រាជធានីភ្នំពេញ ៖ នៅដើមឆ្នាំ ២០១៩នេះ ហាងឆេងតម្លៃខ្លួនកីឡាករ ប្រដាល់កម្ពុជាទាំងឡើងប្រកួតជាលក្ខណៈជាតិ និងអន្តរជាតិហាក់នៅទ្រឹងមិនទាន់ឡើងដូច ប្រាក់ខែមន្ត្រីរាជការនោះទេ បើធៀបទៅនឹង ឆ្នាំ២០១៨កន្លងទៅ…
រាជធានីភ្នំពេញ ៖ នៅដើមឆ្នាំ ២០១៩នេះ ហាងឆេងតម្លៃខ្លួនកីឡាករ ប្រដាល់កម្ពុជាទាំងឡើងប្រកួតជាលក្ខណៈជាតិ និងអន្តរជាតិហាក់នៅទ្រឹងមិនទាន់ឡើងដូច ប្រាក់ខែមន្ត្រីរាជការនោះទេ បើធៀបទៅនឹង
ឆ្នាំ២០១៨កន្លងទៅ ។ បើទោះជាការប្រកួតប្រដាល់គុនខ្មែរបច្ចុប្បន្ន កំពុងតែមានតម្រូវ ការខ្លាំងទាំងបរិមាណ និងគុណភាព ធ្វើឲ្យ ទីផ្សារប្រកួតរបស់កីឡាករកម្ពុជាជាពិសេសកីឡាករឆ្នើមៗកាលពីឆ្នាំ២០១៨មានការកើន ឡើងតម្លៃខ្លួនខ្ពស់ ក៏មកដល់ឆ្នាំ២០១៩នេះគេ មិនទាន់ឃើញតម្រុយនៃការកើនឡើងដូចកាលពីឆ្នាំកន្លងទៅទេ ។
កីឡាករកម្ពុជាឆ្នើមៗទទួលបាន តម្លៃខ្លួនក្នុងការឡើងប្រកួត១លើកពី៥០០ដល់ជិត១០០០ដុល្លារខណៈដែលតម្រូវការប្រកួតតាមសង្វៀនទូរទស្សន៍ឯកជនមកដល់ពេលនេះមិនតិចជាង៥ស្ថានីយនោះឡើយ ហើយមានគូប្រកួតលក្ខណៈអន្តរជាតិក៏មិនតិចជាង២០គូក្នុង១សប្តាហ៍ផងដែរ។
លោក ម៉ា ស៊ីថេត អ្នកគ្រប់គ្រងកម្មវិធីប្រដាល់ប្រចាំសង្វៀនCBS(ស៊ីធីអិន,ស៊ីអិនស៊ី និងMyTV) បានឱ្យដឹងថា តម្លៃខ្លួនកីឡាករគិតចាប់ពីឆ្នាំ២០១៨មកដល់ពេលនេះសម្រាប់ការឡើងប្រកួតម្ដងៗនៅសង្វៀនទូរទស្សន៍លោកគឺបានច្រើនជាងកាលពីប៉ុន្មានឆ្នាំមុនឆ្ងាយណាស់ ។ លោកថា តម្លៃខ្លួនប្រកួតជាលក្ខណៈអន្តរជាតិ គឺវាអាស្រ័យទៅលើកីឡាករល្បីនិងមិនល្បីប៉ុណ្ណោះ ។ បើកីឡាករមិនសូវល្បីបានត្រឹម៣០០ដុល្លារ បើល្បីល្មមបាន៤០០ដុល្លារ ហើយបើល្បីខ្លាំងបានដល់៥០០ដុល្លារគ្រាន់តែចំណាយពេលមិនដល់កន្លះម៉ោងផងនោះ ។
នេះគ្រាន់តែជាគូមិត្តភាពប៉ុណ្ណោះ តែបើគូដណ្ដើមខ្សែក្រវាត់វិញបើទោះជាតម្លៃខ្លួននៅដដែលប៉ុន្តែដល់ពេលប្រកួតបានចំណាត់ថ្នាក់ពីលេខ១ដល់លេខ៤គឺប្រាក់រង្វាន់ត្រូវបានផ្ដល់បន្ថែមពីលើប្រាក់តម្លៃខ្លួនដល់ខ្ទង់ពាន់ដុល្លារថែមទៀត ។ ចំណែកប្រាក់តម្លៃខ្លួនគូប្រកួតមិត្តភាពខ្មែរគ្នាឯងវិញក៏គិតទៅតាមកីឡាករល្បីនិងមិនល្បីដូចគ្នា ។ បើគូបើកឆាកក្មេងៗមិនទាន់ចេះវាយច្បាស់លាស់ ទទួលបានចាប់ពី១៥ម៉ឺនរៀលដល់២០ម៉ឺនរៀល ក្នុងពេលកីឡាករចាស់ៗធ្លាប់ប្រកួតច្រើនដងមានគេចាប់អារម្មណ៍ច្រើនទទួលបានចាប់ពី៣៥ម៉ឺនរៀលដល់ជាង៤០ម៉ឺនរៀល ។
