មន្ត្រី​រដ្ឋសភា​បាន​ហៅ ខេត្តកំពត​ជា​កូនក្រមុំ​ដ៏ ស្រស់​ស្អាត​មួយ


រាជធានី​ភ្នំពេញ ៖ មន្ត្រីជាន់ខ្ពស់​រដ្ឋសភា​ជាតិ និង​ជា​ប្រធាន​គណៈកម្មការ​ទី​៩​នៃ​រដ្ឋសភា​បាន​ប្រៀបប្រដូច​ខេត្តកំពត​ថា ជា​កូនក្រមុំ​ដ៏​ស្រស់​ស្អាត​នៅ​តំបន់ឆ្នេរ​ប៉ែក​និរតី​នៃ​ប្រទេស​កម្ពុជា​ដែល​កំពុង​មាន​សក្តានុពល​យ៉ាង​ខ្លាំង ។

មាន​ប្រសាសន៍​នៅ​ក្នុង​ដំណើរ​ទស្សនកិច្ច​ទៅ​កាន់​ខេត្តកំពត កាលពី​ចុង​ស​ប្តា​ហ៍​មុន លោក​ជំទាវ និ​ន សា​ផុ​ន ប្រធាន​គណៈកម្មការ​ទី​៩​នៃ​រដ្ឋ​ភាព​បាន​មាន​ប្រសាសន៍​ថា លោក​ជំទាវ​ពិតជា​រីករាយ និង​មោទនភាព នៅ​ពេល​ដែល​បាន​ជាន់​ទឹកដី​ខេត្តកំពត ព្រោះ​កំពត​បច្ចុប្បន្ន​ខុស​ប្លែក​ពី​មុន ។ កំពត​ជា​ខេត្ត​នៅ​ជាប់​ឆ្នេរសមុទ្រ ហើយ​មាន​ទាំង​តំបន់​ភ្នំ ពិសេស​កំពត​មាន​សក្តានុពល និង​អំណោយផល​ពី​ធម្មជាតិ ដែល​ជា​កត្តា​ល្អ ជួយ​ជំរុញ​ដល់​វិស័យសេដ្ឋកិច្ច ឧស្សាហកម្ម កសិកម្ម ក៏​ដូច​ជា​វប្បធម៌ អរិយធម៌ និង​ទេសចរ​ផង​ដែរ ។ ដូច្នេះ​លោក​ជំទាវ​បាន​ប្រៀបប្រដូច​ខេត្តកំពត​ថា ជា​កូនក្រមុំ​ដ៏​ស្រស់​ស្អាត់ ។

អភិបាល​ខេត្តកំពត លោក​ជាវ តា​យ បាន​ស្នើ​ឲ្យ​ប្រធាន​គណៈកម្មការ​ទី​៩​នៃ​រដ្ឋសភា​ជួយ​ព​ន្លឿ​ន​លើ​ការ​សិក្សា​ទៅ​លើ​ភ្នំ​មួយ​ចំនួន ដែល​ជា​សម្បត្តិ​បេតិកភណ្ឌ និង​ភ្នំ​ខ្លះ​ជា​កន្លែង​រមណីយដ្ឋាន ដែល​មានការ​ស្ទះ​ដល់​ការ​ចេញ​អាជ្ញាប័ណ្ណ​ក្នុង​ការ​អភិវឌ្ឍ​។ ជាក់ស្តែង​ភ្នំ​កំពង់ត្រាច មាន​ក្រុមហ៊ុន​វិនិយោគ​លើ​វិស័យ​ទេសចរណ៍​គេ​ចង់បាន ប៉ុន្តែ​ខាង​ក្រសួង​រ៉ែ និង​ថាមពល​ថា​ទុក​សិក្សា ខណៈ​ខាង​ក្រសួងបរិស្ថាន​ថា​មិន​បាន ។ ដូច្នេះ​ការ​អភិវឌ្ឍ​នៅ​តំបន់​នោះ​ត្រូវ​រាំងស្ទះ​រាប់​ឆ្នាំ ។

ក្នុង​ពេល​អញ្ជើញ​ជួប​សំណេះសំណាល​ជាមួយ​កម្មករ និយោជិត​នៅ​ខេត្តកំពត​កាលពី​ពេល​ថ្មី​ៗ​នេះ សម្តេច​តេ​ជោ ហ៊ុន សែន នាយក​រដ្ឋមន្ត្រី​កម្ពុជា បាន​លើក​ឡើង​ពី​ខេត្តកំពត ដែល​មាន​សក្តានុពល​ជា​ច្រើន​ក្នុង​ការ​ទាក់ទាញ​ការ​វិនិយោគ ដោយ​ខេត្ត​នេះ​មាន​ឧស្សាហកម្ម​ធុន​ធ្ងន់ ដោយ​មាន​រោងចក្រ​ផលិត​ស៊ីម៉ងត៍​ចំនួន​៣ មាន​កំពង់​ផែ​ទឹក​ជ្រៅ​នា​ពេល​អនាគត ដែល​សម្រួល​ដល់​ការ​ដឹក​ជញ្ជូន​នា​ពេល​អនាគត មាន​តំបន់​សេដ្ឋកិច្ច​ពិសេស និង​មាន​សក្តានុពល​លើ​ដំណាំ​កសិកម្ម ដូច​ជា​ម្រេច​កំពត ទុរេន​កំពត ស្រែអំបិល និង​រមណីយដ្ឋាន​ទេសចរណ៍ធម្មជាតិ វប្ប​ធ៌​ម ប្រវត្តិសាស្ត្រ​យ៉ាងច្រើន ។

សម្តេច​តេ​ជោ​ថ្លែង​ថា ៖« ជាមួយនឹង​ការ​ពង្រីក​ផ្លូវជាតិ​លេខ​៣​ជា​៤​គន្លង ពី​រាជធានី​ភ្នំពេញ ដល់​តំបន់​បែក​គូស នឹង​ធ្វើ​ឲ្យ​ខេត្តកំពត​រីក​ចម្រើន និង​ទាក់ទាញ​ការ​វិនិយោគ​ពី​អ្នក​វិនិយោគ​ជាតិ អន្តរជាតិ​ជា​ច្រើន​ទៀត​នា​ពេល​អនាគត »៕

Facebook Google Twitter Email

សូម​ subscribe Channel Youtube របស់​កោះ​សន្តិភាព​លោក​​អ្នក​នឹង​ទទូល​បាន​ព័ត៌មាន​ជា​វីដេអូ​ថ្មី​ៗ​បន្ថែម​ទៀត សូម​អគុណ!!!!!

ព័ត៌មាន​ជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

ការស្ទង់មតិគេហទំព័រថ្មី




សូម​អរគុណ