ពលរដ្ឋប្រទះចម្លាក់អាយុកាលជាង១ពាន់ឆ្នាំឯណោះ…
- បន្ទាយមានជ័យ
ខេត្តបន្ទាយមានជ័យ ៖ លោកឧត្តមសេនីយ៍ទោ អាត់ ខែម ស្នងការនគរបាលខេត្ត កាលពីថ្ងៃទី៨ កុម្ភៈ បានប្រគល់វត្ថុបុរាណថ្មភក់ចំនួន២ដុំ មានទម្ងន់សរុបចំនួន៤៥,៥គីឡូក្រាម…
ខេត្តបន្ទាយមានជ័យ ៖ លោកឧត្តមសេនីយ៍ទោ អាត់ ខែម ស្នងការនគរបាលខេត្ត កាលពីថ្ងៃទី៨ កុម្ភៈ បានប្រគល់វត្ថុបុរាណថ្មភក់ចំនួន២ដុំ មានទម្ងន់សរុបចំនួន៤៥,៥គីឡូក្រាម ដល់សារមន្ទីរនៃមន្ទីរវប្បធម៌និងវិចិត្រសិល្បៈខេត្តដើម្បីយកទៅរក្សាទុក ។
លោកឧត្តមសេនីយ៍ទោអាត់ ខែម បាននិយាយថា វត្ថុបុរាណទាំង២ប្រភេទនេះ ត្រូវបានប្រជាពលរដ្ឋនៅភូមិម្កាក់ សង្កាត់ម្កាក់ ក្រុងសិរីសោភ័ណ កាយដីធ្វើភ្លឺស្រែ បានប្រទះឃើញក៏យកមកប្រគល់ជូនលោកដើម្បីយកមករក្សា ព្រោះក្រែងមានជនខិលខូចទៅគំរាមយកពីគាត់ ហើយបានប្រគល់ជូនលោក កាលពីថ្ងៃទី២៤ ខែមករា ឆ្នាំ២០១៩ កន្លងមក ។
នៅថ្ងៃនេះ លោកបានធ្វើការប្រគល់ជូនមន្ត្រីការិយាល័យសារមន្ទីរខេត្ត ដើម្បីយកទៅរក្សាទុកនៅសារ មន្ទីរ ដើម្បីទុកជាសម្បត្តិបេតិកភ័ណ្ឌជាតិ ។ ថ្មបុរាណដែលត្រូវបានប្រគល់នោះ ជារូបចម្លាក់យោនីព្រះនាងឧមាវតី ធ្វើអំពីថ្មភក់១មានទម្ងន់៣៤,៥គីឡូក្រាម និងរូបលិង្គឥសូ ធ្វើអំពីថ្មភក់១មានទម្ងន់២គីឡូក្រាម ។ លោក សោម ហៃ អនុប្រធានការិយាល័យ សារមន្ទីរបានបញ្ជាក់ថា វត្ថុបុរាណទាំង២ប្រភេទ នេះ មានអាយុកាលរាប់ពាន់ឆ្នាំមកហើយមុនសម័យអង្គរមកម្ល៉េះ ។
ជាមួយគ្នានោះដែរ លោកអនុប្រធានការិយាល័យសារមន្ទីរ ក៏បានថ្លែងអំណរគុណលោកឧត្តមសេនីយ៍
ទោ ស្នងការនគរបាលខេត្ត ដែលបានប្រគល់បន្តមកខាងជំនាញ ដើម្បីយកទៅរក្សាទុកនៅសារមន្ទីរនាពេលនេះ ៕
ចែករំលែកព័តមាននេះ