ទីក្រុងសេអ៊ូល៖ ប្រមុខការទូតចិន លោកវ៉ាងយី ដែលកំពុងបំពេញទស្សនកិច្ចនៅកូរ៉េខាងត្បូង បាននិយាយក្រើនរំលឹករដ្ឋាភិបាលប្រទេសនេះថាកុំលេងល្បែងចូលទៅខាងប្រទេសមហាអំណាចមួយ ហើយទុកចោលមួយ ពោលគឺកុំចូលខាងអាមេរិកទុកចោលចិន ឬចូលខាងចិនទុកចោលអាមេរិក។ ម៉្យាងទៀត លោកក៏សូមផ្ដាំទៅអាមេរិកគួរណាស់បោះបង់ចោលនូវអ្វីដែលលោកហៅថាជានយោបាយយកគ្នាធ្វើជាសត្រូវជាមួយកូរ៉េខាងជើង។ លោកយល់ថាលុះត្រាតែធ្វើបែបនេះបានទើបអាចបន្ធូរបន្ថយភាពតានតឹងនៅឧបទ្វីបកូរ៉េ។ លោកថ្លែងដូចខាងលើនេះនៅក្នុងកិច្ចជំនួបជាមួយទីប្រឹក្សាសន្តិសុខជាតិកូរ៉េខាងត្បូង លោកវីស៊ុងឡាក់ នៅទីក្រុងសេអ៊ូល។ លោកក៏បានជួបពិភាក្សាការងារជាមួយប្រធានាធិបតីកូរ៉េខាងត្បូង លោកលីជេម្យុងផងដែរ។ នេះបើយោងតាមទីភ្នាក់ងារព័ត៌មានចិនស៊ីនហួ។
មូលដ្ឋានគ្រឹះសម្រាប់ដោះស្រាយភាពតានតឹងនៅឧបទ្វីបកូរ៉េស្ថិតនៅលើការរកឱ្យឃើញនូវប្រភពឫសគល់នៃបញ្ហា និងស្ថិតនៅលើអាមេរិកបោះបង់ចោលនយោបាយយកគ្នាធ្វើជាសត្រូវជាមួយកូរ៉េខាងជើង។ ប្រទេសចិនសង្ឃឹមថាកូរ៉េខាងត្បូងនឹងពង្រឹងជំហរខ្លួនឯងឱ្យមានស្វ័យភាពពិតប្រាកដ, ជៀសវាងមិនចូលរួមលេងល្បែងប្រទាញប្រទង់គ្នារវាងប្លុកនយោបាយមួយ និងប្លុកនយោបាយមួយទៀត ឬចូលទៅក្នុងប្លុកណាមួយ និងបន្តអភិវឌ្ឍទំនាក់ទំនងជាមួយប្រទេសមហាអំណាចធំៗដូចធម្មតាដោយមិនប្រកាន់ថាចិន ឬអាមេរិកនោះទេ។ ប្រសាសន៍របស់លោកវ៉ាងយីដូចខាងលើនេះធ្វើឡើងបន្ទាប់ពីលោកដូណាល់ត្រាំកាលពីម្សិលមិញប្រកាសថាលោកមានគម្រោងជួបលោកគីមជុងអ៊ុននៅចុងឆ្នាំនេះ។ លោកអះអាងថាកូរ៉េខាងជើងឥឡូវនេះមាននុយក្លេអ៊ែរដ៏មានអានុភាពខ្លាំងក្លាចំនួន៥៧គ្រាប់នៅក្នុងដៃ។
លោកត្រាំបញ្ជាឱ្យមន្ត្រីជាន់ខ្ពស់នៃមន្ទីរបញ្ចកោណកាត់បន្ថយទំហំនៃសមយុទ្ធយោធារួមគ្នារវាងអាមេរិក និងកូរ៉េខាងត្បូងព្រោះសមយុទ្ធយោធានេះចុះថវិកាជាតិច្រើនណាស់ និងម៉្យាងទៀត វាជាសញ្ញានៃការយកគ្នាធ្វើជាសត្រូវ ខណៈដែលលោកកំពុងមានទំនាក់ទំនងល្អជាមួយលោកគីមជុងអ៊ុន។ អាមេរិកនៅតែប្រកាន់ជំហរជាផ្លូវការរបស់ខ្លួនដដែលគឺចង់ឃើញកូរ៉េខាងជើងកាត់រំសាយកម្មវិធីនុយក្លេអ៊ែររបស់ខ្លួន។ ប៉ុន្តែបំណងប្រាថ្នានេះត្រូវរបបក្រុងព្យុងយ៉ាងច្រានចោលយ៉ាងដាច់អហង្ការ។ កូរ៉េខាងត្បូងចេញសេចក្ដីប្រកាសថ្កោលទោសទង្វើរបស់កូរ៉េខាងជើងដែលទើបតែបាញ់មីស៊ីលផ្លោងរយៈចម្ងាយខ្លីដប់គ្រាប់នៅថ្ងៃនេះ។ ដូច្នេះ កូរ៉េខាងត្បូងបញ្ជាឱ្យកងទ័ពរបស់ខ្លួនត្រៀមលក្ខណៈសម្បត្តិដើម្បីការពារខ្លួននៅពេលកំពុងធ្វើសមយុទ្ធយោធារួមគ្នា។
