អាជ្ញាធរជាតិព្រះវិហារ បន្តយុទ្ធនាការថែទាំ និងដំឡើងឧបករណ៍តាមដានបម្រែបម្រួលថ្មប្រាសាទ ក្នុងរមណីយដ្ឋានកោះកេរ ។ អាជ្ញាធរជាតិព្រះវិហារ បានប្រកាសនារសៀលថ្ងៃទី៨ ខែមេសានេះថា ៖ ការងារថែទាំ…
អាជ្ញាធរជាតិព្រះវិហារ បន្តយុទ្ធនាការថែទាំ និងដំឡើងឧបករណ៍តាមដានបម្រែបម្រួលថ្មប្រាសាទ ក្នុងរមណីយដ្ឋានកោះកេរ ។
អាជ្ញាធរជាតិព្រះវិហារ បានប្រកាសនារសៀលថ្ងៃទី៨ ខែមេសានេះថា ៖ ការងារថែទាំ និងតាមដានបម្រែបម្រួលថ្ម តាមប្រាសាទជាប្រចាំ ក្នុងរមណីយដ្ឋានប្រាសាទកោះកេរនាយកដ្ឋានអភិរក្ស និងបុរាណវិទ្យានៃអាជ្ញាធរជាតិព្រះវិហារ កំពុងបន្តការងារថែទាំ និងតាមដានការប្រែប្រួលថ្មប្រាសាទ តាមរយៈការប្រើប្រាស់ឧបករណ៍ម៉ែត្រក្រិត និងកាត់សម្អាតកូនរុក្ខជាតិតាមប្រាសាទជាប្រចាំ ក្នុងរមណីយដ្ឋានប្រាសាទកោះកេរ ដើម្បីធានាដល់សុវត្ថិភាពនៃការទស្សនា ការអភិរក្សបង្ការ និងរក្សាសោភ័ណភាពនៅតាមប្រាសាទនានា ។
ការបំពាក់ឧបករណ៍តាមដាន ត្រូវបានតម្លើងនៅទីតាំង ដែលមានហានិភ័យខ្ពស់នានា តាមទិន្នន័យដែលបានសិក្សា ដោយក្រុមសិក្សាផែនទីហានិភ័យនាពេលកន្លង ដែលផ្តល់ភាពងាយស្រួល និងផ្តល់ព័ត៌មានបានលឿន អំពីការប្រែប្រួលនៃរចនាសម្ព័ន្ធសំណង់ប្រាសាទ ដើម្បីទប់ស្កាត់ការដួលរលំដោយការទល់ទ្រ និងជួសជុលបានទាន់ពេលវេលា ។
ចំណែកការសម្អាតកូនរុក្ខជាតិដុះលើប្រាសាទ គឺបានជួយកាត់បន្ថយការលូតលាស់នៃរុក្ខជាតិ ដែលឬសរបស់វា បានជ្រាតចូលតាមគម្លាតថ្ម និងបំផ្លាញដល់រចនាសម្ព័ន្ធសំណង់ប្រាសាទនានា ៕
ចែករំលែកព័តមាននេះ