ខែ​កញ្ញា​ ឆ្នាំ​២០១៣​ នេះ​ ថ្ងៃ​ទី​១៣ កញ្ញា​ គឺ​ប៉ះ​ចំ​ថ្ងៃ​សុក្រ​​ ដែល​ថ្ងៃ​សុក្រ​ ទី​១៣ នោះ​មាន​ជំនឿ​ឆ្វេង​មួយ​ថា​ជាថ្ងៃ​ចង្រៃ​ ក៏​ប៉ុន្តែ​សម្រាប់​អ្នក​ខ្លះ​ថា​ ជា​ថ្ងៃ​ល្អ​ និង​ជា​ថ្ងៃ​មាន​សំណាង​ទៅវិញ​ ។​ ថ្ងៃ​សុក្រ​ ទី​១៣​ មាន​យ៉ាង​តិច​១​ឆ្នាំ​ម្តង​ ហើយ​យ៉ាង​ច្រើន​មួយ​ឆ្នាំ​៣​ដង។​

សម្រាប់​មនុស្ស​មួ​យចំនួន​ ថ្ងៃ​សុក្រ​ ទី​១៣​ មាន​ន័យ​ថា​ មាន​ព្រឹតិ្ត​ការណ៍​អាក្រក់​ និង​ប្រកប​ដោយ​គ្រោះ​ភ័យ​ដែល​ពុំ​អាច​ពន្យល់​បាន។​ ប៉ុន្តែ​សម្រាប់​អ្នក​ឯ​ទៀត​ចាត់​ទុក​ផ្ទុយ​ពី​នេះ​ថា​ជាថ្ងៃ​ល្អ​ និង​ជា​ថ្ងៃ​មាន​សំណាង​ទៅ​វិញ​ ។​តើ​ជំនឿ​រឿងថ្ងៃសុក្រ​ ទី​១៣​ អាក្រក់​មាន​ប្រភព​ពី​ណា​មក​ ?​ ថ្ងៃ​សុក្រ ទី​១៣​ មានប្រភព​ជំនឿ​ពី​បណ្តា​ប្រទេស​នៅ​ភាគ​ខាង​ជើង​ ហៅ​បណ្តា​ប្រទេស​ន័រ​ឌីក​ PAYS NORDIQUES ។​

ថ្ងៃ​សុក្រ​ខ្មៅ​សម្រាប់​ពួក​ TEMPLIERS គឺ​ខែ​តុលា ឆ្នាំ​១៣០៧​ ព្រះ​មហា​ក្សត្រ​បារាំង​ PHILIPPE LE BEL ចេញ​បញ្ជា​ឱ្យ​ពួក​អាមាត្យ​ និង​នាម៉ឺន​សព្វ​មុខ​មន្ត្រី​ចូល​គាល់​ថ្ងៃ​សុក្រ ទី​១៣​ ។ ព្រះមហា​ក្សត្រ​បញ្ជា​ពួក​អ្នក​ទាំង​នេះ​ឱ្យ​ចាប់​ខ្លួន​ពួក​ TEMPLIERS បារាំង​ទាំង​អស់ ។​ នា​ថ្ងៃ​សុក្រ​នោះ​ឯង​ពួក​ TEMPLIERS ២.០០០​នាក់​ត្រូវ​ចាប់​ខ្លួន​បន្ត​បន្ទាប់គ្នា​​ ដោយ​ពួក​អាមាត្រ និងពួក​ BAILLIS ។​ ពួក​អ្នក​ត្រូវ​ចាប់​ខ្លួន​ត្រូវ​គេ​នាំ​ទៅ​សួរ​ចម្លើយ​ក្រោម​ការ​ធ្វើ​ទារុណ​កម្ម​ មុន​ពេល​ប្រគល់​​ទៅ​ឱ្យ​ពួក​ឈ្មួញ​ដូមីនី​កែន ។​ ក្នុង​ចំណោម​ពួក TEMPLIERS ក្រុង​ប៉ារីស​១៤០​នាក់​ ៥៤​នាក់​ត្រូវ​គេ​ចាប់​ដុត​ទាំង​រស​់​ ក្រោយ​ពួក​គេ​ព្រម​សារភាព​ទោស​កំហុសពីបទ​ឧក្រិដ្ឋ​ដូចជា​ គ្រាន់​តែ​ស្តោះ​ទឹក​មាត់​ដាក់​ឈើ​ឆ្កាង​ ឬ​មួយ​គ្រាន់​តែ​ថើប​គ្នា​ដោយ​មិន​អៀន​ខ្មាស់។​

