រាជធានីភ្នំពេញ ៖ ពិធីបុណ្យចូលឆ្នាំប្រពៃណីជាតិខ្មែរឆ្នាំ២០២៤នេះ មានរយៈពេលរហូតដល់៤ថ្ងៃ ដោយសារតែមានការគិតគូជើងលេខជាក់លាក់ និងពាក់ព័ន្ធដំណើរគោចរជុំវិញរបស់ព្រះអាទិត្យផងដែរ ។ ទីប្រឹក្សាអមគណៈកម្មាធិការរៀបចំបុណ្យជាតិ អន្តរជាតិ លោក…
រាជធានីភ្នំពេញ ៖ ពិធីបុណ្យចូលឆ្នាំប្រពៃណីជាតិខ្មែរឆ្នាំ២០២៤នេះ មានរយៈពេលរហូតដល់៤ថ្ងៃ ដោយសារតែមានការគិតគូជើងលេខជាក់លាក់ និងពាក់ព័ន្ធដំណើរគោចរជុំវិញរបស់ព្រះអាទិត្យផងដែរ ។
ទីប្រឹក្សាអមគណៈកម្មាធិការរៀបចំបុណ្យជាតិ អន្តរជាតិ លោក ប៊ុន វាស្នារ បានពន្យល់ពីមូលហេតុដែលនាំឱ្យពិធីបុណ្យចូលឆ្នាំខ្មែរឆ្នាំនេះ ត្រូវប្រារព្ធធ្វើឡើងមានរយៈពេលរហូតដល់ទៅ០៤ថ្ងៃថា គឺអាស្រ័យដោយមានការគន់គូរ គណនាពីដំណើរជើងលេខជាក់ច្បាស់ ។ ពោល គឺនៅពេលដែលផែនដីគោចរជុំវិញព្រះអាទិត្យ ដល់ទីកន្លែងដើមវិញ គឺវាស្ថិតនៅក្នុងរាសី ១២ពេញបរិបូរណ៍ មានន័យថា ១២រាសីពេញបរិបូរណ៍ វាស្ថិតនៅដើមថ្ងៃ ឬនៅចុងថ្ងៃ ប្រសិនបើរាសីវាគ្រប់ពេញបរិបូរណ៍ នៅម៉ោងខាងចុងថ្ងៃ វានាំឱ្យសង្ក្រាន្តនៃឆ្នាំនោះនឹងប្រព្រឹត្តទៅមានរយៈពេល០៤ថ្ងៃ ។
ប៉ុន្តែថ្ងៃទី១ និងថ្ងៃទី៤ គឺបានតែប៉ុន្មានម៉ោងតែប៉ុណ្ណោះ មានន័យថា ថ្ងៃដំបូង គឺថ្ងៃទី១ ដូចឆ្នាំនេះដែលសង្ក្រាន្តត្រូវចូលមកដល់នៅម៉ោង២០ជាង គឺបានតែជាង៣ម៉ោងនឹងឆ្លងចូលដល់ថ្ងៃទី២ ។ រីឯថ្ងៃទី៤ វិញដែលជាថ្ងៃឡើងស័ក គឺឡើងស័កនៅម៉ោង២ដើមថ្ងៃបានតែប៉ុន្មានម៉ោងតែប៉ុណ្ណោះនឹងផុតថ្ងៃចូលឆ្នាំទៅហើយ ។
លោកបានលើកឡើងថា ក្រោយពីព្រះអាទិត្យគោចរដោយពេញបរិបូរណ៍គ្រប់ ១២ រាសីឈានចូលខាងដើមនៃមេសារាសីដំបូងគេបង្អស់ចន្លោះពីវេលានេះរហូតដល់វេលាឡើងស័ក គឺវាមានចំនួន៥១ម៉ោង ៥៧នាទី និង៣៦វិនាទី ដោយឆ្នាំណាក៏ដូចជាឆ្នាំណាទាំងអស់ តែវាសំខាន់ គឺនៅត្រង់ដំណើរគោចរនៃរាសីខាងដើមដែលយើងហៅថា សង្ក្រាន្ត គឺគ្រប់ពេញបរិបូរណ៍នៃរាសីចាស់កាលណា គឺវាបន្តពីវេលាសង្ក្រាន្តទៅដល់វេលាឡើងស័ក មានន័យថា គ្រប់មួយឆ្នាំរបស់សុរិយគតិខ្មែរយើង ដែលវាអាចមាន៣៦៥ថ្ងៃ ឬ៣៦៦ថ្ងៃពេញបរិបូរណ៍នៅម៉ោងណា គឺយើងគ្រប់ពេញមួយឆ្នាំនៃសុរិយគតិខ្មែរយើងហើយ មិនមែនសុរិយគតិនៃគ្រិស្តសករាជសព្វថ្ងៃនេះទេ ។
