រាជធានីភ្នំពេញ ៖ បន្ទាប់ពីសាងសង់រួចរាល់ ទីបំផុតប្រទេសថៃ បានបង្ហាញជាផ្លូវការនូវទីលានប្រណាំងរថយន្តដ៏ធំ និងទីលានប្រកួតកីឡាលំដាប់អន្តរជាតិផ្សេងៗទៀតនៅខេត្តបុរីរ៉ាំ រួមមាន ទីលានប្រកួត
បាល់ទាត់លំដាប់ស្តង់ដារអន្តរជាតិ ទីលានប្រណាំងរថយន្ត និងម៉ូតូលំដាប់អន្តរជាតិសម្រាប់ត្រៀមទទួលស្វាគមន៍ព្រឹត្តិការណ៍ ប្រណាំងរថយន្ត Formula 1 ព្រឹត្តិការណ៍ ប្រណាំងម៉ូតូធំ GP ។
ព្រឹត្តិការណ៍ប្រណាំងយានយន្តទាំងនោះនឹងមកដល់ទឹកដីថៃក្នុងពេលឆាប់ៗខាងមុខនេះ ស្របពេលគ្រប់ហេដ្ឋារចនាសម្ព័ន្ធបានរៀបចំរួចរាល់១០០ភាគរយហើយ ។ ស្របពេលជាមួយគ្នានេះ នៅកម្ពុជាក៏មានការ បង្ហាញគម្រោងសាងសង់ទីលានប្រណាំងរថយន្ដ លំដាប់ពិភពលោកផងដែរ។
គួររំលឹកថា កាលពីដើមខែមករា ឆ្នាំ ២០១៩ កន្លងទៅនេះ ក្រុមហ៊ុន ម៉ុង ឫទ្ធី គ្រុបរបស់លោកឧកញ៉ា ម៉ុង ឫទ្ធី បានចុះហត្ថលេខា ជាមួយក្រុមហ៊ុនជប៉ុន Yamamoto Rock Prodoucts Co.,Ltd លើកិច្ចព្រមព្រៀងស្តីអំពី គម្រោងសហប្រតិបតិ្តការអាជីវកម្មសាងសង់ទីលានប្រណាំងរថយន្តលំដាប់ថ្នាក់លេខ២លើពិភពលោក ។
បើយោងតាមលោកឧកញ៉ា ម៉ុង ឫទ្ធី សរសេរលើទំព័រហ្វេសប៊ុកថា ទីលាននេះត្រូវសាងសង់លើផ្ទៃដីទំហំ៥០០ហិកតា ស្ថិតនៅឃុំសែនដី ស្រុកសំរោងទង ខេត្តកំពង់ស្ពឺ ។ លោកឧកញ៉ា ម៉ុង ឫទ្ធី បានសរសេរទៀតថា គម្រោងសាងសង់កន្លែងប្រណាំងរថយន្តនេះមិនសូវបានទទួលប្រាក់ចំណេញច្រើនទេ ។ ទោះបីយ៉ាងណាលោកយល់ថា វានឹងអាចធ្វើជាស្ពានចម្លងឲ្យមានការផ្សារភ្ជាប់ទំនាក់ទំនងរវាងក្រុមកីឡាករកម្ពុជា-ជប៉ុន និងកីឡាករពីបណ្ដាប្រទេសជាច្រើនទៀតនៅលើពិភពលោក ៕
ចែករំលែកព័តមាននេះ