លោកវ៉ាងយីថ្លែងថាប្រទេសចិនមានចិត្តរីករាយណាស់ប្រសិនបើឧបទ្វីបកូរ៉េវិលទៅរកការរួមរស់ជាសន្តិសហវិជ្ជមានរវាងប្រទេសបងប្អូនគូសត្រូវកូរ៉េទាំង២។ លោកក៏បានអំពាវនាវឱ្យចាប់ផ្ដើមសន្ទនាគ្នាឡើងវិញ និងកសាងទំនុកចិត្តគ្នាទៅវិញទៅមក។ លោកបានអញ្ជើញលោកវីស៊ុងឡាក់បំពេញទស្សនកិច្ចនៅប្រទេសចិន។ ជាកិច្ចឆ្លើយតប លោកវីស្នើសុំឱ្យលោកវ៉ាងយីចូលរួមកិច្ចសហប្រតិបត្តិការបែបស្ថាបនាក្នុងការរៀបចំគោលនយោបាយរបស់កូរ៉េខាងត្បូងចំពោះកូរ៉េខាងជើង។ រដ្ឋាភិបាលទីក្រុងសេអ៊ូលកំពុងព្យាយាមរកឱកាសបើកការសន្ទនាគ្នាឡើងវិញជាមួយរបបក្រុងព្យុងយ៉ាង ក៏ដូចជាអំពាវនាវឱ្យមានការកាត់រំសាយកម្មវិធីនុយក្លេអ៊ែររបស់កូរ៉េខាងជើងប្រកបដោយជំហានហ្មត់ចត់ និងធ្វើឡើងជាដំណាក់កាលៗ។ នៅក្នុងការពិភាក្សាគ្នាដាច់ដោយឡែកជាមួយប្រធានាធិបតីកូរ៉េខាងត្បូង លោកវ៉ាងយីសូមជំរុញឱ្យរដ្ឋាភិបាលប្រទេសនេះបន្តប្រកាន់ខ្ជាប់នូវនយោបាយមិត្តភាពជាមួយប្រទេសចិន។
លោកថ្លែងថាទំនាក់ទំនងទ្វេភាគីរវាងប្រទេសទាំង២បានវិលត្រឡប់មកដូចដើមវិញហើយ ហើយរឹតតែរីកចម្រើនបន្ថែមទៀតនៅក្នុងឆ្នាំនេះបន្ទាប់ពីមានកិច្ចជំនួបកំពូលរវាងលោកលីជេម្យុង និងលោកស៊ីជីនពីង។ លោកថាគោលនយោបាយបែបវិជ្ជមាន, ប្រាកដនិយម និងសុភវិនិច្ឆ័យរបស់កូរ៉េខាងត្បូងចំពោះប្រទេសចិនគឺស្របទៅតាមការចង់បានរបស់ប្រជាជនកូរ៉េខាងត្បូង និងកាលៈទេសៈសង្គម។ លោកវ៉ាងយីក៏ស្នើសុំឱ្យពន្លឿនការចរចាជុំទី២ដើម្បីសម្រេចឱ្យបានកិច្ចព្រមព្រៀងពាណិជ្ជកម្មសេរីរវាងប្រទេសទាំង២ផងដែរ។ លោកថាប្រទេសទាំង២គួរណាស់ខិតខំលើកកម្ពស់សមាហរណកម្មសេដ្ឋកិច្ចនៅក្នុងតំបន់នៅក្នុងស្ថានភាពដែលពិភពលោកកំពុងប្រឈមនឹងការប្រេះឆាសេដ្ឋកិច្ច និងនយោបាយគាំពារនិយមពាណិជ្ជកម្មកាន់តែខ្លាំងឡើងៗ។ លោកលីជេម្យុងជម្រាបជូនលោកវ៉ាងយីថាកូរ៉េខាងត្បូងសម្រេចបានសមិទ្ធផលរូបីក្នុងការស្ដារទំនាក់ទំនងទ្វេភាគីពេញលេញឡើងវិញ។ លោកសន្យាថានឹងគាំទ្រកិច្ចខិតខំប្រឹងប្រែងរបស់ប្រទេសចិនក្នុងការរៀបចំកិច្ចប្រជុំកំពូលអេប៉ិចនៅទីក្រុងស៊ឹនចិននាចុងឆ្នាំនេះ៕ ប្រភព៖ Reuters
ចែករំលែកព័តមាននេះ