ឆ្លងតាមការសិក្សាថ្មីមួយបានរកឃើញថា ផ្លែគីវី(Kiwi)ដែលមានរោមទន់ៗអាចនឹងបញ្ចុះកម្រិតសម្ពាធឈាម ។ ការទទួលទានផ្លែឈើប្រភេទនេះត្រឹម៣ផ្លែក្នុងមួយថ្ងៃមានអត្ថប្រយោជន៍ច្រើនជាងផ្លែប៉ោមមួយផ្លែ ។ ការរកឃើញរបស់មន្ទីរពេទ្យសាកលវិទ្យាល័យ Oslo University របស់ប្រទេសន័រវែសនេះត្រូវបានគេយកទៅធ្វើបទបង្ហាញនៅឯសម័យប្រជុំវិទ្យាសាស្ត្ររបស់សមាគមជំងឺបេះដូងអាមេរិកកាលពីពេលថ្មីៗនេះ ។
អ្នកដឹកនាំការស្រាវជ្រាវលោក Mette Svendsenនិងសហការីរបស់ខ្លួនបានពិសោធដោយកម្រមួយលើបុរស ៥០នាក់និង
ស្ត្រី៦៨នាក់ភាគច្រើននៃពួកគេគឺជាអ្នកលើសឈាម ។ រយៈពេល៨សប្តាហ៍ មនុស្សប្រុសស្រីទាំងនេះត្រូវគេឱ្យទទួលទានផ្លែគីវី៣ផ្លែ ឬផ្លែប៉ោមមួយផ្លែក្នុងមួយថ្ងៃ ។ ជាលទ្ធផលគេពិនិត្យឃើញថា អ្នកដែលទទួលទានផ្លែគីវី សម្ពាធឈាមបានថយចុះ ៣,៦mg/Hg Systolic-ជាចំនួនខ្ពស់បំផុតធៀបនឹងអ្នកទទួលទានផ្លែប៉ោមតែមួយផ្លែ ។
អ្នកនិពន្ធដែលបានឆ្លងកាត់ការសិក្សាលើកនេះបានសរសេរថា ៖ «ទទួលទានគីវី៣ផ្លែក្នុងមួយថ្ងៃគឺពិតជាផ្តល់អត្ថប្រយោជន៍ដល់សុខភាពយ៉ាងពិតប្រាកដ។ ដូច្នេះគេគួរតែរាប់បញ្ចូលគីវីទៅក្នុងរបបអាហារមួយដែលមានអត្ថប្រយោជន៍ដល់ការព្យាបាលជំងឺលើសឈាម» ។
ការទទួលទានបន្លែនិងផ្លែឈើគ្រប់ពណ៌គ្រប់ប្រភេទគឺជាវិធីដ៏ល្អមួយដើម្បីធ្វើឱ្យមានតុល្យភាពចំណីអាហារ ។ គីវីក៏ជារបបអាហារបន្ថែមដ៏មានតម្លៃមួយ ៕
ចែករំលែកព័តមាននេះ