ខេត្តព្រះសីហនុ ៖ ជនសង្ស័យជាជនជាតិចិនចំនួន៣នាក់បានជិះក្នុងរថយន្តមួយគ្រឿងបើកបរក្នុងល្បឿនលឿនបុករថយន្តមួយគ្រឿងទៀតកំពុងឈប់ចត បន្ទាប់ពីកើតហេតុ ជនជាតិចិនទាំង៣នាក់បានទាក់ទងហៅមិត្តភក្តិជាជនជាតិចិនដូចគ្នាមកទទួលដែរ តែត្រូវកម្លាំងសមត្ថកិច្ចមកដល់កន្លែងកើតហេតុ ស្រាប់តែប្រទះឃើញជនសង្ស័យម្នាក់ក្នុងចំណោម៣នាក់មានយូរថង់ខ្មៅ ដោយមានការសង្ស័យ ក៏សុំឆែកឆែរថង់ខ្មៅនោះ តែមិនទាន់ទាំងបានឆែកឆែរផង ស្រាប់តែជនសង្ស័យទាំង៣នាក់រត់គេចខ្លួនបាត់ បន្សល់ទុកតែថង់ខ្មៅនៅកន្លែងកើតហេតុ ហើយសមត្ថកិច្ចរកឃើញថ្នាំញៀនចំនួន៨កញ្ចប់ធំនៅក្នុងថង់ខ្មៅនោះ និងតាមចាប់ខ្លួនជនសង្ស័យបានចំនួន២នាក់ ចំណែកជនសង្ស័យម្នាក់ទៀតសមត្ថកិច្ចកំពុងតាមរកចាប់ខ្លួន ។
ហេតុការណ៍ខាងលើបានកើតឡើងកាលពីវេលាម៉ោង៣និង៤០នាទីរសៀលថ្ងៃទី២១ កុម្ភៈ មានករណីគ្រោះថ្នាក់ចរាចរណ៍មួយកើតឡើងលើដងផ្លូវជាតិលេខ៤ ចន្លោះគីឡូម៉ែត្រលេខ១៥៧-១៥៨ ភូមិមនោរម្យ ឃុំតានៃ ស្រុកព្រៃនប់ ខេត្តព្រះសីហនុ ។
បុរសជាជនសង្ស័យទាំង៣នាក់ខាងលើជាជនជាតិចិនមិនត្រូវបានស្គាល់អត្តសញ្ញាណ ត្រូវសមត្ថកិច្ចចាប់ឃាត់ខ្លួនបានចំនួន២នាក់ ចំណែកជនសង្ស័យម្នាក់ទៀតរត់គេចខ្លួនបាត់ ខណៈសមត្ថកិច្ចកំពុងស្រាវជ្រាវតាមរកចាប់ខ្លួន ។
ប្រភពពីសមត្ថកិច្ចបានឱ្យដឹងថា មុនពេលកើតហេតុ គេឃើញជនសង្ស័យជាជនជាតិចិនចំនួន៣នាក់ជិះក្នុងរថយន្តមួយគ្រឿងម៉ាកព្រូស ពណ៌ស ពាក់ផ្លាកលេខ ភ្នំពេញ ២AS-០៦៣២ ធ្វើដំណើរក្នុងទិសដៅពីភ្នំពេញទៅខេត្តព្រះសីហនុ លុះមកដល់ចំណុចខាងលើ ដោយសាររថយន្តព្រូសនេះបើកបរក្នុងល្បឿនលឿនក៏រេចង្កូតទៅឆ្វេងដៃបុករថយន្តធន់ធំមួយគ្រឿងម៉ាកហ៊ីយ៉ាន់ដាយ ពណ៌ក្រហម ពាក់ផ្លាកលេខ ភ្នំពេញ ៣B-៦៤០៧ (អ្នកបើកបរមិនស្គាល់អត្តសញ្ញាណ) កំពុងឈប់ចតនៅលើផ្លូវក្រួសក្រហម ។
