ក្រុមអ្នកវិទ្យាសាស្ត្រជឿជាក់ថា បណ្តាស្ត្រីដែលទទួលទានអាហារសម្បូរវីតាមីន Eច្រើនអំឡុងពេលកំពុងពពោះអាចនឹងធ្វើឱ្យកូនពួកគេប្រឈមតិចតួចបំផុតនឹងជំងឺហឺតក្នុងវ័យកុមារភាព ។ ស៊ុបត្រូវគេជឿថា ជាប្រភេទសម្លដែលសម្បូរដោយវីតាមីន E ហើយវាអាចជួយកាត់បន្ថយប្រេវ៉ាឡង់ជំងឺហឺតក្នុងវ័យកុមារភាពបាន២០ភាគរយក្នុងរយៈពេល៥ឆ្នាំ ។ វីតាមីន Eបន្ថែមក្នុងស៊ុបបានមកពីប្រភពធម្មជាតិទាំងឡាយរួមមាន ប៉េងប៉ោះក្រៀម ប្រេងផ្កាឈូករ័ត្ន ពពួកសណ្តែក សណ្តែក lentils និងគ្រាប់ស្រូវសាលី(wheatgerm) ជាដើម ។
សូមបញ្ជាក់ថា ការសិក្សាលើកមុនរបស់សាកលវិទ្យាល័យ University of Aberdeenដដែលនេះបានបង្ហាញថា ស្ត្រីមានផ្ទៃពោះដែលទទួលទានអាហារមានកម្រិតវីតាមីន E ទាបនឹងធ្វើឱ្យកូនរបស់គេកើតជំងឺហឺតនៅពេលពួកគេមានអាយុបាន៥ឆ្នាំ ។ ដើម្បីធ្វើឱ្យកាន់តែច្បាស់បន្ថែមទៀត ក្រុមអ្នកស្រាវជ្រាវសាកលវិទ្យាល័យប្រទេសស្កុតឡែននឹងបង្កើតការសិក្សាថ្មីមួយទៀតដើម្បីរកឱ្យឃើញថាតើអាហារដែលសម្បូរដោយវីតាមីន Eពិតជាមានប្រសិទ្ធភាពប្រឆាំងនឹងជំងឺហឺតដូចការអះអាងខាងលើដែរឬយ៉ាងណា ។
ការសិក្សានេះនឹងត្រូវចំណាយពេល១២ខែដោយមានអ្នកចូលរួមពិសោធសរុប ៥០នាក់ ។ សាស្ត្រាចារ្យ Graham Devereux ឯកទេសខាងជំងឺផ្លូវដង្ហើមបាននិយាយថា ៖«គោលដៅចុងក្រោយនៃការស្រាវជ្រាវនេះគឺកាត់បន្ថយប្រេវ៉ាឡង់នៃជំងឺហឺតឱ្យបានដល់កម្រិតមួយដែលអាចទទួលយកបាន មានប្រសិទ្ធភាពនិងប្រើអស់ថវិកាតិច »៕
ចែករំលែកព័តមាននេះ