ខេត្តព្រះសីហនុ ៖ អនុប្រធានរដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ទូកនេសាទលើដែនសមុទ្រ ប្រមាណជាជាង ១៥០០…
ខេត្តព្រះសីហនុ ៖ អនុប្រធានរដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ទូកនេសាទលើដែនសមុទ្រ ប្រមាណជាជាង ១៥០០ គ្រឿង ត្រូវបានបំពាក់ ប្រព័ន្ធតាមដាននាវានេសាទ ហៅកាត់ថា VMS (Vessel Monitoring System) ដែលនឹងជួយដល់ការអភិរក្សតំបន់ត្រីពងផង និងជួយទូកនេសាទទាន់ពេលប្រសិនបើ ពួកគេមានឧបទ្ទវហេតុ ណាមួយកើតឡើង ។
កាលពីថ្ងៃទី ១៦ ខែធ្នូ ឆ្នាំ ២០២៥ លោក បួយ រតនា អនុប្រធានរដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ បានឱ្យដឹងទៀតថា ៖ «យើងបំពាក់ប្រព័ន្ធនេះទៅលើទូកនេសាទខ្នាតមធ្យម និងធំ ក្នុងគោលបំណង ដែលយើងអាចដឹងអំពីដំណើរ នៃទូកប្រសិនជាពួកគាត់បានចូលដល់ដែនទឹក ឬតំបន់អភិរក្ស ឬតំបន់គ្រប់គ្រងជលផលសមុទ្រ ដែលនេះអាចជួយកាត់បន្ថយការនេសាទខុសច្បាប់ផងដែរ ។ មួយវិញទៀត ប្រសិនជាទូកនេសាទរបស់ពួកគាត់ជួបបញ្ហា ឬឧបទ្ទវហេតុណាមួយ នោះខាងអាជ្ញាធរ និងក្រុមការងារអាចជួយពួកគាត់ទាន់ពេលវេលា ទាំងនេះជាចំណុចសំខាន់ក្នុងការបំពាក់ប្រព័ន្ធនេះ» ។
លោក បួយ រតនា ក៏បានបន្ថែមថា ៖ «ក្នុងរយៈពេល ៥ឆ្នាំកន្លងមកនេះ យើងធ្វើការប្រយុទ្ធប្រឆាំងនឹងការនេសាទខុសច្បាប់ ហើយសកម្មភាពមួយ ក្នុងចំណោមសកម្មភាព ៣០ ដែលយើងត្រូវអនុវត្តន៍នោះ ពេលនេះដល់ដំណាក់កាលដាក់ប្រព័ន្ធតាមដាន (VMS) ដល់ទូកនេសាទខ្នាតធំ និងទូកនេសាទខ្នាតមធ្យម ។ យើងបានដាក់ផែនការសម្រាប់ឆ្នាំ ២០២៤ យើងបានបំពាក់ឱ្យបាន ៨០០គ្រឿង និង ឆ្នាំ ២០២៥ នេះ យើងបានបំពាក់ឱ្យបាន ៨០០គ្រឿងទៀត សរុបទាំងអស់ជាង ១៥០០ គ្រឿង ។ សម្រាប់ទូកខ្នាតធំ យើងមានតែ ១០គ្រឿងទេ គឺនៅខេត្តកោះកុង ។ បច្ចុប្បន្នយើងធ្វើបាន ៤ ទីតាំងហើយ ដែលបានហ៊ាមឃាត់អ្នកនេសាទកុំឱ្យចូលក្នុងតំបន់អភរក្ស ឬតំបន់ត្រីពង ដោយទីតាំងទាំងនោះ រួមមាន ៖ ២កន្លែងនៅខេត្តកែបនិងកំពង់សោម, មួយកន្លែងទៀតនៅប្រជុំកោះរ៉ុងសន្លឹម ក្នុងក្រុងព្រះសីហនុ និងតំបន់ការពារត្រីពងកូនខេត្តកោះកុង» ។
សូមជម្រាបផងដែរថា ច្បាប់ថ្មីនៃការនេសាទលើដែនសមុទ្រ ទូកនេសាទទាំងខ្នាតមធ្យម និងធំត្រូវតែអនុវត្តន៍ចុះបញ្ជី (ត្រូវតែមានលេខ) បង់ថ្លៃឈ្នួលដែននេសាទ (ព្រោះការរកស៊ីត្រូវបង់ពន្ធជូនរដ្ឋ) និងត្រូវតែបំពាក់ប្រព័ន្ធតាមដាននាវានេសាទ (VMS) ។ សម្រាប់ទូកខ្នាតតូចមិនតម្រូវឱ្យបង់ថ្លៃអ្វីនោះទេ ត្រឹមតែទៅចុះឈ្មោះមានលេខគឺបានហើយ ។
