រាជធានីភ្នំពេញ ៖ ប្រមាណមួយខែចុងក្រោយនេះ គេកត់សម្គាល់ឃើញកីឡាការិនីស៊ន សៀវម៉ី បង្ហាញសកម្មភាពកាន់តែខ្លាំងក្នុងអាជីពជាអ្នកលក់ផលិតផលថែរក្សាសម្រស់នៅលើអនឡាញ ។ នាងត្រូវគេឃើញចំណាយពេលឃោសនាលក់ផង ឡើងទៅយកទំនិញផង និងដឹកយកទៅឱ្យភ្ញៀវដោយខ្លួនឯងផង…
រាជធានីភ្នំពេញ ៖ ប្រមាណមួយខែចុងក្រោយនេះ គេកត់សម្គាល់ឃើញកីឡាការិនីស៊ន សៀវម៉ី បង្ហាញសកម្មភាពកាន់តែខ្លាំងក្នុងអាជីពជាអ្នកលក់ផលិតផលថែរក្សាសម្រស់នៅលើអនឡាញ ។ នាងត្រូវគេឃើញចំណាយពេលឃោសនាលក់ផង ឡើងទៅយកទំនិញផង និងដឹកយកទៅឱ្យភ្ញៀវដោយខ្លួនឯងផង តែបែរជាអះអាងថា មិនមានការប៉ះពាល់នឹងអាជីពកីឡា តេក្វាន់ដូដែលជួយឱ្យនាងផ្លាស់ប្ដូរជីវិតស្ទើរទាំងស្រុងទៅវិញ។
កញ្ញា ស៊ន សៀវម៉ី និយាយថា កញ្ញាសម្រេចចិត្តនាំចូលផលិតផលថែរក្សាសម្រស់រួមមានផលិតផលលាបមុខ ថែរក្សាមុខ និងថ្នាំសម្រកទម្ងន់ជាដើមប្រមាណជា១ខែមកហើយ ដោយក្នុងមួយខែចាប់តាំងពីនាងបើកលក់នេះ នាងរកចំណូលបានមិនក្រោម៤ទៅ៥ពាន់ដុល្លារនោះទេ ក្នុងពេលដែលនាងផ្សាយលក់កន្លងមក ក៏មិនទាន់គ្រប់មុខទំនិញ និងគ្រាន់តែជាការប្រកាសលក់សាកល្បងនៅឡើយ។
កញ្ញាថា ខ្លួនលក់ដាច់ខ្លាំងណាស់ ដោយក្នុងមួយថ្ងៃផលិតផលដែលនាងប្រកាសលក់ស្ទើរមិនសល់សម្រាប់បំពេញតម្រូវការឡើយ ។ ជាក់ស្ដែងផលិតផលសម្រកទម្ងន់ និងថែរក្សាស្បែកស្ទើរគ្រប់មុខដែលនាងយកមកផ្សាយ គឺនាងលក់អស់គ្មានសល់ ខណៈថ្ងៃខ្លះមិនមានទំនិញដើម្បីដាក់ផ្សាយលក់ផង ។ គ្រប់មុខទំនិញទាំងអស់នាងថា មិនបានឡើងទៅទិញដោយខ្លួនឯងនៅក្នុងប្រទេសថៃនោះទេ ប៉ុន្តែនាងមានទំនាក់ទំនងក្នុងការកុម្ម៉ង់ទិញ ដោយនាងគ្រាន់តែកុម្ម៉ង់ថាយករបស់នេះរបស់នោះ ហើយតម្រូវឱ្យវេចខ្ចប់ដាក់ស្លាកយីហោបែបនេះបែបនោះ គឺគ្រប់គ្រាន់ហើយ។
ក្នុងរយៈពេលមួយខែ តាំងពីបើកដំណើរការនាងថាបានឡើងទៅមើលទំនិញតែម្ដងពីរដងនៅក្នុងប្រទេសថៃប៉ុណ្ណោះ ដោយការត្រួតពិនិត្យក៏ទៅតែមួយភ្លែតៗ ព្រោះមុខទំនិញដែលនាងកុម្ម៉ង់ទិញ គឺអាចមើលតាមរូបថតឆ្លងឆ្លើយគ្នាបាន មិនបាច់ទៅមើលផ្ទាល់ក៏បាន ។ នាងថា មុខរបរលក់តាមអនឡាញដ្បិតថា មិនត្រូវនឹងបទពិសោធន៍ក្នុងពេលដែលនាងប្រឡូកតែការងារកីឡា ប៉ុន្តែមិនមានផលវិបាកសម្រាប់រូបនាងនោះទេ ដោយសារតែនាងក៏ចេះរបៀបផ្សាយលក់ និងជាមនុស្សចូលចិត្តតែងខ្លួន និងសម្រករាង ដែលមិនពិបាកឱ្យនាងឃោសនាដើម្បីឱ្យអតិថិជនជឿជាក់ ។
