ខេត្តបាត់ដំបង ៖ កាលពីព្រឹកថ្ងៃទី១១ មីនា កន្លងទៅនេះ ប្រតិភូក្រសួងព័ត៌មាន ដែលដឹកនាំដោយលោកខៀវ កាញារីទ្ធ រដ្ឋមន្ដ្រីក្រសួងព័ត៌មាន បាននាំអំណោយទៅចែកជូនដល់កងកម្លាំងនគរបាលការពារព្រំដែនលេខ ៩១១និងលេខ៨០៧ ដែលកំពុងឈរជើងការ ពារខ្សែបន្ទាត់ព្រំដែននៅចំណុចបឹងត្រកួន ក្នុងឃុំគោករមៀត ស្រុកថ្មពួក ខេត្ដបន្ទាយមានជ័យដោយមានការចូលរួមអមដំណើរពីលោកឧកញ៉ា ស៊ីវ ថៃ នាយកក្រុមហ៊ុនOMC ធនាគារពាណិជ្ជ កម្មក្រៅប្រទេស FTB និងលោកវរសេនីយ៍ឯកឆេង សែ ជំនួយការបុគ្គលិកបច្ចេកទេសនៃ ក្រសួងការពារជាតិ ក្រោមការណែនាំពីលោក អោម វុឌ្ឍី នាយកសមាគមអ្នកសារព័ត៌មានឯក រាជ្យកម្ពុជា ព្រមទាំងមន្ដ្រីក្នុងក្រសួងជាច្រើនរូបទៀត ។
លោកវរសេនីយ៍ឯក ខេង ស៊ុម ស្នងការនគរបាលខេត្ដបន្ទាយមានជ័យ បានបញ្ជាក់អំពី សកម្មភាពពារទឹកដីនិងការប្ដេជ្ញាចិត្ដរបស់កងកម្លាំងនគរបាលដែលឈរជើងនៅទីនេះ គឺមានឆន្ទៈមុតមាំណាស់ក្នុងកាតព្វកិច្ចការពារប្រទេសជាតិមាតុភូមិ។ លោកឧត្ដមសេនីយ៍ឯកស៊ឹម សុផល អគ្គស្នងការរងនគរបាលជាតិបាន បញ្ជាក់ដែរថា ប្រតិភូមកពីសមរភូមិក្រោយធ្វើដំណើរមកកាន់ទីនេះដោយមិនខ្លាចការលំបាក ឬនឿយហត់ឡើយ។ ប្រតិភូទាំងអស់មានការភ្ញាក់ផ្អើលចំពោះបងប្អូនកងកម្លាំងប្រដាប់អាវុធយើងដែលមានការតស៊ូរស់នៅក្នុងព្រៃក្នុងលេណដ្ឋាន ទោះបីកន្លែងសំរាកមិនសមរម្យក៏បងប្អូនអាចរស់នៅបានដែរ នេះក៏ព្រោះតែបុព្វហេតុការពារបូរណភាពដែនដីពីការឈ្លានពានរបស់កងទ័ពសៀម ។
លោកឧត្តមសេនីយ៍ឯកបន្ដទៀតថា ដោយសារមានការគាំទ្រពីបងប្អូនយើងនៅសមរភូមិក្រោយជួយផ្ដល់សំភារនិងស្បៀងទោះបីជាមិនគ្រប់គ្រាន់ក៏ដោយ តែទឹកចិត្ដកងកម្លាំងយើងនៅតែមានឆន្ទៈស្មារតីមិនខ្លបខ្លាចចំពោះសត្រូវដែលមានបំណងឈ្លានពានទឹកដីរបស់់យើងឡើយ។ ដូច្នេះក្នុងនាមលោកជាតំណាងឱ្យកងកម្លាំងនៅតាមខ្សែបន្ទាត់ព្រំដែនសូមធ្វើការប្ដេជ្ញាចិត្ដការពារទឹកដីមិនឱ្យមានការបាត់បង់សូម្បីតែមួយមិល្លីម៉ែត្រឡើយ ហើយក៏មិនចង់បានទឹកដីរបស់គេសូម្បីតែមួយមិល្លីម៉ែត្រវិញដែរ។
