ខេត្តបាត់ដំបង៖ គិតត្រិមម៉ោង១១ថ្ងៃត្រង់ ថ្ងៃទី ៣១ ធ្នូ ជនភៀសសឹកប្រមាណចន្លោះពី៥០ ទៅ ៦០% បានវិលត្រឡប់ទៅកាន់ផ្ទះសម្បែងវិញហើយ ក្រោយបទឈប់បាញ់៧២ម៉ោង…
ខេត្តបាត់ដំបង៖ គិតត្រិមម៉ោង១១ថ្ងៃត្រង់ ថ្ងៃទី ៣១ ធ្នូ ជនភៀសសឹកប្រមាណចន្លោះពី៥០ ទៅ ៦០% បានវិលត្រឡប់ទៅកាន់ផ្ទះសម្បែងវិញហើយ ក្រោយបទឈប់បាញ់៧២ម៉ោង បានអស់សុពលភាព។ នេះបើតាមលោកអភិបាលខេត្ត បានបញ្ជាក់ប្រាប់កោះសន្តិភាពតាមទូរស័ព្ទ។
អភិបាលខេត្តបាត់ដំបង លោក សុខ លូ បានមានប្រសាសន៏ថា ប្រជាពលរដ្ឋ ដែលភៀសសឹកមកណីតាមបណ្ដាស្រុកនានា នៅភាគខាងលិច នៃខេត្តបាត់ដំបង បានចាប់ផ្ដើមវិលត្រឡប់ទៅកាន់លំនៅឋានរបស់ពួកគាត់រៀងៗខ្លួន ប្រមាណចន្លោះពី៥០ ទៅ ៦០% ហើយ បើគិតត្រិមម៉ោង១១ថ្ងៃត្រង់នេះ។ លោកបានបញ្ជាក់ថា ពួកគាត់ចាប់ផ្ដើមវិលត្រឡប់ទៅស្រុកកំណើតវិញ បន្ទាប់ពីបទឈប់បាញ់ចំនួន៧២ម៉ោង ត្រូវបានបញ្ចប់។ ពួកគាត់ប្រហែលមិនមិនត្រឡប់មកវិញជាថ្មីទេ ព្រោះពេលនេះនៅពុំមានបន្ទាត់ក្រហមត្រង់ចំណុចណា ដែលគូរឲ្យគាត់ព្រូយបារម្ភពីសុវត្ថិភាពទៀតទេ។
បើទោះជាលោកអភិបាលខេត្ត បង្ហាញនូវសុទិដ្ឋិនិយមថា មាន«សុវត្ថិភាព»ហើយក្ដី ប៉ុន្តែប្រជាពលរដ្ឋភៀសសឹកមួយចំនួននៅតែមិនស្ងប់ចិត្ត មិនទាន់ហ៊ានចាកចេញពីជំរុំភៀសសឹកត្រឡប់ទៅផ្ទះសម្បែងវិញនៅឡើយ។ ជាពិសេសពលរដ្ឋដែលមានផ្ទះរស់នៅកៀកជាប់នឹងអូរព្រំដែនកម្ពជា ថៃ ដែលមើលគ្នាឃើញ។ ពួកគេនៅតែបារម្ភ នៅតែភ័យខ្លាចពីការបាញ់ផ្លោងតាមការនឹកឃើញ ពីសំណាក់ក្រុមទាហានថៃដដែល។
នៅក្នុងជំរុំភៀសសឹក«វត្តខ្នាចរមាស» ស្រុកបវេល លោក គឹម យេត អាយុ៦៧ឆ្នាំ បានប្រាប់កោះសន្តិភាពនៅព្រឹកថ្ងៃទី ៣១ ធ្នូ ដូច្នេះថា «ខ្ញុំរត់មកពីស្រុកសំពៅលូន។ ខ្ញុំមិនទាន់ហ៊ានវិលទៅផ្ទះវិញទេ ព្រោះផ្ទះខ្ញុំនៅកៀកនឹងអូរព្រំដែនពេក។ ខ្ញុំនៅតែបារម្ភពីសុវត្តិភាព ខ្ញុំនៅតែខ្លាចវាបាញ់ទៀត នាំពិបាករត់មកវិញ ចឹងរង់ចាំឲ្យស្ងប់បន្តិចទៀតសិន ចាំនាំកូនចៅទៅវិញ»។ លោក គឹម យេត ក៏ដូចជនភៀសសឹកដទៃទៀតដែរ ដែលមិនទាន់ចាកចេញពីជំរុំនៅឡើយ សុទ្ធតែបានបង្ហាញពីក្ដីបារម្ភដូចៗគ្នា ដោយសារតែផ្ទះរបស់ពួកគាត់នៅជាប់អូរព្រំដែនពេក ដែលឈរមើលឃើញពួកទាហានថៃ នៅត្រើយម្ខាងអូរព្រំដែន។
ពួកគាត់និយាយថា ប្រជាពលរដ្ឋមួយចំនួនដែលបានវិលត្រឡប់ទៅផ្ទះវិញ ភាគច្រើនពួកគេមានផ្ទះនៅឆ្ងាយពីព្រំដែន តែអ្នកនៅក្បែរអូរព្រំដែនមិនទាន់ហ៊ានសម្រេចចិត្តទៅទេ។ ស្រុកសំពៅលូន គឺជាស្រុកមួយក្នុងចំណោមស្រុកចំនួន០៤ នៃខេត្តបាត់ដំបង ដែលជាប់ព្រំប្រទល់ ប្រទេសថៃ ហើយក៏ជាស្រុកមួយដែលរងនូវគ្រាប់ផ្លោងរបស់ពួកទាហានថៃ ស្ទើរទក់សាច់ជាងគេដែរ ជាមួយនឹងស្រុកភ្នំព្រឹក។
អភិបាលស្រុកសំពៅលូន លោក ហម សំខាន់ ក៏បានទទូលស្គាល់ដែរថា ប្រជាពលរដ្ឋមួយចំនួនដែលមានផ្ទះសម្បែងនៅកៀកជាប់អូរព្រំដែន ពួកគាត់ពិតជាមិនទាន់ហ៊ានវិលត្រឡប់មកលំនៅឋានវិញមែន ព្រោះពួកគេនៅភ័យខ្លាចនៅឡើយ។ ប៉ុន្តែយ៉ាងណា គិតត្រិមម៉ោង១១ថ្ងៃត្រង់ ថ្ងៃទី ៣១ ធ្នូ នេះជនភៀសសឹកប្រមាណជា៥០% ក្នុងស្រុកសំពៅលូន បានវិលត្រឡប់មកកាន់ផ្ទះវិញហើយ។ ត្រង់ចំណុចនេះ លោក ហម សំខាន់ ក៏បាននិយាយផងដែរ ពីដំណឹងខាងភាគីថៃ។
លោកបានបញ្ជាក់ថា ខាងភាគីថៃ ស្រុកខ្លងហាត ខេត្តស្រះកែវ អាជ្ញាធរគេ ក៏បានជូនដំណឹងទៅកាន់ពលរដ្ឋរបស់គេដែលបានភៀសសឹកចោលផ្ទះសម្បែក ក៏បានអំពាវនាវឲ្យពួកគេត្រឡប់មកកាន់លំនៅឋានវិញដែរ។ លោកសង្ឃឹមថា ស្ថានភាពតាមបន្ទាត់ព្រំដែនហាក់មានការល្អប្រសើរឡើងវិញហើយ។ ដូច្នេះប្រជាពលរដ្ឋយើងក៏អាចវិលត្រឡប់មកផ្ទះវិញជាបណ្ដើរៗ ដើម្បីបានបង្កបង្កើនផល និង ប្រកបមុខរបរលក់ដូរដូចធម្មតាឡើងវិញផងដែរ៕
ចែករំលែកព័តមាននេះ