គីនីនមួយដើមធំអាយុកាលជិត១០០ឆ្នាំ រលំកា.ត់ទទឹងផ្លូវកកស្ទះចរាចរណ៍ ដោយសារភ្លៀងលាយឡំខ្យល់កន្ត្រាក់
- កំពង់ចាម
ខេត្តកំពង់ចាម ៖ ខណៈមេឃខ្មៅងងឹតរកកល់និងភ្លៀងលាយឡំដោយខ្យល់កន្ត្រាក់ ជាហេតុធ្វើឲ្យដើមគីនីនមួយដើមធំដែលមានអាយុកាលជិត១០០ឆ្នាំ ស្ថិតនៅចំណុចមុខមន្ទីរសាធារណៈការខេត្ត ក្នុងសង្កាត់កំពង់ចាម ក្រុងកំពង់ចាម បានរលើងឫសដួលមកលើផ្លូវថ្នល់ បង្កការកកស្ទះចរាចរណ៍។
ហេតុការណ៍នេះបានកើតឡើងនៅវេលាម៉ោងប្រមាណជាង ៥ល្ងាចថ្ងៃទី២៦ឧសភា ឆ្នាំ២០២៦ ដោយមិនបង្អង់យូរអាជ្ញាធរបានចាត់វិធានការឲ្យក្រុមកម្មករយកត្រង់ស៊ីន័រទៅអារមែកឈើ បំបែកជាកង់ៗដើម្បីបើកផ្លូវឲ្យប្រជាពលរដ្ឋធ្វើដំណើរ។
ស្ត្រីម្នាក់អាយុជាង៥០ ឆ្នាំបានរៀបរាប់ឲ្យដឹងថា គ្រាដែលគាត់នៅជាយុវតីបានចេញពីផ្ទះដើរទៅរៀននៅវិទ្យាល័យព្រះសីហនុក្រុងកំពង់ចាម ក្នុងគ្រានោះគឺបានឃើញដើមគីនីនបានដុះនៅក្នុងបរិវេណសួនកុមារ គឺដើមនោះមានទំហំធំថែមទាំងមានម្លប់ត្រជាក់អាចឱ្យមនុស្សជ្រកកោនក្រោមកម្ដៅថ្ងៃបាន។
ស្ត្រីវ័យជាង៥០ឆ្នាំរូបនេះបានប្រាប់បន្តឱ្យដឹងទៀតថា ជាក់ស្ដែងនៅល្ងាចថ្ងៃទី ២៦ ឧសភា គាត់បានធ្វើដំណើរឆ្លងកាត់តាមផ្លូវថ្នល់មុខក្បែរមន្ទីរសាធារណៈការខេត្តគ្រានោះបានឃើញដើមគីនីនមួយដើមដែលមកដល់ពេលនេះបែកមែកសាខាធំត្រូវបានដួលរលំសង្កត់លើរបងថ្មមកលើផ្លូវថ្នល់ ជាហេតុធ្វើឲ្យស្ទះផ្លូវមិនអាចឱ្យប្រជាពលរដ្ឋជិះកង់ម៉ូតូនិងរថយន្តបើកឆ្លងកាត់បាននោះទេ។
បើតាមការគិតរបស់គាត់ ដើមឈើមួយដើមធំនេះអាចមានអាយុកាលជិត១០០ ឆ្នាំ។ ស្របពេលដែលដើមឈើបានរលំបាក់ គ្រានោះក៏មានប្រជាពលរដ្ឋបានមកបន្ទួសយកសំបកឈើទៅដាំទឹកហូបដោយលើកហេតុផលថាព្យាបាលរោគក្រពះ ។ មួយវិញទៀតបើសិនដើមឈើនេះរលំទៅផ្នែកខាងក្នុងវិញនិងសង្កត់លើហាងលក់ដូរបណ្ដាលឱ្យខូចខាតឬគ្រោះថ្នាក់មនុស្សក៏ថាបាន។
លោកប្លោក សុវណ្ណ ចៅសង្កាត់កំពង់ចាម មានប្រសាសន៍ហើយដឹងដែរថាក្រោយពីទទួលព័ត៌មានថាដើមគីនីនមួយដើមធំត្រូវខ្យល់កន្ត្រាក់ធ្វើឲ្យដួលរលំមកលើផ្លូវថ្នល់រូបលោកបានចាត់ឱ្យក្រុមកម្មករជាច្រើននាក់យកម៉ាស៊ីនត្រង់ស៊ីន័រទៅអាបំបែកជាកង់ៗដើម្បីបើកផ្លូវសម្រាប់ឲ្យមនុស្សឆ្លងកាត់ទៅវិញទៅមក ហើយការដែលដួលរលំនេះអាចដើមឈើមានអាយុកាលច្រើនឆ្នាំហើយពុកឬសកែវ ទើបជាហេតុបណ្ដាលឱ្យដួលរលំយ៉ាងដូច្នេះ ៕
ចែករំលែកព័តមាននេះ