អ្នកវិទ្យាសាស្ត្របាននិយាយថា កាត់បន្ថយការទទួលទានសាច់ក្រហម កាហ្វេនិងគ្រឿងស្រវឹង តែបង្កើនការទទួលទានផ្លែឈើគ្រប់ប្រភេទអាចជួយបង្កើនសមត្ថភាពផ្តល់កំណើតរបស់បុរស ។ ការសិក្សាមួយបានរកឃើញថា របបអាហារមិនល្អនិងការធាត់ដុះពោះលើសទម្ងន់អាចធ្វើឱ្យថយចុះភាពខាប់របស់ទឹកកាម ហើយប៉ះពាល់ដល់សមត្ថភាពរបស់វាក្នុងការហែលទៅរកពង ។
កាលពីអតីតកាល បញ្ហាអសមត្ថភាពក្នុងការផ្តល់កំណើតរបស់ស្ត្រីជាប់ទាក់ទងទៅនឹងការធាត់លើសទម្ងន់ ក៏ដូចជាការជក់បារី ឬផឹកស្រា ប៉ុន្តែកាលពីពេលនោះ គេមិនទាន់ច្បាស់ថាបុរសដូចគ្នានឹងស្ត្រីនោះទេ ប៉ុន្តែតាមលទ្ធផលនៃការសិក្សាថ្មីបំផុតលើបុរសបង្ហាញថា អ្នកដែលផឹកស្រាជាប្រចាំហើយនិងទទួលទានរបបអាហារមិនត្រឹមត្រូវ សមត្ថភាពផ្តល់កំណើតរបស់គេថយចុះ ។
អ្នកដឹកនាំការស្រាវជ្រាវ Edson Borgesមកពីមជ្ឈមណ្ឌល Fertility-Assisted Fertilization Center នៅទីក្រុង Sao Paoloប្រទេសប្រេស៊ីលបាននិយាយថា៖«ភាពខាប់នៃទឹកកាមរងឥទ្ធិពលអវិជ្ជមានដោយទំហំរាងកាយ និងការប្រើប្រាស់គ្រឿងស្រវឹង ប៉ុន្តែរងឥទ្ធិលពលវិជ្ជមានដោយការទទួលទានអាហារដែលសម្បូរដោយគ្រាប់ធញ្ញជាតិនិងផ្លែឈើ»។ ការសិក្សាលើកនេះ ក្រុមអ្នកវិទ្យាសាស្ត្រប្រទេសប្រេសុីលបានពិសោធលើបុរស២៥០នាក់ប៉ុណ្ណោះ ។
លោកស្រី Lynn Westphalជំនាញការខាងសុខភាពនិងសមត្ថភាពផ្តល់កំណើតនៅសាកលវិទ្យាល័យ Stanford University សង្ឃឹមថា លទ្ធផលដែលបានរកឃើញនឹងបោះពុម្ពផ្សាយនៅលើព្រឹត្តិបត្រ Fertility and Sterility លើកនេះ នឹងជួយលើកទឹកចិត្តឱ្យបុរសទាំងឡាយចាប់យកជម្រើសបែបបទនៃការរស់នៅមួយដែលផ្តល់នូវសុខភាពដល់ខ្លួន ៕
ចែករំលែកព័តមាននេះ