ចំណែកសង្វៀនស្ថានីយទូរទស្សន៍ដទៃទៀតមានដូចជាប៉ុស្តិ៍លេខ៥និងប៉ុស្តិ៍អាស៊ីអាគ្នេយ៍ជាដើមនោះ តាមដែលគេធ្លាប់ដឹងក៏មិនលើសគ្នាប៉ុន្មាននោះដែរ ។ លោក ម៉ា ស៊ីថេត បញ្ជាក់ថា មានស្ថានីយទូរទស្សន៍ខ្លះក៏មិនបង្ហាញតួលេខពិតប្រាកដនោះដែរគ្រាន់តែនិយាយថាមិនខុសគ្នានោះទេ ហើយតែងនិយាយថា វាអាស្រ័យទៅលើម្ចាស់ឧបត្ថម្ភកម្មវិធីជាអ្នកកំណត់ប៉ុណ្ណោះ។
តាមប្រភពព័ត៌មានគួរឱ្យទុកចិត្តបាននៅតាមស្ថានីយទូរទស្សន៍ទាំងអស់មានការប្រកួតប្រជែងដណ្តើមកីឡាករល្បីរៀងៗខ្លួនដោយគ្មានតម្លាភាព និងស្មើភាពគ្នា ធ្វើឲ្យតម្លៃខ្លួនកីឡាករកាន់តែឡើងខ្ពស់ និងមានបន្ថែមលុយក្រោមតុឱ្យចាយ ឬផ្ដល់ប្រាក់ប្រចាំខែ ដើម្បីចងជើងកីឡាករមិនឲ្យចេញទៅប្រកួតនៅសង្វៀនដទៃទៀតផង ។ កីឡាករខ្លាំងៗ និងល្បីៗមួយចំនួនសឹងតែរកពេលសម្រាកមិនបានផង ស្របពេលដែលទីផ្សារប្រកួតទាំងនៅក្នុងរាជធានីភ្នំពេញ និងតាមខេត្តមួយចំនួនមានសកម្មភាពផុលផុសរីកចម្រើនគួរឲ្យកត់សម្គាល់ ។ ប៉ុន្តែសង្វៀនប្រដាល់មួយចំនួននៅតែរើសអើងចំពោះវត្តមានកីឡាករដែលមិនទាន់ល្បីដោយមិនផ្តល់ឱកាស ឬមានគំនិតលើកស្ទួយកីឡាករវ័យក្មេង និងថ្មីៗនោះឡើយ។
ប្រភពច្បាស់ការពីមន្ត្រីរៀបចំការប្រកួតរបស់សហព័ន្ធប្រដាល់គុនខ្មែរសុំមិនបញ្ចេញឈ្មោះបានឲ្យដឹងថា គិតត្រឹមខែកុម្ភៈ ឆ្នាំ២០១៩ ហាងឆេងតម្លៃខ្លួនកីឡាករគឺដូចគ្នាកាលពីឆ្នាំ២០១៨ ។ កីឡាករឆ្នើមលំដាប់ជួរមុខដែលមានសមត្ថភាពប្រកួតលក្ខណៈមិត្តភាពអន្តរជាតិនោះមានតម្លៃខ្លួនចាប់ពី២៥០ដុល្លារដល់៥០០ដុល្លារក្នុងការប្រកួតមួយលើកៗ ប៉ុន្តែមានកីឡាករខ្លះដែលគេចងជើងជាប់មិនឲ្យប្រកួតដូចជាកែវ រំចង់ សម្រាប់តែសង្វៀនបាយ័នមួយគឺបានដល់៨០០ដុល្លារក្នុងមួយលើក ។
ប្រភពដដែលបន្តថា ភាគីខាងម្ចាស់សង្វៀននិងម្ចាស់ឧបត្ថម្ភកម្មវិធីជាអ្នកស្នើយកឈ្មោះកីឡាករដោយខ្លួនឯង ចំណែកខាងសហព័ន្ធកីឡាប្រដាល់គុនខ្មែរចាំតែសម្របសម្រួល និងគ្រប់គ្រងផ្នែកបច្ចេកទេសមានថ្លឹងទម្ងន់ ពិនិត្យសុខភាព និងផ្តល់មន្ត្រីបច្ចេកទេសឱ្យប៉ុណ្ណោះ ។ រីឯការទិញទឹកចិត្ត ឬផ្តល់ប្រាក់ប្រចាំខែឲ្យកីឡាករណាមួយដើម្បីរារាំងមិនឲ្យចេញទៅប្រកួតសង្វៀនដទៃ ជារឿងឯកជនរវាងកីឡាករ និងម្ចាស់សង្វៀនផ្ទាល់ប៉ុណ្ណោះយើងគ្មានសិទ្ធិអំណាចអ្វីទៅហាមឃាត់គេបានឡើយ។
ទោះបីយ៉ាងណា អ្នករៀបចំកម្មវិធីប្រកួតប្រដាល់ប្រចាំសង្វៀនទូរទស្សន៍មួយសុំមិនឱ្យបញ្ចេញឈ្មោះបានចាត់ទុកអ្នករៀបចំកម្មវិធីប្រកួតប្រចាំសង្វៀនខ្លះដែលនិយមចូលចិត្តចងជើងកីឡាករមិនឲ្យមានសិទ្ធិចេញទៅប្រកួតសង្វៀនដទៃបាននោះ ជាមនុស្សមានគំនិតចង្អៀត ចង្អល់ដោយផ្ដោតទៅលើផលប្រយោជន៍សួន តួជាធំ និងជាការប្រកួតប្រជែងមិនស្មើភាពគ្នា មិនផ្ដល់ផលប្រយោជន៍ដល់កីឡាករ៕
ចែករំលែកព័តមាននេះ