មនុស្សរាប់សិបនាក់ ត្រូវបានសម្លាប់នៅក្នុងរលកវាយប្រហារយ៉ាងខ្លាំងរបស់អ៊ីស្រាអែលនៅទូទាំងភាគខាងត្បូង និងភាគខាងកើតប្រទេសលីបង់ បន្ទាប់ពីនាយករដ្ឋមន្ត្រីអ៊ីស្រាអែល លោក Benjamin Netanyahu បានសន្យាថានឹងបង្កើនសកម្មភាពយោធាប្រឆាំងនឹងក្រុម Hezbollah។ នេះបើយោងតាមការផ្សាយរបស់ BBC News ។
ក្រសួងសុខាភិបាលលីបង់បាននិយាយថា យ៉ាងហោចណាស់មនុស្ស៣១នាក់ត្រូវបានសម្លាប់នៅក្នុងរលកនៃការវាយប្រហារចុងក្រោយបង្អស់ រួមទាំងកុមារមួយចំនួនផងដែរ។
យោធាអ៊ីស្រាអែលបាននិយាយថា ខ្លួនបានវាយប្រហារទីតាំងហេដ្ឋារចនាសម្ព័ន្ធ និងយុទ្ធជនហេសបូឡាជាង ១០០នាក់ នៅក្នុងអ្វីដែលជាយប់ដ៏ធ្ងន់ធ្ងរបំផុតមួយនៃការបាញ់ផ្លោងចាប់តាំងពីបទឈប់បាញ់ដែលសម្របសម្រួលដោយសហរដ្ឋអាមេរិកបានចាប់ផ្តើមនៅពាក់កណ្តាលខែមេសា។
វាបានកើតឡើងបន្ទាប់ពីលោក Netanyahu បាននិយាយកាលពីថ្ងៃចន្ទថា លោកបានផ្តល់ការណែនាំឱ្យ «ចុចឈ្នាន់កាន់តែខ្លាំង» ក្នុងការកំណត់គោលដៅទៅលើក្រុម Hezbollah។
ថ្លែងនៅក្នុងកិច្ចប្រជុំគណៈរដ្ឋមន្ត្រីសន្តិសុខមួយកាលពីថ្ងៃអង្គារ លោកបាននិយាយថា អ៊ីស្រាអែលកំពុង «ពង្រឹងប្រតិបត្តិការរបស់យើងនៅក្នុងប្រទេសលីបង់»។
លោកបានមានប្រសាសន៍ថា «កងកម្លាំងការពារអ៊ីស្រាអែល (IDF) កំពុងធ្វើប្រតិបត្តិការជាមួយកងកម្លាំងធំៗនៅលើដី និងដណ្តើមយកដីដែលមានឥទ្ធិពល» ដោយបន្ថែមថា ពួកគេកំពុង «ពង្រឹងតំបន់សន្តិសុខ» ដើម្បីការពារសហគមន៍នានានៅភាគខាងជើងអ៊ីស្រាអែលពីការវាយប្រហាររបស់ក្រុមហេសបូឡា។
បទឈប់បាញ់នេះ ត្រូវបានភាគីទាំងពីររំលោភបំពានម្តងហើយម្តងទៀត ដែលគំរាមកំហែងដល់ការចរចាដ៏ស្មុគស្មាញដែលកំពុងដំណើរការ ដើម្បីបញ្ចប់សង្គ្រាមរវាងសហរដ្ឋអាមេរិក អ៊ីស្រាអែល និងអ៊ីរ៉ង់។
ការវាយប្រហារតាមអាកាស និងកាំភ្លើងធំរបស់អ៊ីស្រាអែល បានបន្តជារៀងរាល់ថ្ងៃ ជាពិសេសនៅភាគខាងត្បូងនៃប្រទេសលីបង់ ខណៈដែលក្រុមហេសបូឡា បានបាញ់រ៉ុក្កែត និងយន្តហោះគ្មានមនុស្សបើក ទៅលើសហគមន៍នានានៅភាគខាងជើងអ៊ីស្រាអែល និងកងទ័ពអ៊ីស្រាអែល ដែលកាន់កាប់ផ្នែកខ្លះនៃភាគខាងត្បូងប្រទេសលីបង់ ។
ចែករំលែកព័តមាននេះ