សហរដ្ឋអាមេរិក ៖ បន្ទាប់​ពី​ចំណាយពេល​ជិត ២៥ ឆ្នាំ​ក្នុង​សង្វៀន​ប្រកួត​កីឡា​ចំបាប់ ឬ​កីឡាកាស​របស់​ក្រុមហ៊ុន World Wrestling Entertainment ឬ WWE ដ៏​ល្បីល្បាញ​បំផុត​របស់​ខ្លួន​នោះ នៅ​ទីបំផុត​! លោក John Cena បាន​ប្រកាស​ចូល​និវត្តន៍​ជា​ផ្លូវការ​ហើយ កាលពី​យប់​ថ្ងៃ​ទី​១៣ ខែធ្នូ ឆ្នាំ​២០២៥ (​ម៉ោង​នៅ​សហរដ្ឋអាមេរិក​) តាម​រយៈ​ការ​ប្រកួត​ចុង​ក្រោយ​ក្នុង​ព្រឹត្តិការណ៍ WWE Saturday Night’s Main Event ឆ្នាំ​២០២៥ នៅ​សង្វៀន Capital One Arena ទីក្រុង​វ៉ា​ស៊ី​ន​តោន ដោយ​ចាញ់​កីឡាករ Gunther​។

ក្រោយ​បញ្ចប់​ការ​ប្រកួត​នោះ តារា​ល្បី​ៗ​របស់ WWE រួម​ទាំង​ប្រធាន​ផ្នែក​ផលិត លោក Paul Michael Levesque ឬ Triple H បាន​ដើរមក​កាន់​សង្វៀន ដើម្បី​អបអរសាទរ​ដល់​លោក John Felix Anthony Cena ឬ John Cena ចំពោះ​អាជីព​ជាមួយ WWE ដែល​បានឃើញ​បុរស​វ័យ​៤៨​ឆ្នាំ​រូប​នេះ ក្លាយជា​អ្នក​កីឡាកាស​ដ៏​អស្ចារ្យ និង​ល្បីល្បាញ​បំផុត​ម្នាក់​លើ​ពិភពលោក​។ John Cena បាន​ឱនក្បាល​ពី​សង្វៀន​គោរព​ដល់​អ្នកគាំទ្រ ចំពោះ​អ្វី​ដែល​ពួក​គេ​ផ្តល់​ឱ្យ​ខ្លួន​សម្រាប់​រយៈពេល ២៥ ឆ្នាំ​កន្លង​មកនេះ ខណៈ​ដែល​ការ​ចាក​ចេញពី​សង្វៀន ទទួល​បានការ​ទះដៃ​អបអរសាទរ​យ៉ាង​ខ្លាំង​។

តាម​ពិត​ទៅ John Cena បាន​ប្រកាស​អំពី​ការ​ចូល​និវត្តន៍​របស់​ខ្លួន កាលពី​ខែកក្កដា ឆ្នាំ ២០២៤ ដោយ​បាន​ប្រាប់​អ្នកគាំទ្រ​នៅ​ពេល​នោះ​ថា រាង​កាយ​របស់​ខ្លួន​មិន​អាច​ទ្រាំទ្រ​នឹង​ការ​ឈឺចាប់​បាន​តទៅ​ទៀត​។ ទោះជា​យ៉ាងណា WWE បាន​បញ្ជាក់​ថា John Cena នឹង​នៅ​តែ​ជា​ផ្នែក​មួយ​ដ៏​សំខាន់​នៃ​គ្រួសារ WWE បន្ទាប់​ពី​អ្នកកីឡា​កាស​រូប​នេះ បាន​ចុះ​កុងត្រា​រយៈពេល ៥ ឆ្នាំ ដើម្បី​ធ្វើ​ជា​ទូត​សុច្ឆន្ទៈ​ប្រចាំ​ក្រុមហ៊ុន​កីឡា​ចំបាប់​ដ៏​ធំ​បំផុត​មួយ​នេះ​។

សូម​ជម្រាប​ជូន​ថា John Cena បាន​ក្លាយជា​អ្នក​កីឡាកាស​អាជីព​នៅ​ឆ្នាំ ១៩៩៩ ហើយ​បាន​ចូលរួម​ជាមួយ WWE នៅ​ឆ្នាំ ២០០០ និង​បង្ហាញខ្លួន​សម្រាប់​ការ​ប្រកួត​កម្រិត​ខ្ពស់​នៅ​ឆ្នាំ ២០០២ ដោយ​បាន​បង្កើត​កេរ្តិ៍ឈ្មោះ​ល្បីល្បាញ​មក​ទល់​សព្វថ្ងៃ តាម​រយៈ​ការ​ឈ្នះ​ខ្សែក្រវាត់​ជា​ច្រើន ហើយ​ក៏​ជា​ម្ចាស់​ខ្សែក្រវាត់​ពិភពលោក ១៧ សម័យ​កាលដែល​បំបែក​កំណត់​ត្រា​ផង​ដែរ​។

ម្ចាស់​ក្បាច់ «You Can’t See Me» រូប​នេះ ក្រោយមក​បាន​ប្រឡូក​អាជីព​ជា​តារា​សម្តែង​ក្នុង​ឆ្នាំ​២០០៦ ដោយ​ទទួល​បានការ​គាំទ្រ​យ៉ាង​ខ្លាំង តាម​រយៈ​ការ​សម្តែង​នៅ​ក្នុង​កម្មវិធី​ទូរទស្សន៍ និង​ខ្សែភាពយន្ត​ជា​ច្រើន រួម​ទាំង The Suicide Squad និង Fast & Furious 9 និង X ដ៏​ល្បី​ខ្លាំង​បំផុត​ជាដើម​៕ ប្រភព ៖ WWE, Fox News, New York Post និង BBC