ខេត្តកណ្ដាល ៖ យុទ្ធនាការផ្សព្វផ្សាយអប់រំគុណតម្លៃអូឡាំពិក ឆ្នាំ២០២៥ រៀបចំ ដោយគណៈកម្មាធិការជាតិអូឡាំពិកកម្ពុជាបានបន្តសកម្មភាពនៅតាមបណ្ដាខេត្តវិញម្ដង ដោយចាប់ផ្ដើមពីវិទ្យាល័យ ហ៊ុនសែន តាខ្មៅ នៅព្រឹកថ្ងៃទី១៥…
ខេត្តកណ្ដាល ៖ យុទ្ធនាការផ្សព្វផ្សាយអប់រំគុណតម្លៃអូឡាំពិក ឆ្នាំ២០២៥ រៀបចំ ដោយគណៈកម្មាធិការជាតិអូឡាំពិកកម្ពុជាបានបន្តសកម្មភាពនៅតាមបណ្ដាខេត្តវិញម្ដង ដោយចាប់ផ្ដើមពីវិទ្យាល័យ ហ៊ុនសែន តាខ្មៅ នៅព្រឹកថ្ងៃទី១៥ ខែធ្នូ ឆ្នាំ២០២៥។
ឯកឧត្ដម ប៊ុយ សុភ័ណ្ឌ ជាវាគ្មិនប្រចាំកម្មវិធីមានប្រសាសន៍ថា សិស្សានុសិស្សបានជ្រួតជ្រាបយ៉ាងខ្លាំងពីការចែករំលែកប្រវត្តិកីឡាអូឡាំពិក និងចលនាអូឡាំពិកដែលមានយូរឆ្នាំមកហើយតាំងពីចក្រភពក្រិកសម័យបុរាណ និងបន្តរហូតដល់ពេលបច្ចុប្បន្ន ។
យុទ្ធនាការនេះក៏ជំរុញឱ្យយុវជនកាន់តែយល់ដឹងពីគុណតម្លៃនៃការលេងកីឡា ស្របតាមគោលការណ៍រាជរដ្ឋាភិបាលក្នុងការជំរុញប្រជាជនម្នាក់ចេះលេងកីឡាយ៉ាងតិចមួយប្រភេទ។ មិនតែប៉ុណ្ណោះ ការផ្សព្វផ្សាយនេះក៏សំដៅឆ្ពោះទៅកាន់ឆ្នាំ២០៣១ ដែលកម្ពុជានឹងធ្វើជាម្ចាស់ផ្ទះកីឡាយុវជនអាស៊ី ផងដែរ។
លោក ទី ណាដា នាយកវិទ្យាល័យ ហ៊ុនសែន តាខ្មៅ និងសិស្សានុសិស្សបានបង្ហាញការសាទរចំពោះគណៈកម្មាធិការជាតិអូឡាំពិកកម្ពុជាដែលបានរៀបចំកម្មវិធីនេះឡើងធ្វើឱ្យយុវជនបានយល់ដឹងថែមទៀតពីចលនាកីឡា និងគុណប្រយោជន៍នៃកីឡា ទាំងចំពោះសុខភាព ក៏ដូចជាការសិក្សា ។ ជាមួយគ្នា សិស្សវិទ្យាល័យ ហ៊ុនសែន តាខ្មៅ ក៏មានសកម្មភាពច្រើនក្នុងការលេងកីឡា ជាពិសេសបាល់បោះ និងកីឡាវាយសី។
បន្ទាប់ពីចប់បេសសកម្មក្នុងខេត្តកណ្ដាលយុទ្ធនាការផ្សព្វផ្សាយអប់រំគុណតម្លៃអូឡាំពិកនឹងបន្តដំណើរទៅដល់ខេត្តចំនួន៣ក្នុងសប្ដាហ៍នេះ មានដូចជា ខេត្តកំពង់ស្ពឺ ខេត្តកំពង់ឆ្នាំង និងខេត្តព្រះសីហនុ ៕
ចែករំលែកព័តមាននេះ