ថ្ងៃ​សុក្រ ទី​១៣​ នោះ​មាន​ប្រវត្តិ​រឿង​ចង្រៃ​ដទៃៗ​ទៀត​ដូចជា​ ថ្ងៃ​សុក្រ ទី​១៣​ ឆ្នាំ​១៩៧២ មាន​ការធ្លាក់​យន្ត​ហោះ​ជើង​ហោះ​ហើរ​ T-571 នៅ​ ANDES ។​ ថ្ងៃ​សុក្រ ទី​១៣​ តុលា ឆ្នាំ​១៩៧២​ យន្ត​ហោះ​នោះដែល​ហោះ​ចេញ​ពី​ទីក្រុង​មុ៉ង​តេវីដេអូ​ទៅ​កាន់​ក្រុង​សាន់​ស្យា​ហ្គោ​ប្រទេស​ស៊ី​លី ដឹក​ក្រុម​កីឡាករ​ RUGBY OLD CHRISTIANS ។​ យន្ត​ហោះ​នោះ​បាន​បុក​សត្វ​ល្វា​ចេក​មួយ ហើយ​ធ្លាក់​ក្នុង​តំបន់​ភ្នំ ។​ សរុប​មនុស្ស​២៩​នាក់​ក្នុង​ចំណោម​មនុស្ស​៤៥​នាក់​ជិះ​ក្នុង​យន្ត​ហោះ​នោះ​ត្រូវ​ស្លាប់​ ក្នុង​នោះ​អ្នក​ដំណើរ​៥​នាក់​ស្លាប់​ដោយ​សារ​ការ​បាក់​ដី​មួយ​បន្ថែម​ទៀត​នា​ថ្ងៃ​ទី​៣០ តុលា​ ១៩៧២ ។​ ពួក​អ្នក​នៅ​រស់​រាន​មាន​ជីវិត​អាច​រក​ឃើញ​រហូត​ដល់​២​ខែ​ក្រោយ​មក ។​

ការ​ភ័យ​ខ្លាច​ចំពោះ​ថ្ងៃ​សុក្រ​ ទី​១៣​ ក៏​មក​ពី​ជំនឿ​កាល​ពី​បុរាណ​កាល​របស់​បណ្តា​ប្រទេស​ភាគ​ខាង​ជើង​ដែរ ។​ យោង​តាម​ពាក្យ​ដំណាល​របស់​ពួក​ខាង​ជើង​ថា​ ODIN ជា​អាទិភាព​នៃ​ពួក​អ្នក​ចម្បាំង​ ថ្ងៃ​មួយ​បាន​រៀបចំ​ពិធី​ជួប​ជុំ​មិត្ត​ភក្តិ​១១​រូប​ក្នុង​ចំណោម​មិត្ត​ភក្តិ​ជា​អាទិ​ភាព​ដូចគ្នា​ឱ្យ​មក​ចូលរួម​ក្នុង​ពិធី​ជប់​លៀង​មួយ​នៅ​ឯ​វិមាន​ VALHALLA របស់​ខ្លួន ។​ LOKI ជា​ព្រះ​អាទិទេព​នៃ​សង្គ្រាម​ និង​ធ្វើ​បាប​មនុស្ស​ ​មក​ចូលរួម​តាម​ការ​អញ្ជើញ​តែ​បាន​អុក​ឡុក​ ។​ ព្រះ​បុត្រា​របស់​ព្រះ​អាទិទេព​ ODIN ព្រះ​នាម​ BALDER ជា​ព្រះ​អាទិ​ទេព​នៃ​ក្តីស្រឡាញ់​ ព្រម​ទាំង​ពន្លឺ​ប៉ុន​ប៉ង​រារាំង​អាទិទេព​ LOKI ។​

ការ​ប្រយុទ្ធគ្នា​ផ្ទុះ​ឡើង​រវាង​អាទិ​ទេព​ទាំង​២​អង្គ​នោះ។​ LOKI អាទិទេព​នៃ​ក្តី​ច្រណែន​ឈ្នានីស​ និង​ចូល​ចិត្ត​ប្រព្រឹត្ត​អំពើ​អាក្រក់​បាន​ប្រើ​ព្រួញ​មាន​ជាតិ​ពុល​មួយ​បាញ់​ចំ​បេះ​ដូង​សម្លាប់​អាទិទេព​ BALDER ដែល​តំណាង​នៃ​ក្តី​ស្រឡាញ់ ។​ ​ចាប់​តាំងពី​មាន​រឿង​ដំណាល​នោះ​មក​ក្នុង​បណ្តាប្រទេស​​ស្តង់​ឌី​ណាវ​ លេខ​១៣​ ជាតំណាង​អាទិទេព​ LOKI ត្រូវ​បាន​គេចាត់​ទុក​ថា​ជា​លេខ​អាក្រក់ ។​

