ប្រទេស​មី​យ៉ា​ន់​ម៉ា ៖ សត្វ​កន្លាត Cyborg សរុប​ចំនួន​១០​ក្បាល​ពី​ប្រទេស​សិង្ហ​បុរី ត្រូវ​បាន​បញ្ជូន​ទៅ​កាន់​ប្រទេស​មី​យ៉ា​ន់​ម៉ា ដើម្បី​ជួយ​ដល់​កិច្ច​ខិតខំ​ប្រឹងប្រែង​ស្វែងរក និង​ជួយ​សង្គ្រោះ​ជីវិត​មនុស្ស​ជាប់​ក្រោម​គំនរ​អគារ​ដួល​រលំ បន្ទាប់​ពី​គ្រោះ​រញ្ជួយ​ដី​កម្រិត ៧.៧​រិច​ទ័​របា​ន​វាយប្រហារ​កាលពី​ថ្ងៃ​ទី​២៨ ខែមីនា កន្លង​ទៅ បាន​សម្លាប់​មនុស្ស​ជាង ៣,០០០​នាក់​ហើយ គិតមកទល់ពេលនេះ ។

ប្រភព​ពី​សារព័ត៌មាន​សិង្ហ​បុរី The Straits Times កាលពី​ថ្ងៃ​ទី​៥ ខែមេសា ឆ្នាំ​២០២៥ បានឱ្យ​ដឹង​ថា កន្លាត Cyborg បាន​ទៅ​ដល់​ប្រទេស​មី​យ៉ា​ន់​ម៉ា ហើយ​ចូលរួម​ជាមួយ​កងកម្លាំង​ការពារ​ជន​ស៊ី​វិល​របស់​សិង្ហ​បុរី (SCDF) នៃ​ប្រតិបត្តិការ Lionheart កាលពី​ថ្ងៃ​ទី​៣០ ខែមីនា កន្លង​ទៅ ខណៈ​នេះ​គឺជា​លើក​ដំបូង​លើ​ពិភពលោក ដែល Cyborgs ឬ​របកគំហើញ​ពាក់ព័ន្ធ​នឹង​ការ​ភ្ជាប់​ឧបករណ៍​រំញោច​ចល័ត និង​ទំនាក់ទំនង​អេ​ឡិច​ត្រូ​និក​ទៅ​នឹង​សត្វល្អិត​បែប​នេះ ត្រូវ​បាន​ប្រើប្រាស់​ក្នុង​ការងារ​មនុស្សធម៌​។ ហើយ​វា​ក៏​ជា​លើក​ដំបូង​ផង​ដែរ ដែល​មនុស្ស​យន្ត​កូនកាត់​សត្វល្អិត ឬ Insect-hybrid Robots ត្រូវ​បាន​អនុវត្ត​ក្នុង​ការ​ស្វែង​អ្នក​បាត់​ខ្លួន​ផ្ទាល់​បែប​នេះ​។

សត្វ​កន្លាត Cyborg ត្រូវ​បាន​ដាក់​ពង្រាយ​សម្រាប់​ការ​ស្វែងរក​អ្នក​បាត់​ខ្លួន​លើក​ដំបូង​នៅ​ថ្ងៃ​ទី​៣១ ខែមីនា ក្នុង​ប្រទេស​មី​យ៉ា​ន់​ម៉ា និង​លើក​ទី​ពីរ នៅ​ថ្ងៃ​ទី​៣ ខែមេសា ក្នុង​រដ្ឋធានី​ណៃ​ពិដោ​។ បើ​ទោះជា​មិន​បាន​រក​ឃើញ​អ្នក​នៅ​រស់រាន​មានជីវិត​ក៏​ពិតមែន ប៉ុន្តែ​កន្លាត Cyborg បាន​រួមចំណែក​ដ៏​សំខាន់​ជួយ​ដល់​ក្រុមការងារ​សង្គ្រោះ​ក្នុង​តំបន់​មួយ​ចំនួន ដែល​រង​គ្រោះ​ដោយ​ការ​រញ្ជួយ​ដី​ខ្លាំង​បំផុត​។ ស្រប​ពេល​កងកម្លាំង​ការពារ​ជន​ស៊ី​វិល​សិង្ហ​បុរី​បាន​បញ្ជូន​កម្លាំង​ជំនាញ​៨០​នាក់ និង​ឆ្កែ​ហិតក្លិន​៤​ក្បាល​ទៅ​មី​យ៉ា​ន់​ម៉ា តាំងពី​ថ្ងៃ​ទី​២៩ ខែមីនា មក​ម្ល៉េះ ហើយ​ក្រុម​អ្នក​វិទ្យាសាស្ត្រ HTX ដែល​មាន​វិស្វករ​ពីរ​នាក់ និង​វិស្វករ​ពីរ​នាក់​មក​ពី​ក្រុមហ៊ុន Klass Engineering and Solutions ដែល​ជា​អ្នក​បង្កើត​សត្វ​កន្លាត Cyborg ក៏​បាន​ចូលរួម​ក្នុង​ប្រតិបត្តិការ​នេះ​ផង​ដែរ​។

