ម្ចាស់ក្សត្រីនឹងប្រជែងយកតំណែងនាយករដ្ឋមន្រ្តីនៃរដ្ឋាភិបាលសីុវិល…

ថ្ងៃទី ០៩ ខែ កុម្ភៈ ឆ្នាំ ២០១៩
ម៉ោង ១៤:៣៩
ខាន់ សុខឃន

ប្រទេសថៃ ៖ ព្រះអង្គម្ចាស់ក្សត្រី អ៊ូ បុលរតនា ព្រះរៀមរបស់ព្រះមហាក្សត្រថៃ នឹងជាបេក្ខជនសម្រាប់តំណែងនាយករដ្ឋមន្ត្រី ក្នុងការបោះឆ្នោតនាខែមីនាខាងមុខ ដែលនេះជាព្យុះនយោបាយមួយជំរុញឱ្យប្រមុខរបបយោធា កំពុងកាន់អំណាចឱ្យឈរឈ្មោះដែរ ។ ការប្រកាសគួរឲ្យភ្ញាក់ផ្អើលពីការឈរឈ្មោះរបស់ម្ចាស់ក្សត្រីអង្គនោះ ធ្វើឡើងកាលពីថ្ងៃទី៨ កុម្ភៈ ដែលជាការប្រកួតប្រជែងគ្នាជាមួយប្រមុខយោធាថៃ លោកប្រាយុទ្ធ ចាន់អូចា ។

ម្ចាស់ក្សត្រីអ៊ូបុល រតនា មានព្រះជន្ម៦៧ព្រះវស្សា នឹងប្រជែងយកតំណែងនាយករដ្ឋមន្រ្តីនៃរដ្ឋាភិបាលសីុវិល ដែលនឹងបង្កើតក្រោយការបោះឆ្នោតសភាថៃ នាថ្ងៃទី២៤ មីនា ក្រោមឈ្មោះគណបក្សមួយដែលស្និទ្ធនឹងលោកថាក់សីុន សីុណាវ៉ាត្រា អតីតនាយករដ្ឋមន្រ្តី កំពុងរស់នៅនិរទេស ដើម្បីគេចផុតពីការជាប់ពន្ធនាគារ ។

លោកថាក់ស៊ីន សីុណាវ៉ាត្រា ជាអ្នកកែទម្រង់និយម នៅតែត្រូវក្រុមអាមាត្យ និងពួកយោធា ចាត់ទុកជាការគំរាមកំហែងមួយ ចំពោះរាជបល្ល័ង្ក ដែលការគំរាមកំហែងនោះ ជាប្រភពនៃរដ្ឋប្រហារយោធាឆំ្នា២០០៦ និងឆ្នាំ២០១៤ប្រឆាំងរដ្ឋាភិបាលរបស់ត្រកូលសីុណាវ៉ាត្រា ។ ប៉ុន្តែចាប់តាំងពីពួកយោធាកាន់អំណាចមក ព្រះមហាក្សត្រភូមីបុល អាឌុលយ៉ាដេត បានចូលព្រះទិវង្គត ហើយព្រះបុត្រាព្រះអង្គមហាវិជ្ជីរ៉ា ឡុងកន បានឡើងស្នងរាជ្យបន្ត ។

យោងតាមពួួកអ្នកវិភាគថា ការឈរឈ្មោះរបស់ព្រះរៀមព្រះមហាក្សត្រ ពុំអាចសម្រេចដោយគ្មានការព្រមព្រៀងរបស់ព្រះបរមរាជវាំងឡើយ ដូច្នេះវាជាសញ្ញាមួយនៃការបែកបាក់ពុំធ្លាប់មានពីមុនមក ជាមួយពួកអាមាត្យនៃសម័យកាលព្រះចៅភូមីបុល ។ ម្ចាស់ក្សត្រីអង្គនោះឈរឈ្មោះតាមការជ្រើសរើសរបស់គណបក្សថៃរក្សាជាតិ(THAI RAKSA CHART) ជាគណបក្សស្និទ្ធលោកថាក់ស៊ីន សីុណាវ៉ាត្រា ។ មេដឹកនាំគណបក្សនេះ គឺលោក PREECHAPOL PONGPANICH អះអាងនៅចំពោះមុខអ្នកកាសែតច្រើននាក់ដែលមកចោមរោមការចុះឈ្មោះបេក្ខជនថា ការជ្រើសរើសនេះពិតជាសមស្រប ។

រយៈពេលប៉ុន្មានថ្ងៃចុងក្រោយនេះ មានលេចពាក្យចចាមអារ៉ាមពីការឈរឈ្មោះរបស់ម្ចាស់ក្សត្រីអង្គនោះ ។ ព្រះអង្គម្ចាស់ក្សត្រីអ៊ូបុល រតនា ពុំបង្ហាញមុខជាសាធារណៈឡើយ កាលពីថ្ងៃទី៨ កុម្ភៈ ។ ប៉ុន្តែកាលពីថ្ងៃទី៧ កុម្ភៈ តាមINSTAGRAM គេឃើញទ្រង់មានព្រះភ័ក្រ្តញញឹមពព្រាយ កាន់ផ្កាពណ៌ក្រហម ជាពណ៌របស់ពួកអ្នកគាំទ្រ លោកថាក់ស៊ីន នៅឯឈៀងម៉ៃ នាភាគខាងជើងប្រទេស ។

ពុំមានសែរាជវង្សណាម្នាក់ឈរឈ្មោះដណ្ដើមតំណែងនាយករដ្ឋមន្រ្តីឡើយ ចាប់តាំងពីមានរបបរាជានិយម អាស្រ័យរដ្ឋធម្មនុញ្ញតាំងពីឆ្នាំ១៩៣២មក ។ ចំណែកលោកប្រាយុទ្ធ ចាន់អូចា ប្រមុខរបបយោធាបញ្ចាក់ក្នុងសេចក្ដីប្រកាសមួយថា លោកទទួលយកការស្នើរបស់គណបក្សបល្ល័ង្កប្រជារ៉ាត (PHALANG PRACHARAT) ស្និទ្ធយោធា ដើម្បីក្លាយជានាយករដ្ឋមន្រ្តី ក្នុងករណីដែលគណបក្សនេះជាប់ឆ្នោតសភា។

លោកប្រាយុទ្ធ ចាន់អូចា និងម្ចាស់ក្សត្រីអ៊ូបុលរតនា គឺជាអ្នកប្រជែងគ្នាក្នុងការបោះឆ្នោតខាងមុខនេះ ។ ចលនាថៃរក្សាជាតិបង្កើតឡើងកាលពីខែវិច្ឆិកាឆ្នាំ២០១៨ ដោយពួកអ្នកដែលនៅតែស្មោះត្រង់នឹងលោកថាក់សីុន ។