោបាយប្រើប្រាស់ថាមពលអគ្គិសនី និងប្រព័ន្ធស្រោចស្រពឱ្យបានគ្រប់គ្រាន់។
ក្នុងនាមជាកសិករគំរូ លោកបានសំណូមពរដល់អាជ្ញាធរពាក់ព័ន្ធ មេត្តាជួយអន្តរាគមន៍លើផ្នែកអគ្គិសនី ឬជួយសម្រួលដល់ការដំឡើងអណ្តូងទឹកប្រើប្រាស់ថាមពលសូឡា ដើម្បីជួយកាត់បន្ថយចំណាយ និងពន្លឿនការដាំដុះឱ្យបានកាន់តែច្រើន ដើម្បីឆ្លើយតបតាមតម្រូវការទីផ្សារដែលកំពុងហក់ឡើងខ្លាំង។
មិនត្រឹមតែដាំល្ហុងប៉ុណ្ណោះទេ លោក ម៉ុយ រ៉ាដូ កំពុងប្រែក្លាយកសិដ្ឋាននេះឱ្យទៅជាតំបន់កសិកម្មចម្រុះ ដែលមានចិញ្ចឹមមាន់ ព្រាប និងមានផែនការចិញ្ចឹមត្រីអណ្ដែង បង្កង និងត្រីចម្រុះផ្សេងៗទៀត។ បច្ចុប្បន្ន លោកបានផ្ដល់ការងារដល់ប្រជាពលរដ្ឋក្នុងមូលដ្ឋានចំនួន ១២នាក់ (ស្រី ៦នាក់ និងប្រុស ៦នាក់) ដែលជួយកាត់បន្ថយការចំណាកស្រុកបានមួយចំណែក។
លោក រ៉ាដូ បានស្នើរដល់មហាជនថា «ខ្ញុំសូមសំណូមពរដល់ពុកម៉ែបងប្អូនទាំងអស់ សូមងាកមកគាំទ្រកសិផលក្នុងស្រុក ដើម្បីលើកទឹកចិត្តកសិករយើង ឱ្យពួកគាត់មានចំណូល និងមានលទ្ធភាពពង្រីកការដាំដុះ ដែលជាចំណែកមួយជួយទប់ស្កាត់ការចំណាកស្រុករបស់ប្រជាពលរដ្ឋខ្មែរទៅក្រៅប្រទេស»៕
ចែករំលែកព័តមាននេះ