រឿង​និទាន​មួយ​ទៀត​នៃ​តំបន់​ភាគ​ខាង​ជើង​ផែន​ដី​ដែរ​ថា​ FRIGGA ឬ​ FREYA ជា​ព្រះ​មហា​ក្សត្រី​យានី​របស់​បណ្តា​អាទិទេព​ជា​ទេព​អប្សរ​នៃ​សេចក្តី​ស្នេហា និង​ការ​បង្កើត​កូន ។​ ទេព​អប្សរ​អង្គ​នោះ​ត្រូវ​បណ្តា​អាទិទេព​នាំគ្នា​ហៅ​ថា​ សុក្រ ។​ ពាក្យ​ថា​ FRIDAY ជាភាសា​អង់​គ្លេស​ប្រែ​ថា​ ថ្ងៃ​សុក្រ​ មក​ពី​ពាក្យ​ថា​ FREYA’S DAY ។​ ក៏ប៉ុន្តែ​នៅ​សតវត្ស​ទី​១០​ និង​ទី១១​ បណ្តាប្រទេស​ខាង​ជើង​បែរ​ជា​ជឿ​លើ​សាសនា​គ្រិស្ត​វិញ ។​ នាពេល​នោះ​គេ​បែរ​ជា​និទាន​ថា​ FRIGGA តាម​ការពិត​ជា​យាយ​ឆ្មប់​មួយ​ទេ​ ហើយ​យាយ​ធ្មប់​នោះ​ស្ថិត​នៅ​លើ​កំពូល​ភ្នំ​មួយ​ ។​ ដើម្បី​ជាការ​សង​សឹក​យាយ​ធ្មប់​នោះ​ រៀង​រាល់​ថ្ងៃ​សុក្រ​ កោះ​ហៅ​ពួក​បិសាច​និង​យាយ​ធ្មប់​១១​នាក់​ទៀត​ដើម្បី​ចេញ​ធ្វើ​បាប​មនុស្ស ហើយ​កម្ចាត់​មនុស្ស​ឱ្យ​ជួប​នឹង​វាសនា​អាក្រក់ ។​

ដោយសារ​ការ​ខ្លាច​ចំពោះ​លេខ​១៣ នោះ​ពិធី​មួយ​ចំនួន​ដូចជាថ្ងៃ​រៀប​ការ​ ថ្ងៃ​កំណើត​ ឬ​ថ្ងៃ​ចេញ​ទៅ​សមុទ្រ​នៅ​លោក​ខាង​លិច​គេ​ចៀស​វាង​ថ្ងៃ​ទី​១៣​ នៃ​ខែ​នីមួយៗ ។​ ក្នុង​ទីក្រុង​ជាច្រើន​ពុំ​មាន​ផ្ទះ​ណា​ដាក់​លេខ​១៣​ ឡើយ​ ។​ ចំណែក​អគារ​ធំៗ​ ក៏​គេ​មិន​ហៅ​ជាន់​ទី​១៣​ គេ​ប្រើ​ពាក្យ​ថា​ ជាន់​ទី១២​ស្ទួន​ ឬ​ជាន់​ទី​១៤A រួច​សណ្ឋាគារ​មួយ​ចំនួន​ពុំ​មាន​បន្ទប់​លេខ​១៣ ទេ ។​ ថ្ងៃ​សុក្រ​ ទី​១៣​ ពួក​អឺរ៉ុប​ខ្លះ​ពុំ​ចង់​ចេញ​ទៅ​ធ្វើ​ការ​ ពុំ​ចង់​ធ្វើ​ដំណើរ​ ហើយ​ពុំ​ចង់​ចាកចេញ​ពី​ផ្ទះ ។​ អ្នក​សេដ្ឋ​កិច្ច​អាមេរិក​ម្នាក់​លើក​ឡើង​ពី​ផល​ប៉ះពាល់​សេដ្ឋ​កិច្ច​ដោយសារ​ថ្ងៃ​សុក្រ ទី​១៣​ ព្រោះ​ថ្ងៃ​នោះ​ពិសេស​បំផុត​មាន​ការ​ធ្លាក់​ចុះខ្លាំង​នៃ​ការ​ប្រើ​ប្រាស់​ ។​

