រាជធានីភ្នំពេញ ៖ យុវជនម្នាក់ជិះម៉ូតូអាយខុន ពណ៌ត្រួយចេក រួមជាមួយមិត្តភក្តិ២នាក់ទៀត ជិះម៉ូតូហុងដាឌ្រីម ត្រូវបានក្មេងទំនើងមួយក្រុមទៀតព្រួតវាយនឹងកាប់ បណ្តាលអោយរងរបួសធ្ងន់ជិតដាច់ដៃ ហេតុការណ៍នេះបានកើតឡើង កាលពីវេលាម៉ោង១និង៣០នាទីរំលងអធ្រាត្រឈានចូលថ្ងៃទី៨ ខែកុម្ភៈ ឆ្នាំ២០១៩ តាមបណ្តោយផ្លូវ៦១៤កែងផ្លូវ៦០៩ នៅចំណុចមុខផ្ទះសំណាក់ស្រែលាភ ស្ថិតនៅក្នុងសង្កាត់បឹងកក់២ ខណ្ឌទួលគោក ។
សាក្សីដែលឃើញហេតុការណ៍បានអោយដឹងថា មុនពេលកើតហេតុគេបានឃើញបុរសម្នាក់ជាជនរងគ្រោះមិនស្គាល់អត្តសញ្ញាណជិះម៉ូតូអាយខុន ពណ៌ត្រួយចេក ពាក់ស្លាកលេខភ្នំពេញ 1AR-5387 រួមនឹងមិត្តភក្តិ២នាក់ទៀតជិះម៉ូតូមួយគ្រឿងម៉ាកហុងដាឌ្រីម ពណ៌ខ្មៅ សេរី២០១៣ មិនចាំស្លាកលេខ បើកបរតាមបណ្តោយផ្លូវ៦០៩ មិនដឹងថា ពួកគេទាំងនោះទើបតែចេញមកពីណានោះទេ ខណៈពេលជនរងគ្រោះជិះមកដល់ចំណុចកើតហេតុមុខផ្ទះសំណាក់ស្រែលាភ ក៏ស្រាប់តែលេចមុខជនបង្កមួយក្រុមមានគ្នាជិត២០នាក់ ជិះ ម៉ូតូ១០គ្រឿង បានជិះប្រដេញកាប់គ្នាមានទាំងដុំថ្ម និងខ្សែក្រវ៉ាតកាប់ត្រូវចំជនរងគ្រោះម្នាក់ដែលជិះម៉ូតូអាយខុន បណ្តាលអោយរងរបួសធ្ងន់ជិតដាច់កដៃខាងឆ្វេង ។
ចំណែកមិត្តភក្តិ២នាក់ទៀតរបស់ជនរងគ្រោះបានជិះម៉ូតូរត់គេចខ្លួនបាត់ស្រមោល ចំនែកឯខាងភាគីបង្កវិញបានវ៉ៃម៉ូតូអោយខ្ទេច រួចរត់គេចខ្លួនបាត់ស្រមោល ភ្លាមៗនោះដែររថយន្តសង្គ្រោះរបស់គ្លីនិកហុងហាក់បានមកដល់ដឹកយកជនរងគ្រោះយកទៅព្យាបាល ។ក្រោយពេលកើតហេតុម៉ូតូរបស់ជនរងគ្រោះត្រូវបានសមត្ថកិច្ចយកទៅរក្សាទុកនៅប៉ុស្តិ៍បឹងកក់២ ៕
ចែករំលែកព័តមាននេះ