ប្រទេសអារ៉ាប៊ីសាអូឌីត ៖ តាមភស្ដុតាងនានាប្រមូលដោយបេសកកម្មស៊ើបអង្កេតអ.ស.បបង្ហាញថា អ្នកកាសែតអារ៉ាប៊ីសាអូឌីត លោកJAMAL KHASHOGGI ជាអ្នករងគ្រោះដោយសារការធ្វើឃាតយ៉ាងសាហាវ គិតទុកជាមុន រៀបចំ និងប្រព្រឹត្តដោយពួកមន្ត្រីនៃប្រទេសអារ៉ាប៊ីសាអូឌីត។
លោកស្រីAGNES CALLAMARD ដែលអ.ស.ប ចាត់តាំងឲ្យដឹកនាំការសើុបអង្កេតឯករាជ្យរបស់អន្តរជាតិ លើការស្លាប់អ្នកកាសែតប្រឆាំងរូបនោះ បញ្ជាក់កាលពីថ្ងៃទី៧កុម្ភៈថា ក្រុមរបស់លោកស្រីបានប្រមូលបណ្ដាភស្ដុតាង ដែលពួកភ្នាក់ងារសើុបការណ៍តួកគីអាចប្រមូលបាន។ បេសកកម្មសើុបអង្កេតនោះដែលស្ថិតនៅប្រទេសតួកគីរយៈពេលមួយសប្ដាហ៍ ពីថ្ងៃទី២៨មករាដល់ថ្ងៃទី៣កុម្ភៈ បានបរិហារម្យា៉ងទៀតថា អារ៉ាប៊ីសាអូឌីតបានខិតខំរារាំងតួកគី ក្នុងការស៊ើបអង្កេត លើការសម្លាប់អ្នកកាសែតរូបនេះ ក្នុងស្ថានកុងស៊ុលអារ៉ាប៊ីសាអូឌីត ប្រចាំក្រុងអីុស្ដង់ប៊ុល។
ក្នុងសេចក្ដីប្រកាសមួយលោកស្រីAGNES CALLAMARD និយាយថា បណ្ដាភស្ដុតាងដែលប្រមូលបាននៅតួកគីបង្ហាញថា លោកKHASHOGGI ត្រូវសម្លាប់យ៉ាងសាហាវព្រៃផ្សៃបំផុតនិងមានការគ្រោងទុកជាមុន រៀបចំដោយបណ្ដាអ្នកទទួលខុសត្រូវ នៃរដ្ឋអារ៉ាប៊ីសាអូឌីត។ អ្នកសើុបអង្កេតរូបនោះបន្តថា អាជ្ញាធរអារ៉ាប៊ីសាអូឌីត ខិតខំបំផ្លាញធ្ងន់ធ្ងរនិងធ្វើឲ្យមានការយឺតយ៉ាវរយៈពេល១៣ថ្ងៃ ការប៉ុនប៉ងរបស់តួកគី ដើម្បីសើុបអង្កេតលើឆាកនៃអំពើឧក្រិដ្ឋនោះ។
លោកKHASHOGGIជាអ្នកកាសែតអារ៉ាប៊ីសាអូឌីត ដែលរិះគន់ខ្លាំងបំផុតនយោបាយរបស់ព្រះអង្គម្ចាស់រជ្ជទាយាទ MOHAMED BEN SALMAN បានត្រូវស្លាប់កាលពីថ្ងៃទី២តុលា ក្នុងទីតាំងស្ថានកុងស៊ុលអារ៉ាប៊ីសាអូឌីត ប្រចាំក្រុងអីុស្តង់ប៊ុល។ ផែនការសម្លាប់អ្នកកាសែតរូបនោះ គឹការបញ្ជូនមនុស្ស៣ក្រុមឲ្យធ្វើប្រតិបត្តិការសម្លាប់ ដោយសាកសពរបស់ជនរងគ្រោះបាត់រកពំុឃើញឡើយ ហើយគេសន្និដ្ឋានថាសាកសពរបស់គេ ត្រូវរំលាយចោលក្នុងទឹកអាសីុតហើយបង្ហូរចោលតាមលូ។
ព្រះអង្គម្ចាស់រជ្ជទាយាទBEN SALMAN បើតាមកាសែតញូវយ៉កថែមថា ធ្លាប់បានថ្លែងទៅកាន់ទីប្រឹក្សាទ្រង់កាលពីឆ្នាំ២០១៧ថា ទ្រង់នឹងប្រើគ្រាប់កាំភ្លើង១គ្រាប់ សម្លាប់អ្នកកាសែតលោកKHASHOGGI ប្រសិនបើជននោះពុំវិលមកកាន់ប្រទេសវិញ ហើយពុំព្រមបញ្ចប់ការវាយប្រហាររិះគន់ទ្រង់ទេនោះ។
យោងតាមកាសែតនោះ ដែលដកស្រង់ប្រភពព័ត៌មានអាមេរិកនិងបរទេសជាច្រើនថាពាក្យពេចន៍ទាំងនោះ របស់ព្រអង្គម្ចាស់BEN SALMAN ចាប់បានដោយបណ្ដាភ្នាក់ងារសើុបការណ៍អាមេរិក ដែលបង្ហាញពីបំណងចង់សម្លាប់លោកKHASHOGGIតាមវិធីផ្សេងៗ។
បណ្ដាសមាជិកសភាអាមេរិក ទាំងគណបក្សសាធារណរដ្ឋ ទាំងគណបក្សប្រជាធិបតេយ្យ កាលពីថ្ងៃទី៧កុម្ភៈ បានដាក់សំណើច្បាប់មួយ ដែលហាមឃាត់ការលក់អាវុធ ហើយដាក់ទណ្ឌកម្ម ប្រឆាំងបណ្ដាមេដឹកនាំអារ៉ាប៊ីសាអូឌីត ដែលជាអ្នកទទួលខុសត្រូវ លើការធ្វើឃាតលោកKHASHOGGI។ ចំណែកប្រធានាធិបតីអាមេរិកលោកដូណាល់វិញ គ្រោងប្រកាសថាតើនរណាជាអ្នកសម្លាប់អ្នកកាសែតរូបនោះ នាថ្ងៃទី៨កុម្ភៈ៕
ចែករំលែកព័តមាននេះ