លោករដ្ឋមន្ដ្រីខៀវ កាញារីទ្ធ មានប្រសាសន៍ថា សភាពការណ៍ពិតមែនស្ងប់ស្ងាត់តែមិនធូរស្រាលឡើយ ប៉ុន្តែយើងទទួលបានជោគជ័យមួយចំនួនដែលមានអាស៊ានទទួលដឹងឮអំពីការឈ្លានពាន ហើយនាយករដ្ឋមន្ដ្រីឡាវក៏បានដឹងដែរថា កម្ពុជាជាអ្នករងគ្រោះពីសំណាក់ពួកសៀម។លោកបន្ដទៀតថា សភាពការណ៍ក្នុងប្រទេសថៃមានការច្របូកច្របល់ព្រោះតែជិតដល់ពេលបោះឆ្នោត ហើយម្នាក់ៗប្រឹងធ្វើក៏ព្រោះតែស្វែងរកសំឡេងឆ្នោតនាពេលបោះឆ្នោតខាងមុខនេះផងដែរ ។ បើតាមការវិភាគរបស់កាសែតថៃមួយចំនួនដែលបានចុះផ្សាយកន្លងមកឃើញថា កម្ពុជាកំពុងឈានមុខក្នុងការងារទូតលើឆាកអន្ដរជាតិ ទោះបីជាថៃខំប្រឹងលេងល្បែងនេះដល់កម្រិតណាក៏ទៅមិនរួចដែរ រួមទាំងការទប់សា្កត់មិនចង់ឱ្យកងទ័ពឥណ្ឌូណេស៊ីមកសង្កេតការណ៍ដោយគ្មានអាវុធផងដែរ។ លោកបន្ដទៀតថា សង្គ្រាមរយៈពេល៤ថ្ងៃនេះជាសង្គ្រាមបច្ចេកវិទ្យាដែលអន្ដរជាតិកំពុងតែផ្ដោតមកលើកម្ពុជាក្នុងដំណោះស្រាយវិបត្ដិដោយភាពវៃឆ្លាតពីសំណាក់សម្ដេចតេជោហ៊ុន សែន ជានាយករដ្ឋមន្ដ្រី ។
តមក លោករដ្ឋមន្ដ្រីខៀវ កាញារីទ្ធ បានឧបត្ថម្ភដល់កងកម្លាំងទាំងពីរវរៈ គឺវរៈលេខ៩១១មានចំនួន១៦៨នាក់, វរៈលេខ៨០៧មានចំនួន៩១នាក់ ក្នុងម្នាក់ថវិកា៥ម៉ឺនរៀលបន្ថែមពីលើអំណោយសប្បុរសជនមាន រថយន្តកូរ៉េចំណុះ២តោនកន្លះចំនួន២គ្រឿង ស្រាបៀរក្រោនចំនួន៨០កេស, អង្ករ២០ការុង ក្នុង១ការុងទម្ងន់៥០ គីឡូក្រាម, ទឹកបរិសុទ្ធ៤៥កេស, នំកញ្ចប់៧បាវ ជាអំណោយរបស់ក្រុមហ៊ុនOMC និងធនាគារពាណិជ្ជកម្មក្រៅប្រទេសFTB ។ ឯវិទ្យុម៉ាកសូនី២០០គ្រឿងជាអំណោយរបស់លោកវរសេនីយ៍ឯក ឆេង សែ មន្ដ្រីជំនួយការបុគ្គលិកបច្ចេកទេសក្រសួងការពារជាតិ និងថ្មពិលចំនួន៤០០ដុំ ជាអំណោយរបស់លោក អោម វុឌ្ឍី ប្រធានសមាគមអ្នកសារព័ត៌មានឯករាជ្យកម្ពុជា ៕
ចែករំលែកព័តមាននេះ