បុគ្គលណាចងចិត្តនឹងសេពគ្រឿងស្រវឹង យកគ្រឿងស្រវឹងជាត្រីមុខ នឹកឃើញតែស្រានៅជាប់នឹងអារម្មណ៍ យកស្រាជាមិត្តសម្លាញ់ បុគ្គលនោះឈ្មោះថាជាមនុស្សខ្វះសតិ បាត់បង់ស្មារតី យកទោសជាគុណ យកគុណជាទោសយ៉ាងប្រាកដ ។ បុគ្គលពួកខ្លះកាលណាគ្រឿងស្រវឹងជ្រាបចូលដល់ពោះភ្លាមក៏មានអារម្មណ៍ថា…
បុគ្គលណាចងចិត្តនឹងសេពគ្រឿងស្រវឹង យកគ្រឿងស្រវឹងជាត្រីមុខ នឹកឃើញតែស្រានៅជាប់នឹងអារម្មណ៍ យកស្រាជាមិត្តសម្លាញ់ បុគ្គលនោះឈ្មោះថាជាមនុស្សខ្វះសតិ បាត់បង់ស្មារតី យកទោសជាគុណ យកគុណជាទោសយ៉ាងប្រាកដ ។
បុគ្គលពួកខ្លះកាលណាគ្រឿងស្រវឹងជ្រាបចូលដល់ពោះភ្លាមក៏មានអារម្មណ៍ថា ក្នុងលោកនេះមានតែអញ គ្មានអ្នកណាអស្ចារ្យជាងអញ ក្លាយទៅជាអ្នកក្លាហានខាងផ្នែកកាប់ចាក់ ទាត់ធាក់ កាចសាហាវឃោរឃៅយង់ឃ្នង ហ៊ានប្លន់ ហ៊ានលួច ហ៊ានសម្លាប់ ហ៊ានចាប់រំលោភ ហ៊ានប្រព្រឹត្តអំពើល្មើសជាច្រើនទៀត សូម្បីតែឪពុកម្ដាយរបស់ខ្លួនក៏ហ៊ានគំរាមកំហែង ប្រមាថមាក់ងាយ ឬហ៊ានសម្លាប់គាត់ដែរ ។
គ្រឿងស្រវឹងក៏ជាទោសមួយឱ្យផលភ្លាមៗដូចជា ប្រជុំនៃរោគក្នុងខ្លួន ខូចខាតពេលវេលា ចាកផលប្រយោជន៍ នាំរឿងចូលផ្ទះ បង្កជម្លោះ មានសតិមិនប្រក្រតី ចិត្តវិបល្លាស និងហ៊ានប្រព្រឹត្តអំពើល្មើសផ្សេងៗ ។
មនុស្សដែលមានសតិបញ្ញាស្មារតីទុច្ចរិតបែបនេះ ឈ្មោះថាជាមនុស្សវិកលចរិត ឬហៅថាខ្វះសតិក្នុងខ្លួនហើយ មានទោសទាំងបច្ចុប្បន្ន និងលោកខាងមុខ មានគតិទៅកាន់អបាយភូមិជាក់ជាមិនខាន ។
អ្នកប្រាជ្ញលោកហាមមិនឱ្យមនុស្សគ្រប់រូបសេពគ្រឿងស្រវឹងមានសុរា គ្រឿងញៀនជាដើមដាច់ខាត ព្រោះជាអំពើឱ្យផលមិនរង់ចាំកាល ជាមនុស្សមិនមានចរិយា មិនមានសីលធម៌ មិនមានសុជីវធម៌ក្នុងខ្លួន រស់រងតែទុក្ខក្នុងវិបត្តិផ្សេងៗ ។
ចែករំលែកព័តមាននេះ