រាជធានីភ្នំពេញ ៖ កីឡាករជើងខ្លាំងគុនខ្មែរក្របីព្រៃពេជ្រ សម្បត្តិ ពិតជាធ្វើបានល្អមែនទែនក្នុងដំណើរបេសកកម្មទៅប្រកួតផ្សព្វក្បាច់គុនបូរាណខ្មែរនៅប្រទេសចិនរបស់ក្រុមកីឡាករ-កីឡាការិនីប្រដាល់គុនខ្មែរចំនួន៦រូបកាលពីថ្ងៃទី៧ ខែតុលា ឆ្នាំ២០២៥ ។ ពេជ្រ សម្បត្តិ…
រាជធានីភ្នំពេញ ៖ កីឡាករជើងខ្លាំងគុនខ្មែរក្របីព្រៃពេជ្រ សម្បត្តិ ពិតជាធ្វើបានល្អមែនទែនក្នុងដំណើរបេសកកម្មទៅប្រកួតផ្សព្វក្បាច់គុនបូរាណខ្មែរនៅប្រទេសចិនរបស់ក្រុមកីឡាករ-កីឡាការិនីប្រដាល់គុនខ្មែរចំនួន៦រូបកាលពីថ្ងៃទី៧ ខែតុលា ឆ្នាំ២០២៥ ។
ពេជ្រ សម្បត្តិ បានបញ្ចេញកណ្ដាប់ដៃដែកវាយបំបាក់អំនួតកីឡាករម្ចាស់ផ្ទះ ខា ឡូសូ ឱ្យចាញ់ពិន្ទុដាច់ទាំង៣ទឹក ធ្វើឱ្យផ្អើលសង្វៀនស្រុកចិន ។ ខា ឡូសូ គឺជាជើងខ្លាំងមួយរូបប្រចាំប្រទេសចិន ហើយក៏ជាម្ចាស់ខ្សែក្រវាត់ជាច្រើនស្ថាប័នផងដែរ ។
ពេជ្រ សម្បត្តិ ពិតជាធ្វើបានល្អខ្លាំងណាស់មិនធ្វើឱ្យអ្នកគាំទ្ររបស់ខ្លួនខកបំណងនោះទេ ទោះបីជាការប្រកួតបានអូសបន្លាយពេលរហូតទៅដល់៣ទឹកពេញក៏ពិតមែន ប៉ុន្តែគេបានធ្វើឱ្យអ្នកប្រដាល់ល្បីឈ្មោះក្នុងប្រភេទទម្ងន់៦០គីឡូក្រាមប្រចាំប្រទេសចិនឈ្មោះខា ឡូសូ ដែលជាម្ចាស់ខ្សែក្រវាត់ជាច្រើនស្ថាប័ននិងជាម្ចាស់ខ្សែក្រវាត់WBCផងដែរ ឱ្យចាញ់យ៉ាងដំណំធ្វើឱ្យមានការភ្ញាក់ផ្អើលយ៉ាងខ្លាំងនៅលើសង្វៀនប្រទេសចិន ។
ការប្រកួតចាប់ពីទឹកទី១ដល់ទឹកទី៣ ពេជ្រ សម្បត្តិ បានសម្រុកដើរចូលប្រើកណ្ដាប់ដៃវាយសន្ធាប់ទៅលើកីឡាករខា ឡូសូ ដូចក្របីឡើងកធ្វើឱ្យកីឡាករចិនរូបនេះរកឱកាសតដៃសឹងតែមិនបាន។
គ្រាន់តែនៅដើមទឹកទី១ប្រកួតមិនទាន់បាន១នាទីស្រួលបួលផងនោះ គេបានម៉ាត់ចូលមុខកីឡាករខា ឡូសូ ពេញៗជាច្រើនដៃរហូតដល់ថ្នាក់បែកឈាមចេញតាមច្រមុះដួលអុកគូថទៅលើតាពីត្រូវលោកអាជ្ញាកណ្ដាលរាប់ម្ដង ។
ក្រោយគ្រូពេទ្យពិនិត្យរួចឃើញថាមិនអី ខា ឡូសូ ត្រូវបានអនុញ្ញាតឱ្យប្រកួតបន្តរហូតចប់ទឹកទី១។ ចូលដល់ទឹកទី២និងទី៣ ពេជ្រ សម្បត្តិ មិនបន្ធូរដៃនៅតែបង្កើនការវាយសម្រុកកាន់តែខ្លាំងលើសដើមដោយរូបគេមិនចង់ឱ្យគូប្រកួតឆ្លងផុតពីទឹកទី៣នោះទេ ។
ទោះបីជាយ៉ាងណា កីឡាករចិនម្នាក់នេះអាចតស៊ូប្រកួតរហូតដល់ចប់ទឹកទី៣ និងបានប្ដូរកណ្ដាប់ដៃវាយបកសងវិញដោយមិនព្រមចុះចាញ់ដោយងាយនោះឡើយ ។ យ៉ាងណាក៏ដោយទីបំផុតកីឡាករចិនត្រូវបានលោកអាជ្ញាកណ្ដាលប្រកាសឱ្យចាញ់កីឡាករពេជ្រ សម្បត្តិ ត្រឹមតែពិន្ទុទាំងមិនអស់ចិត្តក្រោយចប់ការប្រកួត។
ក្នុងដំណើរទៅផ្សព្វផ្សាយក្បាច់គុនបូរាណខ្មែរដែលដឹកនាំដោយឯកឧត្តមខូវ ឆាយ ប្រធានសហព័ន្ធកីឡាប្រដាល់គុនខ្មែរនៅប្រទេសចិនលើកនេះមានអ្នកប្រដាល់គុនខ្មែរចំនួន៦នាក់ហើយជាលទ្ធផល ឈ្នះ២ ស្មើ១ និងចាញ់៣ ។
កីឡាករពេជ្រ សម្បត្តិ និងកីឡាការិនីរិទ្ធី វ៉ានិច្ច ឈ្នះ ចំណែកកីឡាករឡៅ ចិត្រា ស្មើពិន្ទុ។ដោយឡែកអ្នកដែលចាញ់មានកីឡាការិនីអេ យ៉ា នុត កីឡាករមឿន សុខហ៊ុច និងកីឡាករពេជ្រ អាទិទេព ៕
ចែករំលែកព័តមាននេះ