ខេត្តសៀមរាប ៖ រថយន្តក្រុង៤៥កៅអីដឹកភ្ញៀវ១គ្រឿងម៉ាក Hyundai ពណ៌ឈាមជ្រូក គ្មានផ្លាកលេខ បើកបរក្នុងល្បឿនលឿនបើកបរច្រាស់ទិសគ្នាជាមួយម៉ូតូទាំង២គ្រឿងពីលិចមកកើត ខណៈពេលនោះឡើងវ៉ារថយន្តមួយគ្រឿងទៀតផុត ជ្រុលទៅបុកម៉ូតូកង់បីដែលអ្នកបើកបរបានគេចទៅអែបផ្លូវបណ្តាលឱ្យស្លាប់ស្ត្រីមានផ្ទៃពោះ៩ខែម្នាក់ភ្លាមៗ និងរបួស២នាក់រួមទាំងអ្នកបើកបរ…
ខេត្តសៀមរាប ៖ រថយន្តក្រុង៤៥កៅអីដឹកភ្ញៀវ១គ្រឿងម៉ាក Hyundai ពណ៌ឈាមជ្រូក គ្មានផ្លាកលេខ បើកបរក្នុងល្បឿនលឿនបើកបរច្រាស់ទិសគ្នាជាមួយម៉ូតូទាំង២គ្រឿងពីលិចមកកើត ខណៈពេលនោះឡើងវ៉ារថយន្តមួយគ្រឿងទៀតផុត ជ្រុលទៅបុកម៉ូតូកង់បីដែលអ្នកបើកបរបានគេចទៅអែបផ្លូវបណ្តាលឱ្យស្លាប់ស្ត្រីមានផ្ទៃពោះ៩ខែម្នាក់ភ្លាមៗ និងរបួស២នាក់រួមទាំងអ្នកបើកបរ រួចបន្តទៅបុកម៉ូតូ១គ្រឿងទៀតដែលជិះមានគ្នា២នាក់បណ្តាលឱ្យរបួសធ្ងន់ស្រាល ។
ហេតុការគ្រោះថ្នាក់ចរាចរណ៍នោះបានកើតឡើងនៅរសៀលវេលាម៉ោង១២និង៤០នាទី ថ្ងៃទី០៨ ខែកុម្ភៈ ឆ្នាំ២០១៩ ស្ថិតនៅចំណុចចន្លោះគីឡូម៉ែត្រលេខ៣២០ និង៣២១ ក្នុងភូមិប្រិយ៍ថ្មី សង្កាត់ ទឹកវិល ក្រុងសៀមរាប ។
តាមប្រភពពីមន្ត្រីនគរបាលចរាចរណ៍ជើងគោកនៃស្នងការនគរបាលខេត្តបានប្រាប់ថា ករណីគ្រោះថ្នាក់ចរាចរណ៍មួយបានកើតឡើងរវាងរថយន្ត១គ្រឿងម៉ាក HYUNDAI ពណ៌ឈាមជ្រូក គ្មានផ្លាកលេខ ប្រភេទ៤៥កៅអី អ្នកបើកបរដែលសមត្ថកិច្ចឃាត់ខ្លួនបានឈ្មោះ សួន គា ភេទប្រុស អាយុ៣០ឆ្នាំ រស់នៅភូមិកំពង់ស្វាយ សង្កាត់កំពង់ស្វាយ ក្រុងសេរីសោភ័ណ្ឌ ខេត្តបន្ទាយមានជ័យ ។
បើកបរមានទិសដៅពីលិចទៅកើតបានទៅបុកម៉ូតូកង់បីដែលបើកបរដោយឈ្មោះ រ័ត្ន ដារ៉ា (របួសស្រាល) រស់នៅភូមិគោកត្នោត សង្កាត់គោកចក ក្រុងសៀមរាប ដែលមានទិសដៅពីកើតទៅលិច និងដឹកមនុស្ស២នាក់ប្តីប្រពន្ធ ដែលបុរសជាប្តីមានឈ្មោះ ផាវ ឡែន អាយុ៣៧ឆ្នាំ (របួសធ្ងន់) និងប្រពន្ធឈ្មោះ លាក់ ព្រម អាយុ២៣ឆ្នាំ មានផ្ទៃពោះ៩ខែ(ស្លាប់) ទាំង២នាក់ រស់នៅភូមិព្រៃដង្ហើម ឃុំកែវពណ៌ ស្រុកពួក ខេត្តសៀមរាប ។
រថយន្ត និងម៉ូតូទាំង២គ្រឿងបើកបរបញ្ច្រាស់ទិសគ្នាពីលិចមកកើត ហើយរថយន្តនេះបានបន្តទៅបុកម៉ូតូ១គ្រឿងទៀតម៉ាក ហុងដា ធុនC125 ផ្លាកលេខ សៀមរាប 1S-0272 អ្នកបើកបរឈ្មោះ កេន ប៊ុនថន ភេទប្រុស អាយុ២២ឆ្នាំ (របួសស្រាល) និងអ្នកជិះពីក្រោយឈ្មោះ គិន ចាន់ធូ ភេទប្រុស អាយុ៥១ឆ្នាំ (របួសធ្ងន់) ទាំង២នាក់ រស់នៅភូមិខ្វៀន សង្កាត់គោកចក ក្រុង/ខេត្តសៀមរាប ។
មូលហេតុបណ្តាឱ្យមានគ្រោះចរាចរណ៍គឺមកពីរថយន្តបើកប្រជែងក្នុងស្ថានភាពគ្រោះថ្នាក់ បង្កឡើងដោយរថយន្តក្រុងឡើងវ៉ាឡានផ្សេងទៀត ខណៈពេលនោះម៉ូតូកង់បីដែលជិះមកពីមុខឃើញមិនស្រួលក៏គេចមកគៀនផ្លូវដី ពេលនោះរថយន្តក៏មកបុកម៉ូតូកង់បីដែលឌុប២នាក់ប្តីប្រពន្ធពោះធំមកពីមើលផ្ទៃពោះ នៅមន្ទីរពេទ្យកុមារអង្គរ និងម៉ូតូ១គ្រឿងទៀតដែលឌុបគ្នាបើកបរស្របទិសគ្នាជាមួយម៉ូតូកង់បីបណ្តាលឱ្យរបួសធ្ងន់ស្រាលផងដែរ នេះបើតាមសម្តីរបស់សមត្ថកិច្ចនគរបាលជំនាញ ។
ក្រោយពេលកើតហេតុកម្លាំងជំនាញបានចុះពិនិត្យ និងធ្វើការវាស់វែងសមត្ថកិច្ចបានឱ្យដឹងថា ចំពោះសាកសពត្រូវបានសមត្ថកិច្ចបានប្រគល់ឱ្យក្រុមគ្រួសារសពយកទៅធ្វើបុណ្យតាប្រពៃណីចំណែកអ្នករងរបួសបានបញ្ជូនមកព្យាបាលនៅមន្ទីរបង្អែកខេត្តសៀមរាប ។
បច្ចុប្បន្នអ្នកបើកបររថយន្តក្រុងឈ្មោះ សួន គា ភេទប្រុស អាយុ៣០ឆ្នាំ ត្រូវបានកម្លាំងនគរបាលជំនាញកំពុងរៀបចំកសាងសំណុំរឿងបញ្ជូនទៅតុលាការចាត់ការតាមនីតិវីច្បាប់ ៕
ចែករំលែកព័តមាននេះ