លោកប៊ុន វាស្នារ បានគូសបញ្ជាក់ថា៖«ដោយសារដំណើរគោចរនៃរាសីចាស់វាប្រព្រឹត្តទៅនៅខាងដើមថ្ងៃ ឬនៅខាងចុងថ្ងៃមានន័យថា បើវេលាសង្ក្រាន្តនៅខាងដើមថ្ងៃ ចន្លោះពីវេលាសង្ក្រាន្តទៅដល់វេលាឡើងស័ក វាមានរយៈពេលតែមួយថ្ងៃទេ នៅចន្លោះហ្នឹង តែប្រសិនណាវាទៅខាងចុងថ្ងៃវិញ គឺវាអាចមាន៤៨ម៉ោង ហើយកាលណាវាមាន៤៨ម៉ោងពេញបរិបូរណ៍ហើយ គឺគេហៅថា វនប្បតិពីរហើយ តែបើវាបានតែ៣០ម៉ោងជាងមានន័យថា វាអត់បានពីរថ្ងៃទេ គឺវាមិនអាចមានវនប្បតិពីរបានទេ ។
លោកបានបន្តថា ៖ អ៊ីចឹងសំខាន់ គឺវេលាសង្ក្រាន្តថ្ងៃដំបូងវាពាក់កណ្តាលថ្ងៃ ឬក៏ខាងដើមនៃថ្ងៃឆ្នាំនោះ គឺវេលាសង្ក្រាន្តមានតែរយៈពេល០៣ថ្ងៃប៉ុណ្ណោះ ។ តែបើវាទៅខាងចុងដូចឆ្នាំនេះវារំកិលទៅដល់ម៉ោង២២ជាង គឺម៉ោង១០យប់ជាង បានន័យថា ថ្ងៃទី១ វាបានតែ៣ម៉ោងជាងទេ ហើយដល់ថ្ងៃទី៤ បានតែ២ម៉ោងជាងទេ ។ អ៊ីចឹងអាចន្លោះពីរថ្ងៃដែលស្មើ៤៨ម៉ោងនោះ គឺថាវនប្បតិពីរ យើងគិតថា ចូលឆ្នាំ០៤ថ្ងៃ ដោយសារថ្ងៃទី១ យើងរាប់ថា០១ថ្ងៃដែរ ហើយថ្ងៃទី៤ ក៏យើងរាប់ថា០១ថ្ងៃដែរ ។
តែតាមការពិត វេលាថេររបស់វា គឺមានតែ៥១ម៉ោង ៥៧នាទី និង៣៦វិនាទីតែប៉ុណ្ណោះ ទោះជាឆ្នាំណាក៏ដោយក៏វេលាមានតែប៉ុណ្ណឹងដូចៗគ្នាដែរ សម្រាប់តភ្ជាប់ចេញពីរាត្រីចាស់ឱ្យគ្រប់ពេញបរិបូរណ៍នៃឆ្នាំសុរិយគតិរបស់ខ្មែរ ។ ចំពោះការចូលឆ្នាំខ្មែរមានរយៈពេល០៤ថ្ងៃនេះ លោក ប៊ុន វាស្នារ បានលើកឡើងថា ប្រសិនបើដល់ពេលវេលា ដែលវាត្រូវប្រព្រឹត្តទៅរយៈពេល០៤ថ្ងៃដូចឆ្នាំនេះ ៤ឆ្នាំក្រោយទើបវាដល់ម្តងទៀត ។ ពោល គឺយើងចូលឆ្នាំរយៈពេល០៤ថ្ងៃមានសម្រាប់ឆ្នាំ២០២៤ ឆ្នាំ២០២៨ និងឆ្នាំ២០៣២ ហើយចន្លោះចាប់ពីឆ្នាំ២០៣២ ទៅមុខជាង១០ឆ្នាំទៀតទើបមានដំណើរជើងលេខបែបនេះទៀត ៕
ចែករំលែកព័តមាននេះ