ខេត្តកណ្តាល ៖ យ៉ាងហោចណាស់មនុស្សម្នាក់បានស្លាប់នៅនឹងកន្លែងកើតហេតុ ចំណែកមនុស្ស២នាក់ទៀតបានរងរបួសធ្ងន់ក្នុងករណីគ្រោះថ្នាក់ចរាចរណ៍រវាងរថយន្តមួយគ្រឿងបុកជាមួយម៉ូតូ២គ្រឿង បង្កឱ្យមានការភ្ញាក់ផ្អើលកើតឡើងកាលពីវេលាម៉ោង១២និង៣០នាទីថ្ងៃត្រង់ថ្ងៃទី១០ ខែកុម្ភៈ ឆ្នាំ២០១៩ នៅលើផ្លូវជាតិលេខ២ ច្រកគីឡូម៉ែត្រលេខ៣០-៣១ ភូមិព្រៃតាតូច ឃុំបឹងខ្យាង ស្រុកកណ្តាលស្ទឹង ខេត្តកណ្តាល។
ភាគីខាងម៉ូតូទាំង២គ្រឿងខាងលើ ក្នុងនោះម៉ូតូមួយគ្រឿងជិះគ្នា២នាក់ ម៉ាកហុងដា ធុនសេ១២៥ ពណ៌ខ្មៅ ពាក់ស្លាកលេខ ព្រៃវែង ២J-៤៧១៦ បើកបរដោយបុរសជាប្តីឈ្មោះ ឃី ឃុន អាយុ៥០ឆ្នាំ រស់នៅភូមិរោងដំរី ឃុំក្រោក ស្រុកបាភ្នំខេត្តព្រៃវែង បានស្លាប់នៅកន្លែងកើតហេតុ និងអ្នករួមដំណើរម្នាក់ជាប្រពន្ធឈ្មោះដូង ចន្ធូ អាយុ៥០ឆ្នាំ រស់នៅភូមិរោងដំរី ឃុំក្រោក ស្រុកបាភ្នំខេត្តព្រៃវែង បានរងរបួសធ្ងន់ ។ រីឯម៉ូតូមួយគ្រឿងទៀតម៉ាកហុងដាគុប សេ៥០ ពណ៌ស្លែ ពាក់ស្លាកលេខ ភ្នំពេញ ១D-៩៩៨៣ បើកបរដោយឈ្មោះផុន ជឿន ភេទប្រុស អាយុ៤២ឆ្នាំ មានទីលំនៅភូមិកណ្ដោល ឃុំពត់សរ ស្រុកបាទីខេត្តតាកែវ បានរងរបួសធ្ងន់ ។
ចំណែកភាគីខាងរថយន្តមួយគ្រឿងម៉ាកឡិចស៊ីស RX 300 ពណ៌ស្ករ ពាក់ស្លាកលេខ ភ្នំពេញ ២Q-៦៩២៩ បើកបរដោយឈ្មោះ យូ ជែឈិន (Yoo Jae Chun) ភេទប្រុស អាយុ៦៧ឆ្នាំ ជាជនជាតិកូរ៉េ សញ្ជាតិខ្មែរ បច្ចុប្បន្នស្នាក់នៅផ្ទះលេខ៦៣៧ ក្រុម៤២ ភូមិកំពង់សំណាញ់ សង្កាត់កំពង់សំណាញ់ ក្រុងតាខ្មៅ ខេត្តកណ្ដាល ត្រូវសមត្ថកិច្ចចាប់ឃាត់ខ្លួន ។
នគរបាលចរាចរណ៍ស្រុកកណ្តាលស្ទឹងបានអោយដឹងថា នៅមុនពេលកើតហេតុ គេឃើញរថយន្តមួយគ្រឿងម៉ាកឡិចស៊ីស RX 300 បើកបរក្នុងទិសដៅពីត្បូងទៅជើង (ពីខេត្តតាកែវមកភ្នំពេញ) លុះមកដល់ចំណុចកើតហេតុខាងលើ រថយន្តបានរេចង្កូតមកខាងឆ្វេងចូលគន្លងផ្លូវខាងម៉ូតូ បណ្ដាលឲ្យបុកម៉ូតូចំនួន២គ្រឿង ក្នុងនោះម៉ូតូមួយគ្រឿងជិះគ្នា២នាក់ម៉ាកហុងដា និងម៉ូតូមួយគ្រឿងទៀតម៉ាកហុងដាគុប សេ៥០ បើកបរតែម្នាក់ឯង ដែលម៉ូតូទាំង២គ្រឿងនោះបើកបរក្នុងទិសដៅពីជើងទៅត្បូង (ពីភ្នំពេញទៅតាកែវ) បណ្ដាលឲ្យអ្នកបើកបរម៉ូតូម៉ាកហុងដាស្លាប់នៅនឹងកន្លែងកើតហេតុ និងអ្នករួមដំណើរម្នាក់រងរបួសធ្ងន់ ចំណែកអ្នកបើកបរម៉ូតូមួយគ្រឿងទៀតម៉ាកហុងដាគុប សេ៥០ បានរងរបួសធ្ងន់ ។
ក្រោយពេលកើតហេតុ អ្នករងរបួសធ្ងន់ទាំង២នាក់ត្រូវបានគេបញ្ជូនទៅសង្គ្រោះនៅមន្ទីរពេទ្យរាជធានីភ្នំពេញ ចំណែកសពជនរងគ្រោះម្នាក់ត្រូវបានប្រគល់ជូនសាច់ញាតិបងប្អូនយកទៅធ្វើបុណ្យតាមប្រពៃណី។
បច្ចុប្បន្ន អ្នកបើកបររថយន្តត្រូវបានសមត្ថកិច្ចនាំមកធ្វើការសាកសួរនៅអធិការដ្ឋាន រីឯវត្ថុតាងរថយន្ត និងម៉ូតូទាំង២គ្រឿង ត្រូវបានកម្លាំងជំនាញយកមករក្សាទុកនៅអធិការរដ្ឋានជាបណ្ដោះអាសន្ន៕
ចែករំលែកព័តមាននេះ