រាជធានីភ្នំពេញ ៖ ទោះបីជាយ៉ាងណា ការចេញមុខបកស្រាយថា «ខ្លួនបានវាយនិងខោកឈ្មោះចំប៉ីខ្មៅនេះ គឺខុសស្រឡះពីគ្នា ដោយយុវជនម្នាក់នេះបានវាយនិងខោកក្បាលខ្ទើយម្នាក់ កាលពីវេលាម៉ោងប្រមាណ១០យប់ថ្ងៃទី៤ ខែកុម្ភៈ នៅខាងក្រោយព្រះបរមរាជវាំង…
រាជធានីភ្នំពេញ ៖ ទោះបីជាយ៉ាងណា ការចេញមុខបកស្រាយថា «ខ្លួនបានវាយនិងខោកឈ្មោះចំប៉ីខ្មៅនេះ គឺខុសស្រឡះពីគ្នា ដោយយុវជនម្នាក់នេះបានវាយនិងខោកក្បាលខ្ទើយម្នាក់ កាលពីវេលាម៉ោងប្រមាណ១០យប់ថ្ងៃទី៤ ខែកុម្ភៈ នៅខាងក្រោយព្រះបរមរាជវាំង និងធ្វើឡើងតែម្នាក់ឯងប៉ុណ្ណោះ ។
ចំណែកឯករណីជនមិនស្គាល់មុខ៣នាក់ ជិះម៉ូតូមួយគ្រឿងឌុបគ្នាធ្វើសកម្មភាពខោកក្បាលជនភេទទី៣ឈ្មោះ យិន ហេង ហៅចំប៉ីខ្មៅនោះ គឺកើតឡើងនៅវេលាម៉ោងប្រមាណ៨យប់ទេ នៅម្តុំមុខព្រះបរមរាជវាំង មិនមែននៅខាងក្រោយព្រះបរមរាជវាំង ដូចការអះអាងរបស់គេឡើយ ហើយពេលវេលាក៏កើតឡើងខុសគ្នាដែរ ។
ក្រោយពីនគរបាលខណ្ឌដូនពេញធ្វើការសាកសួរហើយ រូបគេហាក់បីដូចជាឆ្លើយម្តងបែបនេះម្តងបែបនោះ ធ្វើឱ្យម្នាក់ៗតែគិតថា អាចមកពីរូបគេជាមនុស្សប្រើប្រាស់គ្រឿងញៀនច្រើនហួសកម្រិត និងទំនងជាបែកថ្នាំឬក៏សតិមិនគ្រប់ (សរសៃប្រសាទ) ទើបគេចេញមុខមកសារភាព និងនិយាយបែបរវើរវាយយ៉ាងនេះ ។
ដោយមានការសង្ស័យ សមត្ថកិច្ចបានធ្វើតេស្តទឹកនោមរកសារធាតុញៀនលើយុវជនម្នាក់នោះផងដែរ តែជាលទ្ធផល គឺគ្មានសារធាតុញៀនទេ ហើយក៏មិនមានពាក់ព័ន្ធទៅនឹងការប្រើប្រាស់ថ្នាំញៀនដែរ ។ ការចូលខ្លួនមកនេះ ធ្វើឡើងក្រោយពីរូបគេទើបតែបានបង្ហោះលើបណ្តាញសង្គមហ្វេសបុ៊ករបស់ខ្លួនដោយសរសេរពាក្យមួយឃ្លាថា «វាយខ្ទើយមានអ្វីមិនល្អ» រួចហើយនោះ ។
ក្នុងពេលនោះដែរ យុវជនម្នាក់ខាងលើ ក៏បានធ្វើការសុំទោសជាសារធារណៈចំពោះកំហុសខុសឆ្គងរបស់ខ្លួនទៅដល់បងប្អូនប្រជាពលរដ្ឋទាំងអស់ ពាក់ព័ន្ធទៅនឹងករណីខោកក្បាលបុរសភេទទី៣ឈ្មោះ យិន ហេង ហៅចំប៉ីខ្មៅម្នាក់នេះផងដែរ ។ ក្រោយពីឆ្លងកាត់ការសាកសួរអស់រយៈពេលជាង៤ម៉ោង យកជាការមិនបាន និងដោយគ្មានបុគ្គលណាម្នាក់ប្តឹងពីរូបគេនោះ ទើបសមត្ថកិច្ចសម្រេចធ្វើការណែនាំ និងដោះលែងរូបគេឱ្យវិលត្រឡប់ទៅផ្ទះវិញផងដែរ ។
គួរបញ្ជាក់ថា យុវជនភេទទី៣ឈ្មោះ យិន ហេង ហៅចំប៉ីខ្មៅ ត្រូវបានសមត្ថកិច្ចចាប់ឃាត់ខ្លួនកាលពីវេលាម៉ោង៨និង១៥នាទីយប់ថ្ងៃទី៥ ខែកុម្ភៈ នៅក្នុងហាងកាហ្វេ Amazon ដែលមានទីតាំងនៅតាមវិថីព្រះស៊ីសុវត្ថិ កែងផ្លូវលេខ១៨៤ ក្នុងសង្កាត់ជ័យជំនះ ខណ្ឌដូនពេញ ក្រោយពីរូបគេបានបង្ហោះវីដេអូឃ្លីបមួយលើបណ្តាញសង្គមហ្វេសបុ៊ក ដោយឈរជេរប្រទេចនិងដាក់បណ្តាសាដល់ពូជសាសន៍ខ្មែរដែលជាពាក្យអសុរោះបំផុត នៅខាងមុខព្រះបរមរាជវាំង ទៅលើបុរស៣នាក់ថា បាននាំគ្នាជិះម៉ូតូមួយគ្រឿងមកខោកក្បាលគេ បណ្តាលឱ្យពកថ្ងាស ។
រលកប្រតិកម្មប្រៀបដូចស៊ូណាមិ បានបោកបក់កក្រើកបណ្តាញសង្គមនៅព្រឹកថ្ងៃទី៥ ខែកុម្ភៈ ដោយសម្តែងនូវការមិនពេញចិត្ត និងនាំគ្នាថ្កោលទោសដល់ខ្ទើយមាត់ស្អុយ ចំប៉ីខ្មៅ ម្នាក់នេះគ្រប់ៗគ្នា ហើយក៏ត្រូវបានសមត្ថកិច្ចធ្វើការស្រាវជ្រាវចាប់ឃាត់ខ្លួនបញ្ជូនទៅកាន់សាលាដំបូង នារសៀលថ្ងៃទី៦ ខែកុម្ភៈ និងបញ្ជូនទៅពន្ធនាគារព្រៃសនាយប់ថ្ងៃដដែលនោះ ក្រោយការអនុវត្តនីតិវិធីច្បាប់ដោយជាប់ចោទពីបទញុះញង់ឱ្យមានការរើសអើង ។
ចែករំលែកព័តមាននេះ