ខេត្តពោធិ៍សាត់ ៖ សមិទ្ធផលអគារសិក្សាមួយខ្នង០៦បន្ទប់នៅក្នុងសាលាបឋមសិក្សាវត្តឯក ស្ថិតក្នុងភូមិអូរតូង សង្កាត់ចំរើនផល ក្រុងពោធិ៍សាត់ ដែលទើបតែស្ថាបនារួចបានធ្វើពិធីសម្ភោធដាក់ឲ្យប្រើប្រាស់ជាផ្លូវការ នាព្រឹកថ្ងៃទី០៩ ខែកុម្ភៈ ឆ្នាំ២០១៩…
ខេត្តពោធិ៍សាត់ ៖ សមិទ្ធផលអគារសិក្សាមួយខ្នង០៦បន្ទប់នៅក្នុងសាលាបឋមសិក្សាវត្តឯក ស្ថិតក្នុងភូមិអូរតូង សង្កាត់ចំរើនផល ក្រុងពោធិ៍សាត់ ដែលទើបតែស្ថាបនារួចបានធ្វើពិធីសម្ភោធដាក់ឲ្យប្រើប្រាស់ជាផ្លូវការ នាព្រឹកថ្ងៃទី០៩ ខែកុម្ភៈ ឆ្នាំ២០១៩ ក្រោមអធិបតីភាពលោក ស៊ុយ សែម រដ្ឋមន្ត្រីក្រសួងរ៉ែ និងថាមពល។
អញ្ជើញចូលរួមក្នុងឱកាសនោះមានលោក ខូយ សុខា អ្នកតំណាងរាស្ត្រមណ្ឌលពោធិ៍សាត់, លោកជំទាវឧកញ៉ា ភាព ហៀក ប្រធានក្រុមប្រឹក្សាភិបាលក្រុមហ៊ុនជីបម៉ុងគ្រុប លោកជំទាវឧកញ៉ា យិន ផាន្នី អភិបាលកាសែតកោះសន្តិភាព ព្រមទាំងអស់លោក លោកជំទាវ មន្ត្រីរាជការជាច្រើនរូប ទៀត រួមជាមួយអ្នកស្រុក៦០០នាក់។
លោក លី សុគន្ធី ប្រធានមន្ទីរអប់រំ យុវជន និងកីឡាខេត្តឲ្យដឹងថា សាលារៀនវត្តឯកនេះកាលសម័យសង្គមរាស្ត្រនិយម គឺជាមន្ទីរពេទ្យ។ នៅឆ្នាំ១៩៨០ អាជ្ញាធរមូលដ្ឋានបានយកធ្វើជាសាលារៀនដែលមានតែពីរបន្ទប់ប៉ុណ្ណោះ គឺថ្នាក់ទី១ និងថ្នាក់ទី២ បើសិស្សរៀនដល់ថ្នាក់ទី៣ មិនមានបន្ទប់រៀននោះទេ គឺតម្រូវឲ្យទៅរៀនបន្តនៅសាលាបឋមសិក្សាសិក្ខារាម ក្នុងវត្តលលកសចាស់ ដែលមានចំងាយប្រមាណ០៣គមឯណោះ។
នៅកំឡុងឆ្នាំ២០០០ ដោយឃើញសិស្សមានកំណើនច្រើន ឯកឧត្តម ស៊ុយ សែម និងលោកជំទាវបានជួយកសាងអគារសិក្សាចំនួន០២បន្ទប់ថែមទៀត ប៉ុន្តែមកដល់ឆ្នាំ២០១៥ អគាសិក្សាទាំងនោះមានការចាស់ទ្រុឌទ្រោមខ្លាំង ខ្លាចមានគ្រោះថ្នាក់ដល់សិស្ស ចាពិសេសដោយបានលោក ឈុន សៀង ចៅសង្កាត់ចំរើនផលជួយបរិច្ចាគដីពង្រីកទីធ្លាសាលាបន្ថែមទៀតផងនោះ ។
ឯកឧត្តមរដ្ឋមន្ត្រី និងលោកជំទាវ រួមជាមួយលោកជំទាវឧកញ៉ា ភាព ហៀក ប្រធានក្រុមហ៊ុនជីបម៉ុង ក៏បានឱ្យវាយកម្ទេចចោលអគារចាស់នោះ ហើយសាងសង់អគារថ្មីមួយខ្នង០៦បន្ទប់ បំពាក់ដោយតុកៅអី និងបន្ទប់ទឹកដែលធ្វើពិធីសម្ភោធនៅថ្ងៃនេះស្រាប់។ ការបរិច្ចាគនូវធនធានយ៉ាងច្រើនសន្ធឹកសន្ធាប់នេះ គឺមានគោលបំណងដ៏មានសារសំខាន់ក្នុងការជួយលើកស្ទួយវិស័យអប់រំជាតិ ឲ្យកាន់តែមានប្រសិទ្ធភាព និងគុណភាពក្នុងការសិក្សារៀនសូត្ររបស់សិស្សានុសិស្សយើង។
