ខេត្តតាកែ ៖ ក្លិបកម្សាន្តមួយកន្លែងដែលមានយីហោជុំមិត្ត១៦៨ ត្រូវបានអគ្គិភ័យឆាបឆេះស្ទើរតែអស់ទាំងស្រុង បានបង្កឱ្យមានការភ្ញាក់ផ្អើលកាលពីវេលាម៉ោង១០និង៥០នាទីថ្ងៃទី២៣ ខែកុម្ភៈ ឆ្នាំ២០១៩ ស្ថិតក្នុងភូមិស្នោរ សង្កាត់រកាក្នុង ក្រុងដូនកែវ…
ខេត្តតាកែ ៖ ក្លិបកម្សាន្តមួយកន្លែងដែលមានយីហោជុំមិត្ត១៦៨ ត្រូវបានអគ្គិភ័យឆាបឆេះស្ទើរតែអស់ទាំងស្រុង បានបង្កឱ្យមានការភ្ញាក់ផ្អើលកាលពីវេលាម៉ោង១០និង៥០នាទីថ្ងៃទី២៣ ខែកុម្ភៈ ឆ្នាំ២០១៩ ស្ថិតក្នុងភូមិស្នោរ សង្កាត់រកាក្នុង ក្រុងដូនកែវ ខេត្តតាកែវ ។
លោកឆាយ សាវុធ អធិការនគរបាលក្រុងដូនកែវបានអោយដឹងថា ក្លិបកំសាន្តដែលត្រូវអគ្គិភ័យឆាបឆេះខាងលើជារបស់ឈ្មោះ សាន អ៊ាង ភេទប្រុស អាយុ៤៩ឆ្នាំ និងប្រពន្ធឈ្មោះ ជា ស្រីមុំ អាយុ៤៩ឆ្នាំ រស់នៅភូមិ-សង្កាត់កើតហេតុ។
ក្រោយពីទទួលបានព័ត៌មានខាងលើភ្លាម លោកឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ បានដឹកនាំកម្លាំងនគរបាលខេត្ត ស្រុក-ក្រុង ចុះអន្តរាគមន៍ជួយពន្លត់អគ្គិភ័យខាងលើ ដោយប្រើប្រាស់រថយន្តពន្លត់អគ្គិភ័យចំនួន៥គ្រឿង និងប្រើប្រាស់ទឹកអស់ចំនួន១០រថយន្ត ទើបពន្លត់បានជាស្ថាពរ ។
ក្នុងហេតុការណ៍ខាងលើបណ្តាលឱ្យរងការខូចខាតក្លិបមានទំហំ៧ម៉ែត្រគុណនឹង៨ម៉ែត្រ ធ្វើអំពីបេតុង ប្រក់ស័ង្កសី ព្រមទាំងសម្ភាររួមមាន ម៉ាស៊ីនត្រជាក់ចំនួន៤គ្រឿង ឧបករណ៍តន្ត្រីសម័យ(អកកាដង់) មួយឈុត សាឡុងចំនួន១០ កៅអីជ័រ កៅអីឈើមួយចំនួន ស្រាបៀរចម្រុះមួយចំនួន និងទូរស័ព្ទដៃមួយចំនួនទៀតជារបស់ម្ចាស់ក្លិប អ្នកបម្រើភ្លៀវ និងភ្លៀវ បានរងការខូចខាតទាំងស្រុង ។ បើតាមកាវាយតម្លៃនៃការខូចខាតអស់ប្រមាណជិត១០ម៉ឺនដុល្លារ ។
ចំពោះមូលហេតុបណ្តាលឱ្យអគ្គិភ័យឆាបឆេះក្លិបខាងលើគឺមកពីទុស្សេខ្សែភ្លើងចេញពីម៉ាស៊ីនត្រជាក់ ៕
ចែករំលែកព័តមាននេះ