ប្រទេសអេហ្ស៊ីប ៖ យោងតាមតុល្យការមួយចេញផ្សាយ ដោយទូរទស្សន៍រដ្ឋអេហ្ស៊ីបថា ភ្លើងដែលឆាបឆេះក្នុងស្ថានីយរថភ្លើងមួយនៅទីក្រុងគែរកាលពីថ្ងៃទី២៧កុម្ភៈ បណ្ដាលឲ្យមនុស្សស្លាប់យ៉ាងតិច២៥នាក់ ហើយមនុស្ស៥០នាក់ទៀតរងរបួស។
តាមសាក្សីទាំងឡាយថា រថភ្លើងមួយបានបុករបាំង ហើយការបុកនោះនាំឲ្យមានការផ្ទុះបន្ទាប់មកក៏មានភ្លើងឆាបឆេះ។ ចំណែករដ្ឋមន្ត្រីដឹកជញ្ជូនអេហ្ស៊ីប លោកHICHAM ARAFATក្រោយឧប្បត្តិហេតុនោះ បានដាក់ពាក្យសុំលាលែង ដែលនាយករដ្ឋមន្ត្រីបានយល់ស្របតាម។
សាក្សីម្នាក់រៀបរាប់ថា ខ្ញុំស្ថិតនៅក្នុងស្ថានីយរថភ្លើងនោះ ហើយបានឃើញរថភ្លើងលឿនមួយបុករបាំង រួចក៏មានការផ្ទុះឆេះ។ មនុស្សម្នានាំគ្នាភ័យរត់ប្រសាច តែមនុស្សច្រើននាក់បានត្រូវស្លាប់ ក្រោយការផ្ទុះក្បាលរថភ្លើង។
ស្ថានីយរថភ្លើងRAMSES នោះស្ថិតនៅកណ្ដាលទីក្រុងគែរ។ វីដេអូមួយផ្សាយតាមអីុនធើរណេត បង្ហាញរថភ្លើងនោះកំពុងរត់តាមផ្លូវលេខ៦ ហើយបានបុករបាំង។ វីដេអូមួយទៀតបង្ហាញមនុស្សម្នានាំគ្នារត់យ៉ាងប្រសាចក្រោយការផ្ទុះ ដោយមួយចំនួនមានភ្លើងកំពុងឆេះអាវផង។ ក្រសួងដឹកជញ្ជូននិយាយថាធុងប្រេងម៉ាស៊ូតរបស់រថភ្លើងនោះបានផ្ទុះឆេះ៕
ចែករំលែកព័តមាននេះ