ខេត្តពោធិ៍សាត់ ៖ ស្ត្រីវ័យចំណាស់ម្នាក់បានស្លាប់យ៉ាងអាណោចអាធម៌ដោយសាររថយន្ដបើកកៀរម៉ូតូដួលរួចហើយខ្ទាតចូលក្រោមកង់រថយន្ដ បណ្ដាលឲ្យកិនចំក្បាលធ្លាយខួរតែម្ដង ដែលគ្រោះថ្នាក់ចរាចរណ៍នេះបានកើតឡើងលើកំណាត់ផ្លូវជាតិលេខ៥ចន្លោះគីឡូម៉ែតលេខ២១០ ២១១ ស្ថិតក្នុងភូមិបឹងខ្នារ ឃុំបឹងខ្នារ ស្រុកបាកាន កាលពីថ្ងៃទី១៤…
ខេត្តពោធិ៍សាត់ ៖ ស្ត្រីវ័យចំណាស់ម្នាក់បានស្លាប់យ៉ាងអាណោចអាធម៌ដោយសាររថយន្ដបើកកៀរម៉ូតូដួលរួចហើយខ្ទាតចូលក្រោមកង់រថយន្ដ បណ្ដាលឲ្យកិនចំក្បាលធ្លាយខួរតែម្ដង ដែលគ្រោះថ្នាក់ចរាចរណ៍នេះបានកើតឡើងលើកំណាត់ផ្លូវជាតិលេខ៥ចន្លោះគីឡូម៉ែតលេខ២១០ ២១១ ស្ថិតក្នុងភូមិបឹងខ្នារ ឃុំបឹងខ្នារ ស្រុកបាកាន កាលពីថ្ងៃទី១៤ ខែកុម្ភៈ ឆ្នាំ២០១៩ វេលាម៉ោង០៩ព្រឹក គឺចំថ្ងៃបុណ្យនៃសេចក្ដីស្រលាញ់តែម្ដង។
សមត្ថកិច្ចបានឲ្យដឹងថា គ្រោះថ្នាក់ចរាចរណ៍នេះបណ្តាលមកពីរថយន្ត HYUNDAI មួយគ្រឿង បើកប៉ះម៉ូតូដែលកំពុងជិះឌុបគ្នា០២នាក់ បណ្តាលឲ្យដួលចូលក្រោមរថយន្ដកិនស្លាប់អ្នកជិះពីក្រោយ ។ រថយន្តម៉ាក HYUNDAI ពណ៌ស ពាក់ស្លាកលេខ កំពង់ធំ ៣A-០២៨៥ បើកបរដោយឈ្មោះ ស៊ុន សុផាត ភេទប្រុស អាយុ៣១ឆ្នាំ រស់នៅភូមិទួលពង្រ ឃុំទួលពង្រ ស្រុកម៉ាឡៃ ខេត្តបន្ទាយមានជ័យ ។
ពេលបើកមកដល់ចំណុចកើតហេតុបានកៀរម៉ូតូម៉ាក Wav ពណ៌ខ្មៅ ពាក់ស្លាកលេខ បាត់ដំបង 1S-0416 បើកដោយឈ្មោះ ម៉ៅ គ្រឿម ភេទប្រុស អាយុ៥៨ឆ្នាំ រស់នៅភូមិរំចេក ឃុំព្រៃស្វាយ ស្រុកមោង ខេត្តបាត់ដំបង និងអ្នករួមដំណើរជិះពីក្រោយឈ្មោះ ទូច សៀប ភេទស្រី អាយុ៥០ឆ្នាំ រស់នៅជាមួយគ្នា បណ្តាលឲ្យដួល ហើយខ្ទាតឈ្មោះ ទូច សៀប ចូលទៅក្រោមកង់រថយន្ត បណ្តាលឲ្យកិនធ្លាយខួរស្លាប់តែម្ដង ។
សពជនរងគ្រោះសមត្ថកិច្ចបានប្រគល់ជូនគ្រួសារយកទៅធ្វើបុណ្យតាមប្រពៃណី រីឯវត្ថុតាងម៉ូតូ និងរថយន្តរក្សាទុកនៅប៉ុស្តិ៍រដ្ឋបាល ចំណែកអ្នកបើកបររថយន្តបានឃាត់ខ្លួនបង្កសំណុំរឿងបញ្ជូនទៅសាលាដំបូង ដើម្បីចាត់ការតាមនីតិវិធី ៕
ចែករំលែកព័តមាននេះ