មុខរបរលក់ទំនិញតាមអនឡាញដែលនាងបើកលក់នេះ នាងគ្មានគម្រោងជួលផ្ទះបើកជាហាងនោះទេ ដោយសារតែនាងយល់ថា ខ្លួនមិនទាន់ទំនេរគ្រប់គ្រាន់ និងថាត្រឹមលក់តាមអនឡាញ ក៏រកចំណូលបានសមប្រកបហើយ ។ នាងថា ហេតុផលដែលនាងសម្រេចចិត្តប្រកាសលក់ផលិតផលលើអនឡាញនេះ ក៏ព្រោះតែពេលកន្លងមកនាងប្រើថ្នាំសម្រកទម្ងន់ខ្លួនឯង និងប្រើផលិតផលថែរក្សាសម្រស់ខ្លួនឯង ហើយឃើញថាល្អទើបសម្រេចចិត្តកុម្ម៉ង់យកមកលក់តែម្ដង ទាន់ពេលកេរ្តិ៍ឈ្មោះរបស់នាងនៅមានការគាំទ្រ។
ស៊ន សៀវម៉ី បន្តថា អាជីពលក់ទំនិញតាម អនឡាញ មិនប៉ះពាល់ការងាររបស់នាងដែលជាកីឡាការិនីតេក្វាន់ដូនោះទេ ដោយសារតែនាងផ្សាយលក់ និងដឹកអីវ៉ាន់ឱ្យម៉ូយរាល់ថ្ងៃ ក៏ជ្រែតែចំម៉ោងទំនេរ និងថ្ងៃមិនរវល់ក្នុងការហ្វឹកហាត់។
ជាក់ស្ដែងក្នុងមួយថ្ងៃនាងត្រូវចំណាយពេលហ្វឹកហាត់២ម៉ោងកន្លះរាល់ល្ងាច គឺនាងនៅតែទៅហាត់ជាប្រចាំ បើទោះជាក្នុងពេលនេះមិនទាន់មានការប្រកួតណាមួយក្ដី ។ នាងហ្វឹកហាត់បែបនេះ ដើម្បីឱ្យទម្ងន់ និងរាងកាយនៅតែស្ទុះ និងរហ័សរហួន ដោយក្នុងអំឡុងខែ៥ និងខែ៧ជាដើម គឺនាងនឹងត្រូវចេញប្រកួតនៅក្នុងប្រទេសអង់គ្លេស និងក្នុងប្រទេសមួយដែលមិនទាន់ច្បាស់នៅឡើយ ដើម្បីជម្រុះកីឡាអូឡាំពិកសម្រាប់តេក្វាន់ដូ ។
កញ្ញាថា នៅក្នុងពេលនេះ នាងហាត់តែមួយពេល និងម្ដង២ម៉ោងកន្លះប៉ុណ្ណោះ ប៉ុន្តែក្រោយចូលឆ្នាំខ្មែរ គឺនាងនឹងហ្វឹកហាត់មួយថ្ងៃ២ពេល ដែលនាងប្រកាសថា នឹងទុកការងារលក់ទំនិញតាមអនឡាញចោលហើយហ្វឹកហាត់ឱ្យដិតដល់ ។ ទោះជាមុខរបរអនឡាញអាចរកចំណូលបានច្រើន ក៏នាងមិនចោលតេក្វាន់ដូ មកលក់ផ្ដាច់មុខនោះដែរ ប៉ុន្តែនាងនឹងចាប់អាជីពអនឡាញឱ្យពេញទំហឹង នៅពេលអាជីពតេក្វាន់ដូ ត្រូវនាងសម្រេចចិត្តបោះចោលនៅ២ឆ្នាំក្រោយ ។
នាងថា មិនមែនជារឿងខ្មាសអៀននោះទេ ដែលកីឡាការិនីលំដាប់ជាតិម្នាក់ ទៅលក់ផលិតផលនៅតាមអនឡាញ ដែលផ្ទុយពីកីឡារិនីល្បីស្រុកគេដេកស៊ី ។ ផ្ទុយទៅវិញ គឺបែរជាធ្វើឱ្យនាងកាន់តែមានលំនឹងក្នុងការតស៊ូ និងមិនពិបាកនៅពេលអាជីពទាំងមូលកាន់តែបោះជំហានទៅមុខ។ ជាក់ស្ដែង មិត្តភក្តិជនបរទេសរបស់នាង ដែលឃើញនាងផ្សាយលក់ផលិតផលមិនតិចនាក់ទេ បានបង្ហាញការអបអរក្នុងពេលឃើញទីផ្សារលក់ផលិតផលតាមអនឡាញរបស់នាងទទួលជោគជ័យ ៕
ចែករំលែកព័តមាននេះ