សត្វ​កន្លាត Cyborg នីមួយ​ៗ​បាន​បំពាក់​ដោយ​កាមេរ៉ា និង​ឧបករណ៍​ចាប់​សញ្ញា​អ៊ី​ន​ហ្វ្រា​រ៉េ​ដ​មាន​ប្រវែង​ប្រហែល​៦​សង់ទីម៉ែត្រ ដោយសារ​ទំហំ​តូច​បែប​នេះ​ហើយ ទើប​អាច​រុករក​ចូល​ដល់​កន្លែង​តូច​ៗ​ក្រោម​គំនរ​បាក់បែក ខណៈ​កន្លាត Cyborg ទាំងអស់​ត្រូវ​បាន​បញ្ជា​ពី​ចម្ងាយ​ដោយ​អ្នកជំនាញ​។

ព័ត៌មាន​ដែល​ប្រមូល​បាន​តាម​រយៈ​កាមេរ៉ា និង​ឧបករណ៍​ចាប់​សញ្ញា​ត្រូវ​បាន​ដំណើរការ​ដោយ Machine Learning ដែល​អាច​កំណត់​ថា​តើ​មាន​សញ្ញា​នៃ​អ្នក​រស់រាន​មានជីវិត​ឬ​ក៏​អត់? បន្ទាប់​មក​ព័ត៌មាន​នេះ​ត្រូវ​បាន​បញ្ជូន​ត្រឡប់​មក​វិញ​ដោយ​ប្រព័ន្ធ​ឥត​ខ្សែ (Wireless) ទៅ​កាន់​វិស្វករ ដោយ​ជួយ​ក្រុម​សង្គ្រោះ​ក្នុង​ការ​ដាក់​ពង្រាយ​កម្លាំង​របស់​ខ្លួន​។

សូម​ជម្រាប​ជូន​ថា សត្វ​កន្លាត Cyborg ត្រូវ​បាន​បង្កើត​ឡើង​ដោយ​ក្រុម​អ្នក​វិទ្យាសាស្ត្រ Home Team Science and Technology Agency ហៅ​កាត់​ថា HTX រួម​នឹង​សាកលវិទ្យាល័យ Nanyang Technological University និង​ក្រុមហ៊ុន Klass Engineering and Solutions ក្នុង​ប្រទេស​សិង្ហ​បុរី​។ កន្លាត Cyborg ត្រូវ​បាន​បង្ហាញ​នៅ​ឯ​កិច្ចប្រជុំ Milipol Asia-Pacific និង TechX Summit ក្នុង​ប្រទេស​សិង្ហ​បុរី កាលពី​ខែមេសា ឆ្នាំ​២០២៤ ជាមួយ​ផែនការ​នឹង​ដាក់​ឱ្យ​ប្រើប្រាស់​ផ្លូវការ​ចាប់ពី​ឆ្នាំ​២០២៦​។

បើ​ទោះបីជា​សត្វ​កន្លាត Cyborg នៅ​តែ​ស្ថិត​ក្នុង​ដំណាក់កាល​ស្រាវជ្រាវ និង​អភិវឌ្ឍន៍​ក៏​ពិតមែន ប៉ុន្តែ​គ្រោះ​មហន្តរាយ​នៅ​ក្នុង​ប្រទេស​មី​យ៉ា​ន់​ម៉ា​បាន​ជំរុញ​ឱ្យ​ក្រុម​អ្នក​វិទ្យាសាស្ត្រ HTX តាមដាន​បច្ចេកវិទ្យា​របស់​ខ្លួន ដើម្បី​បំពេញបន្ថែម​នូវ​ចំណុច​ខ្វះខាត និង​ច្នៃប្រឌិត​ថ្មី​បន្ថែម​ទៀត​។

យោង​តាម​ប្រភព​ពី Reuters នៅ​ព្រឹក​ថ្ងៃ​ទី​៦ ខែមេសា ឆ្នាំ​២០២៥ បាន​រាយការណ៍​ថា ភ្លៀង​ធ្លាក់​លើ​ផ្នែក​ខ្លះ​នៃ​ប្រទេស​មី​យ៉ា​ន់​ម៉ា​ដែល​រង​គ្រោះ​ដោយ​ការ​រញ្ជួយ ដែល​ទីភ្នាក់ងារ​ជំនួយ​បាន​អះអាង​ថា​អាច​ធ្វើ​ឱ្យ​មាន​ភាព​ស្មុគស្មាញ​ខ្លាំង​ដល់​កិច្ច​ខិតខំ​ប្រឹងប្រែង​សង្គ្រោះ និង​បង្កើន​ហានិភ័យ​នៃ​ការ​ឆ្លង​ជំងឺ ខណៈ​ប្រធាន​ជំនួយ​របស់​អង្គការសហប្រជាជាតិ​បាន​ថ្លែង​ថា ត្រូវការ​តង់​បន្ថែម​ទៀត​ដើម្បី​ផ្តល់​ជម្រក​ដល់​អ្នក​ភៀសខ្លួន​ទៅ​កាន់​ទី​សុវត្ថិភាព​។ ប្រព័ន្ធ​ផ្សព្វផ្សាយ​រដ្ឋ​មី​រាយការណ៍​ថា ចំនួន​អ្នក​ស្លាប់​ដោយ​ការ​រញ្ជួយ​ដី​ដ៏​ខ្លាំង​ក្ល​បាន​វាយប្រហារ​កាលពី​ថ្ងៃ​ទី​២៨ ខែមីនា បាន​កើនឡើង​ដល់ ៣,៤៧១​នាក់ ហើយ ៤,៦៧១​នាក់​បាន​រង​របួស និង ២១៤​នាក់​ផ្សេង​ទៀត​បាត់​ខ្លួន​៕ ប្រភព ៖ Straits Times និង Reuters