ទឹកចិត្តដ៏សប្បុរស និងប្រកបដោយព្រហ្មវិហារធម៌របស់ឯកឧត្តម និងលោកជំទាវ និងក្រុមហ៊ុនជីបម៉ុង ពិតជាបានផ្ដល់នូវគុណប្រយោជន៍ដ៏ធំធេងដល់សង្គមជាតិ ជាពិសេសសិស្សានុសិស្សដែលជាទំពាំងស្នងឫស្សីទៅថ្ងៃអនាគត។
លោករដ្ឋមន្ត្រី ស៊ុយ សែម បានថ្លែងថា អគាសិក្សានេះជាសមិទ្ធផលថ្មីមួយទៀតបន្ថែមពីលើសមិទ្ធផលដែលកើតមានជាបន្តបន្ទាប់ពីមួយឆ្នាំទៅមួយឆ្នាំនៅលើទឹកដីខេត្តពោធិ៍សាត់យើងនេះ ក្រោមការដឹកនាំដ៏ឈ្លាសវៃរបស់សម្ដេចតេជោ ហ៊ុន សែន ជានាយករដ្ឋមន្ត្រី។ អគាសិក្សាថ្មីនេះនឹងបានជាកន្លែងអង្គុយរៀនដោយសុវត្ថិភាព មិនខ្លាចក្បឿង ទឹកភ្លៀង ឬឈើដំបូលបាក់ធ្លាក់លើដូចមុននោះទេ។ដូច្នេះក្មួយៗ ចៅៗ គិតតែពីខំរៀនទៅ ចៀសឲ្យឆ្ងាយពីថ្នាំញៀន ក្មេងទំនើង និងអំពើអបាយមុខផ្សេងៗដែលសង្គមស្អប់ខ្ពើម។ ត្រូវខិតខំពីថ្នាក់បឋមសិក្សានេះទៅដើម្បីជាគ្រឹះដ៏រឹងមាំទៅអនុវិទ្យាល័យ វិទ្យាល័យ និងឧត្តមសិក្សា។
លោករដ្ឋមន្ត្រី ស៊ុយ សែម សូមឲ្យលោកគ្រូអ្នកគ្រូជួយថែរក្សាអគារសិក្សានេះឲ្យនៅគង់វង្សយូរអង្វែង ដើម្បីបន្តដល់សិស្សជំនាន់ក្រោយទៀត។ ចំណែកក្មួយៗ ចៅៗសិស្សានុសិស្ស សូមកុំយកដីស ឫវត្ថុរឹងគូសលេងលើជញ្ជាំង កុំចោលសំរាម ឫខាកស្ដោះក្នុងថ្នាក់នាំឲ្យមានមេរោគ និងខូចបរិស្ថាន។ ឯកឧត្តមបានថ្លែងអំណរគុណចំពោះលោកជំទាវឧកញ៉ា ភាព ហៀក ប្រធានក្រុមហ៊ុនជីពម៉ុង ដែលតែងតែបានចូលរួមជាមួយឯកឧត្តម និងលោកជំទាវស្ទើរតែគ្រប់សកម្មភាពក្នុងការកសាងសមិទ្ធផលនានាកន្លងមកនេះ។
ក្នុងឱកាសនោះ លោករដ្ឋមន្ត្រី ស៊ុយ សែម និងលោកជំទាវ បានប្រគេនថវិកាចំនួន៥លានរៀលដល់ព្រះចៅអធិការវត្តឯការាម សម្រាប់ចូលរួមកសាងខ្លោងទ្វារវត្ត និងលាបថ្នាំជញ្ជាំងសាលាឆាន់។ ជូនថវិកាមួយលានរៀលដល់នាយកសាលាបឋមសិក្សាវត្តឯក សម្រាប់តភ្លើងអគ្គិសនីបំភ្លឺក្នុងសាលា ព្រមទាំងបានចែកសម្ភារៈសិក្សា ខោអាវ និងថវិកាមួយចំនួនដល់លោកគ្រូ អ្នកគ្រូ សិស្សានុសិស្ស កងកម្លាំងប្រដាប់អាវុធ និងប្រជាពលរដ្ឋដែលមកចូលរួមប្រមាណជាង៦០០នាក់ផងដែរ ៕
ចែករំលែកព័តមាននេះ