ប្រទេសម៉ិកស៊ិក ៖ ក្រុមបាល់ទាត់ជម្រើសជាតិម៉ិកស៊ិកក្នុងនាមជាម្ចាស់ផ្ទះបានយកឈ្នះលើក្រុមជម្រើសជាតិអាហ្វ្រិកខាងត្បូង ដោយលទ្ធផល ២-០ នៅក្នុងជំនួបបើកឆាកដ៏គួរឱ្យរំភើប និងស្វិតស្វាញបំផុតនៃព្រឹត្តិការណ៍ FIFA World Cup ឆ្នាំ២០២៦ នៅកីឡដ្ឋានជាតិ Azteca កាលពីវេលាទៀបភ្លឺឈានចូលថ្ងៃទី១២ ខែមិថុនា ឆ្នាំ២០២៦ (ម៉ោងនៅកម្ពុជា)។
ការប្រកួតបើកឆាកនៅក្នុងពូល A នេះ មិនត្រឹមតែមានគ្រាប់បាល់ស៊ុតបញ្ចូលទីនោះទេ ប៉ុន្តែថែមទាំងបានបង្កើតប្រវត្តិសាស្ត្រថ្មី ដោយមានកាតក្រហមដល់ទៅ ៣ សន្លឹក ដែលជាចំនួនច្រើនបំផុតមិនធ្លាប់មានក្នុងប្រវត្តិសាស្ត្រការប្រកួតបើកឆាកព្រឹត្តិការណ៍ World Cup។
ជ័យជម្នះរបស់ម្ចាស់ផ្ទះម៉ិកស៊ិក សម្រេចបានដោយកីឡាករ Julián Quiñones នៅនាទី៩ និងគ្រាប់ទី២ ដោយ Raúl Jiménez នៅនាទី ៦៧ ដើម្បីនាំម៉ិកស៊ិកឡើងឈរកំពូលតារាងបណ្តោះអាសន្ន។
ខ្សែបម្រើអាហ្វ្រិកខាងត្បូង Sphephelo Sithole បានក្លាយជាកីឡាករដំបូងគេបង្អស់នៅ ព្រឹត្តិការណ៍ World Cup ឆ្នាំ២០២៦ ដែលទទួលបានកាតក្រហមនៅនាទី៤៩ ក្រោយបង្កកំហុសក្នុងការព្យាយាមរំខានកីឡាករម៉ិកស៊ិក។ កាតក្រហមទី ២ បានលើខ្សែបម្រើប្រយុទ្ធ Themba Zwane របស់អាហ្វ្រិកខាងត្បូង នៅនាទី៨៣ បន្ទាប់ពីអាជ្ញាកណ្តាលពិនិត្យ VAR ឃើញថា រូបគេបានទះមុខកីឡាករម៉ិកស៊ិក។
ការប្រកួតស្ទើរតែបញ្ចប់ទៅហើយ ប៉ុន្តែនាទី ៩០+២ ខ្សែការពារកណ្តាល និងជាប្រធានក្រុមម៉ិកស៊ិក César Montes ទទួលបានកាតក្រហមផងដែរ ដោយសារការបង្កកំហុសរារាំងឱកាសស៊ុតបញ្ចូលទីរបស់កីឡាករអាហ្វ្រិកខាងត្បូង។
គួររំលឹកថា កំណត់ត្រាចាស់សម្រាប់ការប្រកួតបើកឆាកព្រឹត្តិការណ៍ World Cup ដែលមានកាតក្រហមច្រើនជាងគេ កើតឡើងនៅឆ្នាំ ១៩៩០ នៅពេលដែលការមេរូនបានតស៊ូការពារសំណាញ់ទីជាមួយសមាជិកត្រឹមតែ ៩ នាក់ ដើម្បីយកឈ្នះអាហ្សង់ទីនលទ្ធផល ១-០។
ក្រឡេកទៅ១គូទៀតក្នុងពូល A ដដែល កូរ៉េខាងត្បូងក៏ធ្វើបានយ៉ាងល្អ ដោយយកឈ្នះសាធារណរដ្ឋឆែក នៅវេលាព្រឹកថ្ងៃដដែល នៅឯកីឡដ្ឋាន Akron ប្រទេសម៉ិកស៊ិក ក្នុងលទ្ធផល ២-១។ ជ័យជម្នះកូរ៉េខាងត្បូងសម្រេចបានដោយកីឡាករ Hwang In-Beom នៅនាទី ៦៧ និង Oh Hyeon-Gyu នៅនាទី ៨០ ខណៈដែល១គ្រាប់របស់ឆែករកបានដោយកីឡាករ Ladislav Krejčí តាំងពីនាទី ៥៩
ប្រកួតបន្ទាប់ សាធារណរដ្ឋឆែក ត្រូវប៉ះអាហ្វ្រិកខាងត្បូង នៅម៉ោង ១១ យប់ ថ្ងៃទី១៨ ខែមិថុនា (ម៉ោងនៅកម្ពុជា)។ ចំណែកម្ចាស់ផ្ទះម៉ិកស៊ិក ប៉ះកូរ៉េខាងត្បូង ម៉ោង ៨ ព្រឹក ថ្ងៃទី១៩ ខែមិថុនា៕ ប្រភព ៖ CNN, ESPN និង New York Times
ចែករំលែកព័តមាននេះ