រាជធានីភ្នំពេញ ៖ រថយន្តមិនស្គាល់ម៉ាកមួយគ្រឿងបើកក្នុងល្បឿនលឿនមិនប្រយ័ត្នទៅកៀរម៉ូតូមួយគ្រឿងដែលធ្វើដំណើរស្របទិសគ្នា បណ្តាលឲ្យម៉ូតូដួលចូលក្រោមរថយន្តកុងតឺន័រមួយគ្រឿងទៀតកិនអូសជាង១០ម៉ែត្រ បង្កឲ្យមានការភ្ញាក់ផ្អើលកាលពីវេលាម៉ោង១១និង៤០នាទីយប់ ថ្ងៃទី១១ ខែកុម្ភៈ ឆ្នាំ២០១៩ ត្រង់ចំណុចក្បែរច្រកចូលបុរីអ័រគីដេ តាមបណ្តោយផ្លូវ២០០៤…
រាជធានីភ្នំពេញ ៖ រថយន្តមិនស្គាល់ម៉ាកមួយគ្រឿងបើកក្នុងល្បឿនលឿនមិនប្រយ័ត្នទៅកៀរម៉ូតូមួយគ្រឿងដែលធ្វើដំណើរស្របទិសគ្នា បណ្តាលឲ្យម៉ូតូដួលចូលក្រោមរថយន្តកុងតឺន័រមួយគ្រឿងទៀតកិនអូសជាង១០ម៉ែត្រ បង្កឲ្យមានការភ្ញាក់ផ្អើលកាលពីវេលាម៉ោង១១និង៤០នាទីយប់ ថ្ងៃទី១១ ខែកុម្ភៈ ឆ្នាំ២០១៩ ត្រង់ចំណុចក្បែរច្រកចូលបុរីអ័រគីដេ តាមបណ្តោយផ្លូវ២០០៤ ស្ថិតក្នុងសង្កាត់អូបែកក្អម ខណ្ឌសែនសុខ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញប្តីនិងប្រពន្ធមានផ្ទៃពោះជិតគ្រប់ខែបានជិះម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១៦ ពណ៌ខ្មៅ ពាក់ស្លាកលេខ ភ្នំពេញ ១FP-៨២៧៩ ធ្វើដំណើរតាមបណ្ដោយផ្លូវ២០០៤ ក្នុងទិសដៅពីកើតទៅលិច លុះមកដល់ចំណុចកើតហេតុ ស្រាប់តែមានរថយន្តកុងតឺន័រមួយគ្រឿងម៉ាក VOLVO ពណ៌ស ពាក់ស្លាកលេខ ភ្នំពេញ ៣D-២៣៧០ បើកបរដោយបុរសម្នាក់ ធ្វើដំណើរតាមបណ្ដោយផ្លូវបេតុងក្នុងទិសដៅពីជើងទៅត្បូងបានបត់ស្ដាំទៅផ្លូវ២០០៤ ។
ប្រភពដដែលបានបន្តថា ពេលនោះម៉ូតូរងគ្រោះបានបើកគេចពីរថយន្តកុងតឺន័រទៅខាងឆ្វេង ស្រាប់តែមានរថយន្តមិនចាំម៉ាកមួយគ្រឿងទៀតបានបើកមកពីក្រោយម៉ូតូរងគ្រោះ និងបានព្យាយាមបើកជែងទៅខាងឆ្វេងក្នុងល្បឿនលឿនមិនប្រយ័ត្នក៏ជ្រុលទៅកៀរម៉ូតូរងគ្រោះ បណ្តាលឲ្យម៉ូតូរងគ្រោះដួលខ្ទាតចូលទៅខាងក្រោមរថយន្តកុងតឺន័រកិនអូសជាង១០ម៉ែត្ររងការខូចខាតយ៉ាងដំណំ ចំណែកអ្នកបើកបរម៉ូតូជាប្តីបានខ្ទាតចេញពីម៉ូតូ រងរបួសបែកមុខបែកមាត់ រីឯប្រពន្ធដែលមានផ្ទៃពោះជិតគ្រប់ខែបានរងរបួសស្រាល។
ដោយឡែករថយន្តបង្កមិនចាំម៉ាកបានបន្ថែមល្បឿនបើកគេចបាត់ស្រមោលដោយសុវត្ថិភាព។
ភ្លាមៗនោះដែរ អ្នកបើកបររថយន្តកុងតឺន័រក៏បានបើកទ្វារចុះពីលើរថយន្តរត់គេចខ្លួនចេញពីកន្លែងកើតហេតុបាត់សម្រោល បន្សល់ទុកតែរថយន្តដែលកិនម៉ូតូជាប់ពីក្រោមនៅកន្លែងកើតហេតុប៉ុណ្ណោះ។
ក្រោយពេលកើតហេតុ ជនរងគ្រោះទាំងពីរនាក់ប្តីប្រពន្ធខាងលើត្រូវបានរថយន្តសង្គ្រោះរបស់គ្លីនិកឯកជនមកដឹកយកទៅសង្គ្រោះភ្លាមៗផងដែរ ។ ចំណែករថយន្ត និងម៉ូតូត្រូវបានសមត្ថកិច្ចមូលដ្ឋានទាក់ទងហៅសមត្ថកិច្ចជំនាញឲ្យចុះមកធ្វើការវាស់វែង និងយកទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីរង់ចាំធ្វើការដោះស្រាយគ្នាទៅតាមផ្លូវច្បាប់ជាបន្តទៀតនៅពេលក្រោយ៕
ចែករំលែកព័តមាននេះ