អ្នកលេ.ងពូថៅធំ ធឿន ធារ៉ា ត្រូវប៉ះជើងខ្លាំ.ងមកពីម៉ាដាហ្គាស្កា នៅលើសង្វៀន នាថ្ងៃអាទិត្យនេះ
- ភ្នំពេញ
រាជធានីភ្នំពេញ ៖ នៅលើសង្វៀនថោនថ្ងៃ អាទិត្យ ទី១៩ ខែតុលា ឆ្នាំ២០២៥ វេលាម៉ោង៣រសៀល អ្នកលេងពូថៅធំធឿន ធារ៉ា…
រាជធានីភ្នំពេញ ៖ នៅលើសង្វៀនថោនថ្ងៃ អាទិត្យ ទី១៩ ខែតុលា ឆ្នាំ២០២៥ វេលាម៉ោង៣រសៀល អ្នកលេងពូថៅធំធឿន ធារ៉ា ត្រូវធ្វើការធ្ងន់ដោយស្វាគមន៍អ្នកប្រដាល់ជើងខ្លាំងមកពីប្រទេសម៉ាដាហ្គាស្កា យ៉ាស៊ីន អែលខាដ្រាវី ក្នុងប្រភេទទម្ងន់៧៣គីឡូក្រាម។
តាមការឱ្យដឹងពីអ្នករៀបចំកម្មវិធីប្រកួតប្រចាំសង្វៀនទូរទស្សន៍ថោន កីឡាករយ៉ាស៊ីន អែលខាដ្រាវីរូបនេះ ធ្លាប់មកប្រកួតនៅលើសង្វៀនស្រុកខ្មែរចំនួន២លើករួចមកហើយដោយយកឈ្នះទាំង២លើកជាប់គ្នាតែម្ដង។ លើកទី១ប្រកួតជាលក្ខណៈហ្គង់ចេញម្រាមបានផ្ដួលកីឡាករជើងខ្លាំងកម្ពុជាសំអឿន សុផា ឱ្យបោះបង់ចោលការប្រកួតនៅត្រឹមទឹកទី២ ។ លើកទី២ឈ្នះពិន្ទុកីឡាករឡៅ ចិត្រា នៅលើសង្វៀនទូរទស្សន៍ហង្សមាស។ នេះជាលើកទី៣ហើយដែលកីឡាករយ៉ាស៊ីន អែលខាដ្រាវី ត្រឡប់មកជាន់ទឹកដីនៃព្រះរាជាណាចក្រកម្ពុជាសាជាថ្មីម្ដងទៀត។ប៉ុន្តែលើកនេះគេត្រូវប៉ះកីឡាករជើងខ្លាំងលំដាប់ជួរមុខកម្ពុជាធឿន ធារ៉ា ប្រកួតជាលក្ខណៈហ្គង់ចេញម្រាមចំនួន៣ទឹក ។ គេមិនទាន់ដឹងថា ជើងខ្លាំងមកពីប្រទេសម៉ាដាហ្គារូបនេះអាចមានសំណាងដូចការប្រកួតលើកមុនៗទៀតដែរឬទេ។
ទោះបីជាយ៉ាងណា កីឡាករធឿន ធារ៉ាមួយរយៈមកនេះមិនសូវឃើញបង្ហាញមុខនៅលើសង្វៀនញឹកញាប់ដូចនោះទេ ប្រហែលជាសម្ងំហ្វឹកហាត់ត្រៀមកម្លាំងហើយមើលទៅ ។ម្យ៉ាងគេទើបតែជាសះស្បើយពីស្នាមរបួសភ្នែកស្ដាំក្រោមកណ្ដាប់ដៃកីឡាករអាស៊ែបៃហ្សង់ RUSLAN NAGIYEVដែលបានវាយគេឱ្យបោះបង់ចោលការប្រកួតនៅត្រឹមទឹកទី១ លើសង្វៀនថោន កាលពីថ្ងៃទី២៦ ខែកញ្ញា ឆ្នាំ២០២៥។
ក្រោយពីជាសះស្បើយពីរបួស កីឡាករធឿន ធារ៉ា បានបន្លុយពាក្យចង់ប្រកួតសងសឹកម្ដងទៀតដោយដាក់ខ្សែក្រវាត់ឱ្យដណ្ដើមក្នុងចំណោមខ្សែក្រវាត់ជាច្រើនគ្រឿងដែលគេកំពុងគ្រប់គ្រងទៀតផង ។ ដូច្នេះ សម្រាប់ការមកប៉ះជាមួយកីឡាករយ៉ាស៊ី អែលខាដ្រាវី លើកនេះ គេអាចនឹងត្រៀមខ្លួនបានយ៉ាងល្អជាងមុនដោយមិនបណ្ដោយឱ្យចាញ់ដោយងាយទៀតឡើយ ៕
ចែករំលែកព័តមាននេះ