ស៊ន អេលីត ប្រាប់មូលហេតុបិទក្លិបតេក្វាន់ដូ ពង្រឹងក្លិបប្រដាល់
- ភ្នំពេញ
រាជធានីភ្នំពេញ ៖ គ្មានអ្នកណាមិនដឹងនោះទេថា លោក ស៊ន អេលីត បងប្រុសកញ្ញា ស៊ន សៀវម៉ី គឺជាអតីតកីឡាករល្បីឈ្មោះនៅក្នុងពិភពតេក្វាន់ដូ…
រាជធានីភ្នំពេញ ៖ គ្មានអ្នកណាមិនដឹងនោះទេថា លោក ស៊ន អេលីត បងប្រុសកញ្ញា ស៊ន សៀវម៉ី គឺជាអតីតកីឡាករល្បីឈ្មោះនៅក្នុងពិភពតេក្វាន់ដូ ដែលមានស្នាដៃរាប់មិនអស់នាពេលកន្លងមក ។ ក្រោយប្រកាសឈប់ពីជម្រើសជាតិ លោកបានទាំងធ្វើគ្រូបង្វឹក និងបង្កើតក្លិបតេក្វាន់ដូធំមួយជាប់របងវិទ្យាល័យ
ប្ញស្សីកែវនោះផង ប៉ុន្តែពេលក្លិបនេះល្បីឈ្មោះ លោកបែរជាប្រកាសបិទចោល ហើយបង្វែរក្លិបតេក្វាន់ដូទៅជាក្លិបប្រដាល់ឆ្មាសសែនសុខគុនខ្មែរទៅវិញនៅក្នុងពេលនេះ។
លោក ស៊ន អេលីត និយាយថា មកទល់ពេលនេះលោកបោះបង់ការបង្ហាត់តេក្វាន់ដូដល់សិស្សប្រមាណ២ឆ្នាំមកហើយ ដោយគ្រាន់តែផ្ដល់ទីតាំងឱ្យកូនសិស្សរបស់លោកបង្វឹកតេក្វាន់ ដូកុំឱ្យបាត់ នៅពេលល្ងាចៗបន្តិចបន្តួចប៉ុណ្ណោះ។
លោកថា ហេតុផលដែលលោកសម្រេចចិត្តចោលក្លិបតេក្វាន់ដូ ដោយលែងទទួលបង្ហាត់សិស្សនោះ គឺដោយសារតែតេក្វាន់ដូកាន់តែបោះជំហានថយក្រោយ និងធ្វើឱ្យលោកអស់សង្ឃឹម។ លោកថា ខ្លួនបានបញ្ជូនសិស្សតេក្វាន់ដូច្រើននាក់មកហើយឱ្យចូលប្រឡងថ្នាក់ជាតិ ប៉ុន្តែលទ្ធផលកូនសិស្សល្អៗរបស់លោកដែលប្រកួតគួរតែឈ្នះបែរជាត្រូវឱ្យចាញ់ធ្វើឱ្យលោកលែងបញ្ជូនកូនសិស្សបន្តតំណែង ហើយសម្រេចចិត្តបោះបង់ការបង្ហាត់តេក្វាន់ដូតែម្ដង ។
លោកនិយាយថា៖«តេក្វាន់ដូទៅមុខមិនរួចទេ បើអាកូនសិស្សគ្នាល្អៗទៅប្រកួតឱ្យចាញ់តែរហូតហ្នឹង អាមិនសមឈ្នះទៅជាឱ្យឈ្នះ ហើយក្នុងមួយឆ្នាំៗរកតែសកម្មភាប្រកួតស្អីមិនឃើញផងហ្នឹង អ៊ីចឹងនៅតស៊ូបណ្ដុះសិស្សស្អីទៀត ទើបខ្ញុំបិទតេក្វាន់ដូ ហើយបើកក្លិបប្រដាល់វិញ» ។ លោកថា ក្រោយពីអស់សង្ឃឹមលើការបង្ហាត់តេក្វាន់ដូ លោកបានបើកក្លិបប្រដាល់កាលពីអំឡុងខែមីនា ឆ្នាំ២០១៨ ដោយមកដល់ពេលនេះ លោកមានកូនសិស្សហ្វឹកហាត់ជាប់លាប់ចំនួន២០នាក់ហើយ ខណៈដែល១២នាក់ គឺស្នាក់នៅដេកពួនក្នុងក្លិបរបស់លោកជាប់វិទ្យាល័យប្ញស្សីកែវនោះតែម្ដង ។ លោកថា កូនសិស្សទាំងអស់អត់មានតម្រូវឱ្យបង់លុយក្នុងការហ្វឹកហាត់នោះទេ តែមួយចំនួនដែលមានលទ្ធភាពគ្រាន់បើ គឺគេឱ្យអង្ករមួយបេ ឬ២បេ ទៅតាមលទ្ធភាព។