ប្រភពដដែលបានបន្តទៀតថា ក្នុងហេតុការណ៍គ្រោះថ្នាក់ចរាចរណ៍ខាងលើនោះដែរមិនបណ្តាលអោយមនុស្សណាម្នាក់រងគ្រោះថ្នាក់ឡើយ ។ ពេលនោះជនជាតិចិនទាំង៣នាក់ក៏បានទំនាក់ទំនងហៅមិត្តភក្តិជាជនជាតិចិនដូចគ្នាពីខេត្តព្រះសីហនុមកទទួល ដោយមានរថយន្ត២គ្រឿងបំរុងមកដឹកបន្តដំណើរទៅមុខដែរ តែត្រូវបានកំលាំងសមត្ថកិច្ច អាវុធហត្ថស្នាក់ការ៤០១ និងកំលាំងប៉ូលិសអធិការដ្ឋានស្រុកព្រៃនប់ រួមទាំងមេឃុំបានមកដល់ទីតាំងកើតហេតុដើម្បីធ្វើការពិនិត្យវាស់វែង ។
បន្ទាប់ពីកំលាំងសហការមកដល់បានឃើញជនជាតិចិនម្នាក់ក្នុងចំណោមជនជាតិចិន៣នាក់ មានយួរស្បោងពណ៌ខ្មៅមួយនៅឆ្ងាយពីកន្លែងកើតហេតុ ហើយជនសង្ស័យម្នាក់នោះហាក់ដូចជាខ្លាចសមត្ថកិច្ច ដោយមានការសង្ស័យទៅលើជនជាតិចិនម្នាក់ដែលយួរថង់ខ្មៅនោះ កំលាំងសហការក៏សុំឆែកឆេរថង់ខ្មៅនោះ មិនទាន់ទាំងបានឆែកឆេរផង ស្រាប់តែជនសង្ស័យជាជនជាតិចិនទាំងបីនាក់ខាងលើបានរត់គេចខ្លួនចូលក្នុងចំការដូងប្រេងអស់ ដោយបន្សល់ទុកតែថង់ខ្មៅមួយនៅកន្លែងកើតហេតុនោះ ហើយបក្ខពួកជនសង្ស័យដែលមកទទួលក៏បើករថយន្តគេចខ្លួនបាត់ ។ ក្រោយមកកំលាំងសហការក៏បានឆែកឆេក្នុងថង់ខ្មៅរកឃើញថ្នាំញៀនប្រភេទម៉ាទឹកកកចំនួន៨កញ្ចប់ធំ ហើយកម្លាំងសហការក៏បានយកមករក្សារទុក ។
ប្រភពដដែលបានបន្តថា ក្រោយពីរកឃើញវត្ថុតាងជាក់ស្តែងខាងលើរួចហើយ កំលាំងសហការបានតាមរុករកជនសង្ស័យក្នុងព្រៃចំការដួងប្រេងទាំងយប់រហូតដល់វេលាម៉ោង៨និង៣០នាទីព្រឹក ទើបចាប់បានជនសង្ស័យម្នាក់នៅចំការដូងប្រេង ហើយកំលាំងអធិការបានបន្តស្រាវជ្រាវចាប់បានជនសង្ស័យម្នាក់ទៀតនៅក្នុងទឹកដីឃុំរាម ជិតចូលដល់ក្នុងខេត្តព្រះសីហនុ រីឯជនសង្ស័យម្នាក់ទៀត សមត្ថកិច្ចកំពុងបន្តស្រាវ
ជ្រាវតាមរកផងដែរ ។ ចំណែករថយន្តធុនធំដែលត្រូវរថយន្តព្រួសបុកបានបន្តដំណើរទៅមុខបាត់ទៅដោយមិននៅរកខុសត្រូវឡើយ ៕
ចែករំលែកព័តមាននេះ