អន្តរជាតិ ៖ ពូល H ព្រឹត្តិការណ៍ FIFA World Cup ឆ្នាំ ២០២៦ ជាពូលមានការប្រកួតប្រជែងដ៏ស្វិតស្វាញ និងជាការជួបគ្នារវាងក្រុមខ្លាំងៗលំដាប់ពិភពលោក និងក្រុមទើបតែបង្កើការភ្ញាក់ផ្អើលកាលពីថ្មីៗនេះ រួមមមាន អេស្ប៉ាញ, អ៊ុយរូហ្កាយ, អារ៉ាប៊ីសាអូឌីត និងក្រុមចំណូលថ្មី កាប់វែរ (Cape Verde)។
អេស្ប៉ាញ គឺជាក្រុមជើងឯកអឺរ៉ុបឆ្នាំ២០២៤ (Euro 2024) និងជាគីឡូធ្ងន់ប្រចាំពូល ដែលត្រូវបានគេរំពឹងខ្ពស់ថានឹងបញ្ចប់នៅកំពូលតារាង មិនតែប៉ុណ្ណោះក៏ជាក្រុមត្រូវបានបណ្តាអ្នកវិភាគផ្តល់ភាគរយខ្ពស់ជាបេក្ខភាពប្រជែងជើងឯកឆ្នាំ ២០២៦ ផងដែរ។ ដឹកនាំដោយលោក Luis de la Fuente ក្រុមរហស្សនាមគោជល់មួយនេះ សំបូរទៅដោយកកីឡាករឆ្នើមៗជាច្រើនរួមទាំង ខ្សែបម្រើការពារ Rodri ម្ចាស់ពាន Ballon d’Or ឆ្នាំ ២០២៤ រួមជាមួយខ្សែបម្រើពោរពេញដោយបច្ចេកទេស Pedri និងខ្សែប្រយុទ្ធវ័យក្មេងដ៏លេចធ្លោលើពិភពលោក Lamine Yamal ជាដើម។
-ចំណាត់ថ្នាក់ FIFA ៖ លេខ ៨
-ឱកាសលេខ ១ ក្នុងពូលពីការព្យាករណ៍របស់ Opta ៖ ៧៥,៦%
-កីឡាករឆ្នើម ៖ Lamine Yamal, Rodri, Pedri និង David Raya
អ៊ុយរូហ្កាយ អតីតម្ចាស់ជើងឯក FIFA World Cup ២ សម័យកាល បច្ចុប្បន្នស្ថិតក្រោមការដឹកនាំរបស់លោក Marcelo Bielsa គ្រូបង្វឹកឆ្នើមជនជាតិអាហ្សង់ទីន។ ក្រុមមកពីអាមេរិកខាងត្បូងនេះ ត្រូវបានគ្រប់គ្នាស្គាល់ថា តាមរយៈទម្រង់លេងវាយសម្រុកលឿន និងតំបន់ការពារដ៏រឹងមាំ មកជាមួយកីឡាករឆ្នើមៗជាច្រើនរូប រួមទាំងខ្សែបម្រើកណ្តាលដ៏រឹងមាំ Federico Valverde របស់ក្លិប Real Madrid និងខ្សែប្រយុទ្ធមុតស្រួច Darwin Núñez របស់ក្លិប Al-Hilal។
-ចំណាត់ថ្នាក់ FIFA ៖ លេខ ១៥
-ឱកាសលេខ ១ ក្នុងពូលពីការព្យាករណ៍របស់ Opta ៖ ១៨,៩%
-កីឡាករឆ្នើម ៖ Federico Valverde, Darwin Núñez និង Ronald Araújoa
អារ៉ាប៊ីសាអូឌីត គឺជាក្រុមខ្លាំងមកពីអាស៊ី ដែលធ្លាប់បានបង្កើតប្រវត្តិសាស្ត្រដ៏ភ្ញាក់ផ្អើលបំផុតកាលពី World Cup ឆ្នាំ ២០២២ ដោយបានយកឈ្នះលើក្រុមអាហ្សង់ទីន។ ឥឡូវនេះ ពួកគេបានវិលត្រលប់មកវិញជាមួយទម្រង់លេងដ៏មានវិន័យខ្ពស់ ក្រោមការដឹកនាំរបស់លោក Georgios Donis ព្រមទាំងមានតារាឆ្នើមប្រចាំក្រុមគឺ ខ្សែបម្រើស្លាបឆ្វេង Salem Al-Dawsari ជាប្រធានក្រុម។
-ចំណាត់ថ្នាក់ FIFA ៖ លេខ ៥៧
-ឱកាសលេខ ១ ក្នុងពូលពីការព្យាករណ៍របស់ Opta ៖ ៣,១%
-កីឡាករឆ្នើម ៖ Salem Al-Dawsari, Saud Abdulhamid និង Musab Al-Juwayr
កាប់វែរ គឺជាក្រុមចំណូលថ្មីដែលទើបតែបានមកបង្ហាញខ្លួននៅក្នុងព្រឹត្តិការណ៍ World Cup ជាលើកដំបូងបង្អស់ក្នុងប្រវត្តិសាស្ត្រ។ បើទោះបីជាក្រុមកម្រិតទាបប្រចាំពូលក៏ពិតមែន ប៉ុន្តែក្រុមរបស់លោក Bubista មួយនេះ បានបង្ហាញទម្រង់លេងយ៉ាងល្អកាលពីការប្រកួតជម្រុះទ្វីបអាហ្វ្រិក ដែលដឹកនាំដោយប្រធានក្រុមវ័យក្មេង និងជាអ្នករកគ្រាប់បាល់បានច្រើនជាងគេគឺ ខ្សែប្រយុទ្ធ Ryan Mendes។
-ចំណាត់ថ្នាក់ FIFA ៖ លេខ ៧៤
-ឱកាសលេខ ១ ក្នុងពូលពីការព្យាករណ៍របស់ Opta ៖ ២,៤%
-កីឡាករឆ្នើម ៖ Ryan Mendes, Dailon Livramento, Jamiro Monteiro និង Kevin Pina
កាលវិភាគប្រកួតទី ១ (ម៉ោងនៅកម្ពុជា)
-អេស្ប៉ាញ ប៉ះ កាប់វែរ ម៉ោង ១១ យប់ថ្ងៃទី១៥ ខែមិថុនា
-អារ៉ាប៊ីសាអូឌីត ប៉ះ អ៊ុយរូហ្កាយ ម៉ោង ៥ ព្រឹកថ្ងៃទី១៦ ខែមិថុនា
កាលវិភាគប្រកួតទី ២
-អេស្ប៉ាញ ប៉ះ អារ៉ាប៊ីសាអូឌីត ម៉ោង ១១ យប់ថ្ងៃទី២១ ខែមិថុនា
-អ៊ុយរូហ្កាយ ប៉ះ កាប់វែរ ម៉ោង ៥ ព្រឹកថ្ងៃទី២២ ខែមិថុនា
កាលវិភាគប្រកួតទី ៣
-កាប់វែរ ប៉ះ អារ៉ាប៊ីសាអូឌីត ម៉ោង ៧ ព្រឹកថ្ងៃទី២៧ ខែមិថុនា
-អ៊ុយរូហ្កាយ ប៉ះ អេស្ប៉ាញ ម៉ោង ៧ ព្រឹកថ្ងៃទី២៧ ខែមិថុនា៕ ប្រភព ៖ FIFA, Yahoo Sports, Opta Analyst, MLS Soccer និងប្រភពផ្សេងទៀត
ចែករំលែកព័តមាននេះ