ប្រទេសថៃ ៖ កីឡាករប្រដាល់មួយថៃ Chalongchai Minindi បានប្រកាសចូលនិវត្តន៍ពីកីឡាមួយថៃស្ម័គ្រចិត្ត (Amateur Muay Thai) បន្ទាប់ពីចាញ់ការប្រកួតវគ្គពាក់កណ្តាលផ្តាច់ព្រ័ត្រនៅកីឡាស៊ីហ្គេមលើកទី…
ប្រទេសថៃ ៖ កីឡាករប្រដាល់មួយថៃ Chalongchai Minindi បានប្រកាសចូលនិវត្តន៍ពីកីឡាមួយថៃស្ម័គ្រចិត្ត (Amateur Muay Thai) បន្ទាប់ពីចាញ់ការប្រកួតវគ្គពាក់កណ្តាលផ្តាច់ព្រ័ត្រនៅកីឡាស៊ីហ្គេមលើកទី ៣៣ ឆ្នាំ ២០២៥ ដោយរូបគេថែមទាំងបកអាក្រាតកីឡាស៊ីហ្គេមនៅប្រទេសកំណើតរបស់ខ្លួនថាបានប្រព្រឹត្តអំពើពុករលួយ រៀបចំលទ្ធផល ការប្រកួត។
បើតាមប្រភពពីសារព័ត៌មានថៃ The Nation កាលពីថ្ងៃទី១៧ ខែធ្នូ ឆ្នាំ២០២៥ បានឱ្យដឹងថា កីឡាករ Chalongchai Minindi បានបង្ហោះសារលើបណ្តាញសង្គមហ្វេសប៊ុក កាលពីថ្ងៃទី១៧ ខែធ្នូ ដើម្បីបង្ហាញកំហឹងរបស់ខ្លួន បន្ទាប់ពីចាញ់ប្រកួតដ៏ចម្រូងចម្រាសនៅស៊ីហ្គេមឆ្នាំ ២០២៥។ កីឡាករប្រដាល់ចាស់វស្សារូបនេះ បានចាញ់កីឡាករហ្វីលីពីន Lj Rafael Yasay ដោយពិន្ទុ ២៨-២៩ ប្រភេទទម្ងន់ ៥១ គីឡូក្រាម បើទោះបីជារូបគេវាយបានល្អជាង ហើយអ្នកទស្សនាជាច្រើនឃើញថា Chalongchai ពិតជាសមទទួលបានជ័យជម្នះក៏ដោយ ប៉ុន្តែការសម្រេចចិត្តរបស់ចៅក្រមបែរជាឱ្យរូបគេចាញ់ ដោយបញ្ចប់ក្តីសង្ឃឹមឈានទៅដណ្តើមមេដាយមាសជូនជាតិ និងបង្កឱ្យមានប្រតិកម្មភ្លាមៗលើស្តង់ដារវិនិច្ឆ័យនៃការប្រកួត។
ពាក់ព័ន្ធរឿងនេះ Chalongchai បានបង្ហោះសារដូច្នេះថា «ខ្ញុំសុំទោសអ្នកទាំងអស់គ្នា។ សំណាងអាក្រក់បានកើតឡើងចំពោះខ្ញុំ។ ខ្ញុំបានហ្វឹកហាត់យ៉ាងខ្លាំងសម្រាប់ការប្រកួតកីឡាស៊ីហ្គេមលើកចុងក្រោយរបស់ខ្ញុំ ហើយនៅទីបញ្ចប់ ការខិតខំប្រឹងប្រែងទាំងអស់របស់ខ្ញុំគឺឥតប្រយោជន៍។ ដំបូង សូមអនុញ្ញាតឱ្យខ្ញុំបញ្ចេញអារម្មណ៍បន្តិច។ មុនពេលប្រកួត គ្រូបង្វឹកម្នាក់របស់ខ្ញុំបានប្រាប់ខ្ញុំថា ការប្រកួតប្រភេទទម្ងន់ ៥១ គីឡូក្រាម ដែលជាប្រភេទទម្ងន់របស់ខ្ញុំប្រកួត នឹងត្រូវបានរៀបចំលទ្ធផល ដើម្បីផ្តល់ឱ្យកីឡាករម៉ាឡេស៊ីឈ្នះមេដាយមាស។ ហើយនោះដូចអ្វីដែលអ្នកអាចឃើញហើយ នោះជាលទ្ធផលដែលបានកើតឡើង»។
កីឡាករ Chalongchai បានបញ្ចប់ការកំណត់ចំណាំទាំងឈឺចាប់បំផុតរបស់ខ្លួន ដោយប្រកាសថា «ការបង្ហាញខ្លួននេះ គឺជាការប្រកួតកីឡាស៊ីហ្គេមចុងក្រោយរបស់ខ្លួន ហើយក៏ទំនងជាពេលវេលាចុងក្រោយរបស់ខ្លួនតំណាងឱ្យប្រទេសជាតិដែរ»។ Chalongchai បានសម្រេចចិត្តចូលនិវត្តិន៍ពីការប្រដាល់ស្ម័គ្រចិត្ត ដើម្បីផ្តោតលើកីឡាប្រដាល់មួយថៃអាជីពតែមួយប៉ុណ្ណោះ។
ភាពចម្រូងចម្រាសនេះ បានធ្វើឱ្យរង្គោះរង្គើយ៉ាងខ្លាំងដល់ទំនុកចិត្តស្តង់ដារវិនិច្ឆ័យរបស់កីឡាមួយថៃក្នុងព្រឹត្តិការណ៍កីឡាស៊ីហ្គេមលើកទី ៣៣ ឆ្នាំ២០២៥ នៅថៃ ហើយឈានដល់មានការអំពាវនាវឱ្យសមាគមមួយថៃស្ម័គ្រចិត្តស៊ើបអង្កេតផ្ទៃក្នុង ដូចដែលត្រូវបានរាយការណ៍ដោយអត្តពលិកផ្ទាល់៕
ចែករំលែកព័តមាននេះ