ក្នុងចំណោមកូនសិស្សទាំងនោះមានអាយុពី១៦ដល់២៥ឆ្នាំ ហើយកីឡាករទាំង២០រូបត្រូវបានឆ្លាស់គ្នាឡើងប្រកួតចុះឡើងៗស្ទើរតែគ្រប់សង្វៀនចាប់តាំងពីក្លិបរបស់លោកដំណើរការជិត១ឆ្នាំនេះ ។ លោកបានសម្រេចឱ្យកូនសិស្សទាំងអស់ប្រើត្រកូល«អេលីត» នៅពេលឡើងប្រកួត ដោយសារតែចង់ពង្រីកកេរ្តិ៍ឈ្មោះឱ្យមានអ្នកស្គាល់កាន់តែច្រើនក្រោយតស៊ូបើកក្លិបប្រដាល់ ។ ហេតុផលដែលលោកហ៊ានបើកក្លិបប្រដាល់ ហើយដើរតួជាអ្នកបង្ហាត់ផង គឺដោយសារតែមុនក្លាយខ្លួនជាអ្នកតេក្វាន់ដូ លោកក៏ជាអ្នកប្រដាល់អាជីពមួយរូប ដោយលោកប្រកាសថា មុនពេលបោះជំហានចូលផ្នែកតេក្វាន់ដូ គឺលោកឡើងប្រកួតបានជាង១០លើកដែរ ។
លោកថា ប្រដាល់នៅពេលបន្ថែមបន្ថយក្បាច់គុនតេក្វាន់ដូកាន់តែងាយស្រួលបង្ហាត់ ទើបលោកពេញចិត្តក្នុងការបង្វឹកសិស្ស ហើយកូនសិស្សរបស់លោកទៀតសោត ក៏ច្រើនតែល្អនៅពេលឡើងរេញ ។ កីឡាករខ្លះលោកថាត្រូវបានគេស្នើឱ្យប្រកួតរកពេលសម្រាកមិនបានព្រោះតែភាពខ្លាំងនោះផង។
លោក ស៊ន អេលីត បន្តថា ការបើកក្លិបប្រដាល់របស់លោកមិនមានស្ថាប័នណាមួយឈរពីក្រោយនោះទេ ប៉ុន្តែដោយសារតែលោកស្រឡាញ់ ហើយគិតថា បើចំណាយលុយចាយលើក្លិបប្រដាល់ គឺវាប្រសើរជាងយកលុយដើរលេង ទើបលោកចេះតែដើរក្នុងអាជីពមួយនេះ ដោយភរិយារបស់លោកក៏ឯកភាព ។ លោកថា ខ្លួនចំណាយពេលពីចន្ទ ដល់សុក្រ បង្វឹកដលសិស្សផ្នែកប្រដាល់ ខណៈសិស្សដែលលោកចិញ្ចឹម គឺរស់ដោយសារកូនសិស្សឡើងប្រកួតគូក្នុងស្រុកមួយលើកបាន៦ម៉ឺនរៀល និងគូអន្តរជាតិមួយលើកបាន១២ម៉ឺនរៀល ។
ម្យ៉ាងមកពីលោកអត់មានចំណាយលុយជួលក្លិប និងចំណាយលុយជួលគ្រូមកបង្វឹកបន្ថែម ទើបលោកអាចដំណើរការក្លិបនេះ ដោយគ្មានឧបសគ្គ ។ ទោះមិនទាន់ដឹងពីអនាគត តែលោកប្រកាសថា ក្លិបប្រដាល់របស់លោកនឹងដើរដោយរឹងមាំដោយលោកនឹងទទួលសិស្សឱ្យហ្វឹកហាត់មិនគិតលុយ និងទទួលឱ្យស្នាក់នៅដោយសេរី ដើម្បីរួមចំណែកអភិវឌ្ឍន៍វិស័យប្រដាល់ ។
យ៉ាងណាមិញលោកថា កូនសិស្សដែលលោកបណ្ដុះរាល់ថ្ងៃ មិនទាន់ដឹងថា មួយណាសក្តិសមនឹងចូលប្រកួតកីឡាស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះនោះទេ ដោយលោកបញ្ជាក់ថា ពេលវេលានៅយូរទៀត ហើយមិនទាន់ដឹងថា ទម្រាំដល់ពេលនោះ តើកីឡាករល្អៗសព្វថ្ងៃនឹងទៅដល់ណា ហើយមានកីឡាករថ្មីៗល្អៗមកជំនួសឬអត់ ។ ប៉ុន្តែលោកថា នឹងប្រឹងបង្វឹកសិស្សឱ្យមានគុណភាពដើម្បីឱ្យមានកេរ្តិ៍ឈ្មោះប្រកួតប្រជែងក្នុងទីផ្សារប្រដាល់ ។
លោកថា ប្រដាល់ និងតេក្វាន់ដូ លោកស្រឡាញ់តេក្វាន់ដូជាង ប៉ុន្តែមកពីចំណាយពេលជាមួយតេក្វាន់ដូអស់ច្រើនឆ្នាំ រកតែកូនសិស្សមួយបង្ហាញស្នាដៃមិនឃើញ ទើបងាកមកបង្ហាត់ប្រដាល់វិញ ដែលមានការងាយស្រួលបញ្ជូនសិស្សឡើងរេញបានទាំងចំណូលបានទាំងកិត្តិយស៕
ចែករំលែកព័តមាននេះ