លោក អែម ដាំ ជាអ្នកនេសាទម្នាក់ក្នុងចំណោមប្រជានេសាទជាច្រើនពាន់នាក់ បានឱ្យដឹងថា ៖ «ខ្ញុំគិតថា ខាងមន្ទីរបំពាក់ឧបករណ៍នេះល្អ ព្រោះកាលនៅឆ្នាំ ២០១៤ ទូករបស់ខ្ញុំបានលេចតគ្នា ២ ខ្ញុំក៏បានតេហៅអាជ្ញាធរមានសម្ថតកិច្ច (ប៉ូលីសជើង ឬខាងបង្ក្រាប) ដូចនេះគេទៅចំគោលដៅ ហើយជួយយើងទាន់ពេល ។ ម្យ៉ាងវិញទៀត ប្រសិនយើងបំពាក់ឧបករណ៍នេះហើយ ពេលយើងបើកចូលដែនសមុទ្រគេ នោះវានឹងរោទិ៍សញ្ញាឱ្យយើងដឹង ហើយប្រសិនយើងបើកចូលកន្លែងអភិរក្សក្នុងប្រទេសយើងក៏វារោទិ៍ឱ្យដឹងផងដែរ» ។
អ្នកនេសាទដែលមានទូកខ្នាតមធ្យម ១០ទូក រូបនេះ បានផ្តាំផ្ញើទៅអ្នកនេសាទដទៃថា ប្រជានេសាទទាំងអស់គួរតែសហការដាក់ប្រព័ន្ធនេះ ដើម្បីសហការជាមួយអាជ្ញាធរមានសម្ថតកិច្ចផង និងជួយអាយុជីវិតយើងផង ។
លោក Koen Everaert លេខាធិការទីមួយ និងជាអនុប្រធានផ្នែកសហប្រតិបត្តិការ នៃគណៈប្រតិភូសហភាពអឺរ៉ុប បានកត់សម្គាល់ថា ៖ «សហភាពអឺរ៉ុបមានសេចក្តីសោមនស្សរីករាយ ក្នុងការសហការជាមួយរាជរដ្ឋាភិបាលកម្ពុជា លើកម្មវិធី EU-CAPFISH-Capture “កម្មវិធីជំរុញកំណើនវិស័យជលផលប្រកបដោយចីរភាព និងបរិយាបន្ន (ផ្នែកនេសាទ) ការពង្រឹងការងារគ្រប់គ្រងជលផលសមុទ្រ និងតំបន់ឆ្នេរដោយប្រើប្រាស់ប្រព័ន្ធឌីជីថលក្នុងការតាមដាន ត្រួតពិនិត្យ គ្រប់គ្រងនិងឃ្លាំមើល” ដែលជាការវិនិយោគដ៏សំខាន់មួយ នៅក្នុងវិស័យជលផល ។ ថ្ងៃនេះយើងបង្ហាញពីវឌ្ឍនភាពដែលបានធ្វើឡើងក្នុងការត្រួតពិនិត្យ និងអនុវត្តតាមបែបឌីជីថល តាមរយៈប្រព័ន្ធត្រួតពិនិត្យនាវានេសាទ (VMS) ។ ជាមួយនឹងប្រព័ន្ធនេះ ជលផលនៅកម្ពុជានាពេលបច្ចុប្បន្នអាចធានាទិន្នន័យបំពេញតម្រូវ ការតាមច្បាប់ពាណិជ្ជកម្មអន្តរជាតិ ។ ឧបករណ៍អភិបាលកិច្ចនេះនឹងបង្កើនសុវត្ថិភាពនៅសមុទ្រ កែលម្អការអភិរក្សធនធាន និងជួយធានាបាននូវនិរន្តរភាពរយៈពេលវែងរបស់វិស័យនេះ» ។
សូមជម្រាបផងដែរថា ប្រព័ន្ធត្រួតពិនិត្យនាវានេសាទ (VMS) បានដំឡើងឧបករណ៍ចំនួន ១៧២៥ នៅលើនាវានេសាទ ដើម្បីគូសផែនទីតំបន់ ដែលមានហានិភ័យខ្ពស់ កំណត់ស្តង់ដារថ្មីសម្រាប់ទូកល្បាត និងគាំទ្រដល់ប្រទេសកម្ពុជា ក្នុងការកំណត់យកខេត្តកោះកុង ជាកំពង់ផែដំបូងគេដែលអនុលោមតាម កិច្ចព្រមព្រៀងវិធានការរដ្ឋម្ចាស់កំពង់ផែ PSMA ។ បន្ថែមពីនេះ «កម្មវិធីជំរុញកំណើនវិស័យជលផលប្រកបដោយចីរភាព និងបរិយាបន្ន (ផ្នែកនេសាទ) ការពង្រឹងការងារគ្រប់គ្រងជលផលសមុទ្រ និងតំបន់ឆ្នេរដោយប្រើប្រាស់ប្រព័ន្ធឌីជីថល ក្នុងការតាមដាន ត្រួតពិនិត្យ គ្រប់គ្រងនិងឃ្លាំមើល» បានរួមចំណែកដល់ការធ្វើបច្ចុប្បន្នភាពផែនការអនុវត្តច្បាប់ជលផលជាតិ និងគាំទ្រដល់ការធ្វើផែនការដ៏ទូលំទូលាយ សម្រាប់ការគ្រប់គ្រងការនេសាទ ទាំងឆ្នេរសមុទ្រ និងទឹកសាប ៕
ចែករំលែកព័តមាននេះ