ពួក​អ្នក​បើក​រថយន្ត​ប្រណាំង​ ពិសេស​ពួក​អ្នក​ចូល​រួម​ប្រកួត​ FORMULA-1 មាន​ការ​ខ្លាច​ចំពោះ​លេខ​១៣​ ចាប់តាំងពី​ការ​ស្លាប់​អ្នក​ប្រណាំង​២​នាក់​ដែល​ពាក់​លេខ​១៣​ នោះ​កាល​ពី​ឆ្នាំ​១៩២០ ។​ លេខ​នោះ​ដាច់​ខាត​ពុំ​មាន​អ្នក​ណា​ពាក់​ឡើង​ក្នុង​ការ​ប្រណាំង​ FORMULA-1 ។​ ទោះ​បី​ជា​យ៉ាងណា​ ថ្ងៃ​សុក្រ ទី​១៣​ ពុំ​មែន​ជា​ថ្ងៃ​គ្មាន​សំណាង​ល្អ​សម្រាប់​មនុស្ស​គ្រប់​គ្នា​ឡើយ ។​ រៀង​រាល់​ថ្ងៃ​សុក្រ ទី​១៣​ នារីស្តេច​ល្បែង​បារាំង​ម្នាក់​អាច​ប្រមូល​មនុស្ស​លេង​ល្បែង​បាន​ច្រើន​បំផុត​ដល់​ទៅ​៣​ដង​លើស​ថ្ងៃធម្មតា​ ​នារី​នោះ​បាន​ធ្វើ​យុទ្ធ​នាការ​មួយ​ហៅ «ប្រតិបត្តិ​ការ​V-13» ។​ ថ្ងៃ​សុក្រ​ក្លាយ​ជា​ថ្ងៃ​មាន​សំណាង​ ដោយ​ពួក​អ្នក​លេង​ល្បែង​ច្រើន​ឈ្នះ​ខុស​ពី​ធម្មតា។​ ប៉ុន្តែ​សម្រាប់​ពួក​គេ ថ្ងៃ​សុក្រ​មិន​តែង​មាន​សំណាង​រាល់​លើក​ឡើយ ។​

នៅ​ប្រទេស​អេស្ប៉ាញ​ និង​នៅ​ក្នុង​បណ្តា​ប្រទេស​អាមេរិក​ឡាទីន​ គេ​ពុំ​ខ្លាច​ថ្ងៃ​សុក្រ​ ទី​១៣​ ឡើយ​ តែ​គេ​ខ្លាច​ថ្ងៃ​អង្គារ ទី​១៣​ វិញ ។​ ថ្ងៃ​អង្គារ​ជា​និមិត្ត​រូប​នៃ​ភព​ព្រះ​អង្គារ​ ជា​អាទិ​ទេព​នៃ​សង្គ្រាម ។​ ថ្ងៃ​នោះ​ទាក់ទិន​នឹង​ភព​ព្រះ​អង្គារ​មាន​ន័យថា​ ការ​បំផ្លិច​បំផ្លាញ​ និង​ហិង្សា។​ នៅ​ប្រទេស​អុីតាលី​ គឺ​លេខ​១៧ ដែល​គេ​ខ្លាច​ ពុំ​មែន​លេខ​១៣ ទេ ។​ តាម​ពិត​លេខ​១៧​ សរសេរ​ជា​លេខ​ឡាតាំង​ XVII ប្រហាក់​ប្រហែល​នឹង​ VIXI ដែល​មាន​ន័យ​ជា​ភាសា​ឡាតាំង​ថា «ខ្ញុំ​ស្លាប់» ។​ នៅ​ចិន​គឺ​លេខ​៤​ ជា​លេខ​អាក្រក់​ ព្រោះ​លេខ​នេះ​ចិន​ហៅស៊ី​ SHI មាន​ន័យ​ថា​ ការ​ស្លាប់​ ដែល​ធ្វើ​ឱ្យ​គេ​ខ្លាច​ រួច​គេ​ពុំ​ខ្លាច​លេខ​១៣​ ដែល​គេ​ថា​ជា​លេខ​ល្អ​ទៅ​វិញ​ទេ ៕​